QAMIŞLO – Meclisa Xwendekarên Zanîngeha Rojava ji bo piştgiriya xwendekarên li Îran û Rojhilatê Kurdistanê di Serhildana ʹʹJin, Jiyan, Azadîʹʹ de, daxuyaniyek da.
Daxuyanî li avahiya Zanîngeha Rojava ya li bajarê Qamişloyê hat dayîn û ji aliyê Berdevka Meclisê Selwa Ebûd ve hat xwendin.
ʹBI PÊŞENGIYA JINÊN CIWAN KIRASÊN REŞ HAT QETANDINʹ
Di daxuyaniyê de hat diyarkirin ku di Serhildana “Jin, Jiyan, Azadî” de rola xwendekaran berçav e û hate gotin: ʹʹBi taybetî rola xwendekarên jin di pêşengtiyê de diyarker e. Bi pêşengiya jinên ciwan, civakê kirasên reş û teng ku her kêlekî wê ji aliyê rejîma zilimkar a Îranê ve hatibû dirûtin, têne qetandin. Ev tirs û xofekê dixe nava dilê rejîma zilimkar a Îranê ku dixwaze rejîma xwe mayînde bike.”
Xwendekaran di daxuyaniyê de destnîşan kir ku ev 44 sal e dewleta Îranê girtin, kuştin û darvekirin kiriye şêwazê parastina rejîma xwe û bal kişand ser jehrîkirina xwendekarên keç û got: “Bêguman ev ji bo rejîma Îranê ne hedefekî ji rêzê û tesadûfî ye. Heya niha di nava bajarên Rojhilat wekî Sine, Mehabad, Îlam, Kirmaşan, Seqiz, Merîwan û Bokan de û di nava bajarên Îran de jî Tehran, Qom, Îsfehan, Kerej û Şîraz de xwendekarên 170 dibistanan rastî êrişên gazên kîmyewî hatine û zêdetirî 7 hezar xwendekar hatine jehrîkirin. Ji nava wan jî herî kêm 4 kesan jiyana xwe ji dest dane. Di nava wan de hin jê xwendekarên zanîngehan in, lê piranî dibistanên navîn û amadehî ne.”
ʹREJÎM NIKARE BAHOZA AZADIYÊ ASTENG BIKEʹ
Di daxuyaniyê de îşaret bi vê yekê hate kirin ku xwendekarên jin êdî dîwarê tirsê hilweşandine û daxwaza guhertineke demokratîk dikin. Her wiha hate gotin: ʹʹLê rejîma Îranê wê êriş û çewisandinan nikaribin bahoza guhertin û azadiyê asteng bike. Ev bahoza azadiyê koka xwe ji tevgera ciwanên şoreşger a 1968`an digire û niha li hemû çiya, deşt û bajarên Kurdistanê belav bûye.”
Di dewama daxuyaniyê de bal hat kişandin ku felsefeya “Jin, Jiyan, Azadî” ya Rêber Abdullah Ocalan, niha bûye dirûşma sereke ya serhildana gel û hat destnîşankirin ku navenda ciwanên şoreşger bi Şoreşa Rojava û Rojhilat re êdî li Rojhilata Navîn e û ala pêşengiyê jî di destên ciwanên Rojhilat û Îranê de ye.
Di daxuyaniyê de hat diyarkirin ku ciwan û xwendekarên jin ên Rojhilat û Îranê ne bi tenê ne û wiha hat domandin: ʹʹEw wekî xwendekarên Zanîngeha Rojava bi her awayî di nava piştgiriyê de ne.”
BANGA PIŞTGIRIYÊ
Xwendekarên Zanîngeha Rojava bang li hemû ciwan û xwendekarên şoreşger ên cîhanê kir û got: ʹʹDilê şoreşa azadiyê niha li Rojhilat û Îranê lê dide. Werin em bi hev re torên piştgiriyê bi ciwan û xwendekarên Rojhilat û Îranê re ava bikin. Rejîmên dîktator û hegemon wê bi rêya piştgiriyên şoreşgerî re hilweşin.ʹʹ
