NAVENDA NÛÇEYAN– Hedil Murad, jineke ciwan a ji Girkêlegê ku salek berê dest bi wênesaziyê kir. Hedil di destpêkê de tenê ji bo xweîfadekirinê dest bi pênûsê kir, îro bi rêya wêneyên xwe têkoşîna gelê xwe, berxwedana jinan û bîranîna şehîdan zindî dihêle.
Hedil, rêwîtiya xwe ya bo wênesaziyê wiha vegot:
“Tenê telefonek bi min re hebû. Ez li ser înternetê li şêwazên cûda yên wênesaziyê digeriyam. Wêneyên bi komirê (reş û spî) yên ku herî zêde bala min kişandin bûn. Ji ber ku hûn dikarin bi tenê pênûsekê gelek tiştan vebêjin. Min xwe fêr kir, û min wisa dest pê kir.”
Hunermenda ciwan zû dest bi karanîna pênûsa xwe kir ne tenê ji bo îfadeya kesane lê di heman demê de ji bo armancek civakî jî. Ew rave dike ku ew bi giranî şehîdan xiz dike:
“Şehîdan jiyana xwe ji bo gelê me û welatê me feda kirin. Ji ber vê yekê, min xwest têkoşîna wan bi rêya wêneyan ji cihanê re bidi nasîn.”
Wêneya ku herî zêde bandor li Hedil kir, portreya sê şehîdên jin bû: Ruhat Efrîn, Nesrîn Abdullah û Roksana Mihemed.
“Dema ku min ev tabloya wêne çêkir, min xwest hêza jinan nîşan bidim,” Hedil rola jinan di civakê de wiha rave kir: “Îro, jin ji bo parastina welat û civakên xwe şer dikin. Jin dikarin her tiştî bi dest bixin. Jin xwedî îradeyek mezin in. Min xwest vê yekê nîşanî civakê bidim.”
Li ser bingeha ezmûna xwe, Hedil peyamek bi ciwanan re parve dike û tekez dike ku huner ne tenê amûrek kesane ye, lê di heman demê de amûrek civakî ya îfadeyê ye jî:
“Gelek formên hunerî hene mîna wênesazî, helbest, stranbêjî û şano. Ev hemû dikarin werin fêrbûyin da ku ji bo ku em xwe xwe nîşanî cîhanê bidin. Em ciwan xwedî gelek derfet in. Divê em ji van derfetan sûd werbigirin.”
Tabloyên ku ji hêla hunermenda ciwan Hedil Murad ve hatine çêkirin wekî pirek di navbera paşeroj û pêşerojê, di navbera şehîdan û civakê de, û di navbera têkoşîna jinan û ciwanan de xizmet dikin.
