LÎVERPOOL – Li navenda bajarê Liverpoolê, bi pêşengiya TCŞ konê berxwedanê ji bo piştgiriya gelê Mexmûrê hate danîn. Di dema xwepêşandanê de, banga dawî ya Rêber APO ji bo gelê Mexmûrê ji raya giştî re hate xwendin û broşûrên agahdar hatin belavkirin. Di xwepêşandanê de, ku bala raya giştî ya Brîtanî jî kişand, rola Mexmûrê di berxwedan û têkoşîna ji bo jiyaneke azad de hate destnîşankirin.
Avaşîn Dêrsim di axaftina xwe ya di xwepêşandanê de diyar kir ku Mexmûr ne tenê kampeke penaberan e, lê keleheke berxwedanê ye ku jiyana azad li dijî dorpêç, êrîş û ambargoyan diparêze. “Wekî ku Rêber APO diyar kir, gelê Mexmûrê di demên berê de stûnên têkoşîna me bûne. Îro jî, ew ê heman rola pêşeng di avakirina ‘Civakek Aştîxwaz û Demokratîk’ de bilîzin. Em, ciwan, dizanin ku vegera bo axa xwe ne bi îradeya takekesî, lê bi îradeya kolektîf pêk tê. Ev hem dîroka têkoşîna me ye û hem jî nirxa pîroz a rûmeta gelê me ye,”
Di daxuyaniyê de bang li mirovên li Ewropa û çar aliyên cîhanê hat kirin ku vegerin ser axa xwe û wiha hat gotin: “Vegera bo Mexmûrê, vegera bo Kurdistanê, tenê bi awayekî rêxistinkirî, bi hev re û li ser bingeha azadiyê dikare pêk were. Jiyanek azad pir girîng e û em, ciwan, dê erkê xwe wekî pêşengtî di vê rêyê de bicîh bînin.”
Ciwanên din ên beşdarî xwepêşandanê bûn jî axivîn û piştgiriya xwe ji bo rûmet, berxwedan û îradeya jiyana azad a Mexmûrê anîn ziman.
Xwepêşandan bi dirûşmeyên “Bijî berxwedana Mexmûrê! Bijî Rêber APO!” bi dawî bû.
