NAVENDA NÛÇEYAN – Tevger û rêxistinên jinan li Bakur û Rojhilatê Sûriyeyê di kêmkirina van diyardeyan de alîkariyeke mezin didin û ji bo endamên civakê ji bo jiholêrakirina diyardeya zewaca di temenê biçûk de semîner û atolyeyên hişyariyê li dar dixin. Li gorî amarên Mala Jin a bajarê Qamişlo ya Bakur û Rojhilatê Sûriyeyê di sala 2023’an de 62 rewşên zewaca di temenê biçûk de gihîştin berê destê wan û ji nav wan 56 çareser kirin. Rola rêxistinên jinan û zagona malbatê ya ji aliyê Rêveberiya Xweser ve hatiye pesendkirin, di sala 2023’yan de bandoreke berbiçav kir û zewaca bi temen biçûk kêm bû.
12 salî hat zewicandin
H.M ya 43 salî ku ji bajarê Qamişloyê ya Kantona Cizîrê li Bakur û Rojhilatê Sûriyê ye, di 12 saliya xwe de ji aliyê bavê xwe ve hatiye zewicandin.
H.M dibêje ku ew zewac weke sûcê li hemberî zarokatiya xwe dihesibîne û ew ji gihandina armanc û xeyalên wê mehrûm kiriye û wiha pê de diçe: “Min zaroktiya xwe nedît. Piştî ku mezin jî bûm, nikaribûm bi kêfxweşî bijîm her dem ev hesreta xwendin û jiyana weke ku jin gereke bijîn di dilê min de ma. Ev sûcekî li dijî exlaq bû ne tenê zarokatiya min. Ez hêvî dikim ji malbatan ku zarokên xwe di temenekî biçûk de nezewicînin, bila zarok her pêvajoyeke jiyanê di dema wê de bijîn, xwendina xwe bi dawî bikin û armancên xwe pêk bînin.”
Li Bakur û Rojhilatê Sûriyê zagonên ku vê diyardeyê sînordar dikin
Rêveberiya Xweser a Demokratîk a Herêma Bakur û Rojhilatê Sûriyeyê, ji bo rakirin ango kêmkirina diyarde û pirsgirêkên civakê, di sala 2023’an de Zagona Malbatê ku ji 6 xalan pêk tê ku tê de 41 bend bi çend mijaran ve girêdayî ne, di nav de: Zewac, hevberdan û tawanên girêdayî xizm û malbatê pesend kir. Li gorî ku çavdêr dibêjin ev zagon li kêleka belavkirina hişyariyan dihêle ku kêmbûneke berbiçav di diyardeya zewaca di temenê biçûk de jî çêbibe.
Rêvebera Mala Jin a bajarê Qamişlo- Bakur û Rojhilatê Sûriyeyê Behiye Murad ku ji bo dozên civakî di nav de zewaca temenê biçûk de jî dixebitin dibêje ku di rewşa şer de pirsgirêkên civakê zêde dibin lê bi pesendkirina zagona jinan ku paşê veguherî zagona malbatê êdî sînor ji vê diyardeyê re hatiye dayîn û wiha lê zêde dike: “Bav û diyên ku zarokên xwe yên biçûk dizewicînin, li gorî xala yekem a zagonê bi cezayê girtîgehê ji salekê heta sê salan an jî yek ji cezayên alternatîf ên ku di Zagona Cezayê de hatine diyarkirin. Pê re jî bi cezayê pere tê cezakirin bi berçavgirtina xala yekem a xala pêncan a vê zagonê. Heman ceza li hevjîn/a mezin ê/a ku beriya zewacê bi rewşa temenbiçûkiya xwe dizanibû jî tê birîn.”
ÇAVKANÎ: JINHA
