BEHDÎNAN – Fermandariya Biryargeha Navenda Parastina Gel (NPG) got, “Salvegera 20’emîn a Pêngava 1’ê Hezîranê ya dîrokî ku bi pêşengiya Gerîlayên Azadiyê yêN Kurdistanê hate kirin, di serî de li rêberê azadiyê yê gelên bindest, jin û ciwanan li Rêber Apo, li dayikên me yên Şemiyê yên hêja ku bi xwedîderketinê têkoşîna şehîdên me mezin dikin, li malbatên me yên şehîdan, di şexsê Şehîd Mehmet Yildirim de ku bû sembola welatparêziya fedaî li tevahiya gelê me, li dostên gelê me û hevrêyan hemûyan pîroz dikin. Pêngava me ya 1’ê Hezîranê ji bo têkoşîna me pêngaveke dîrokî û navê israra li ser meşa xeta Apoyî ye. Di şexsê fermandarên pêşeng ên Pêngava me ya 1’ê Hezîranê hevrêyên me Erdal, Huseyîn Mahîr, Adil, Çîçek, Nûda, Rojîn Gewda, Reşît Serdar, Mehmet Goyî, Atakan Mahîr, Delal Amed, Fazil Botan û Leyla Sorxwîn Amed de, di şexsê fermandarên pêşeng ên serdema nû hevrê Doga M emyan, Ciwan, Andok, Huseyîn, Welat, Serxwebûn, Rizgar, Şervan, Canşêr, Ekîn Hewrê Çiya de ku têkoşîn bi taktîkên şer ên gerîla yên dema nû gihandine asteke nû, hemû şehîdên xwe bi hezkirin, hurmet, bi minet û dilsoziyeke mezin bi bîr tînin.”
Di daxuyaniya NPG’ê de hate gotin, “Bi Komploya Navneteweyî ya 15’ê Sibata 1999’an re di şexsê Rêber Apo de ji bo tinekirina Tevgera Azadiyê ya Kurdistanê ku temînata paşeroja azad a gelê me ye, konseptek xistin dewrê. Rêber Apo li gel nebûna derfetan jî paradîgmaya Demokratîk, Ekolojîk û Azadîparêziya Jinê afirand û bi vî rengî bersiva herî mezin da komplogeran. Rêberê me li ser bingeha paradîgmaya nû derfetên mezin ji bo pêkhatina çareseriyeke demokratîk li Tirkiyeyê afirand û pêvajoyeke 5 salan a bê şer pêk hat. Lê belê tevî hemû hewldanên çareseriya demokratîk ên Rêberê me, dewleta Tirk a mêtinger di polîtîkaya înkar û îmhayê de israr kir, giranî da ser polîtîkayên qirkirinê yên li dijî gelê me. Tevgera me li dijî van êrişan hemûyan di sala 2004’an de dest bi Pêngava 1’ê Hezîranê ya Dîrokî kir ku tê wateya Pêngava Duyemîn a 15’ê Tebaxê û bersiva dîrokî ya pêwîst da hêzên komploger ên navneteweyî, dewleta Tirk a mêtinger û tasfiyekarên xayin ên ku dixwestin têkoşîna me ji hundir têk bibin.”
Di daxuyaniya Fermandariya Biryargeha NPG’ê de bi dewamî hate gotin, “Ji roja destpêkirina Pêngava 1’ê Hezîranê ya Dîrokî û vir ve têkoşîneke bêeman ahte meşandin, armanca dewleta Tirk a qirker mêtinger a ji bo qirkirina gelê me û tasfiyekirina tevgera me bêencam hate hiştin. Asta ku têkoşîna me îro gihîştiye careke din nîşan dide bê Pêngava 1’ê Hezîranê çiqasî di cih de bû û rast bû. Bi rengekî şênber hate fêhmkirin ku li Kurdistanê heta ku ji aliyê îdeolojîk, rêxistinî, çandî, siyasî, civakî, xweparastin û têkoşîna çekdarî ve têkoşîneke bêeman neyê meşandin, derfetên jiyana azad ên gelê me nikarin bêne afirandin, pêşî li êrişên qirkirinê nikare bê girtin.
Hêzên komploger ku doh nekarî armancên xwe yên qirêj bi ser bixînin û ji wan nehat ku tevgera me û îradeya Kurd ê azad tine bikin, îro jî ji bo bigihêjin armanca xwe xwe dispêrin xayinên hevkar û hewl didin armanca xwe ya qirkirin û dagirkeriyê pêk bînin. Lê belê di asta heyî de êdî rûyê xiyanetkarên hevkar ji aliyê gelê me ve hatiye fêhmkirin, li dijî ferasetên tasfiyekar tedbîr hatine wergirtin, li dijî dijminê qirker li her qadê têkoşîn tê meşandin û gihîştiye astekê. Tevgera me û gelê me bi rengekî yekpare li dora xeta Apoyî civiya ye û li gel hemû zor û zehmetiyan têkoşînê bêteredût dewam dike, paşve gavê neavêje, berxwedana dîrokî ya Rêber Apo ya li Îmraliyê ji xwer e dike esas, şerê gel ê şoreşgerî bilind dike ku ev yek dijminê me bêzar dike. Ji ber vê yekê li dijî gelê me, li her qadê li hemberî hebûna gelê me û Gerîlayên Azadiyê yên Kurdistanê bi her cûre rêbazên li dijî mirovahiyê û çekên qedexekirî êriş dike.
Gerîlayên Azadiyê yên Kurdistanê ku li ser bingeha Şerê Gel ê Şoreşgerî profesyonel bûye, di şexsê Sara Goyî, Rûken Zelal, Rojhat Zîlan û Erdal Şahîn de ruhê fedaî yê Apoyî gihandine asta herî bilind, xeta têkneçûnê ya PKK’ê nîşan dane, her bihosta xaka Kurdistanê bi rengekî fedaî diparêzin û Pêngava 1’ê Hezîranê ya Dîrokî bi rengekî xurt pêşwazî dikin. Weke Gerîlayên Azadiyê yên Kurdistanê ku artêşa fedaî ya Rêber Apo ne, em xwedî wê hêzê û biryarê ne ku ji bo azadiya gelê me di şerê me yê gel ê şoreşgerî de berpirsyariya xwe bi têkoşîna fedaî ya li ser xeta Apoyî bi cih bînin. Li ser vê bingehê em salvegera 20’emîn a Pêngava 1’ê Hezîranê careke din li gelê xwe, li dostên xwe û li hevrêyên xwe yên li her qadeke têkoşînê pîroz dikin.”
