ŞEHBA- Komîteya Ciwanan a Meclisa Malbatên Şehîdan a Herêma Efrînê bi xwepêşandanekê tecrîda li ser rêber Ocalan şermezar kirin.
Bi dehan ciwan, nûnerên saziyên sivîl û partiyên siyasî li kêleka Kampa Serdemê ya Kantona Şehbayê kom bûn û ber bi parka Ehdas a kantonê ve bi rê ketin.
Li wir, daxuyaniyek bi zimanê Kurdî ji aliyê endamê Komîteya Perwerdeya Civaka Demokratîk a Herêma Efrînê Avdar Elo û bi zimanê Erebî ji aliyê endama Meclisa Malbatên Şehîdan Lolyan Dawûd ve hat xwendin.
Di daxuyaniyê de ev tişt hate gotin: “Hîn jî komploya li dijî gelê Kurd di şexsa rêber Ocalan de didome. Qedexeya hevdîtina bi rêber Ocalan re heta 6 mehên din hat dirêjkirin, ev biryar jî hişmendiya faşîst a dewleta Tirk a dagirker nîşan dide.
Hêzên ku rêber Ocalan dîl girtine hemû pîvan û nirxên mirovî û exlaqî derbas kirin û hîn jî piştgiriyê didin siyasetên qirkirin û tunekirinê yên ku dewleta Tirk pêk tîne.
Em bang li hemû hêzên azadîxwaz û demokrasîxaz, rêxistinên mafên mirovan, Konseya Ewlehiyê ya Nateweyên Yekbûyî û civata navneteweyî dikin ku xwedî li erka xwe derkevin û zextê li hikûmeta AKP’ê bikin da ku rêber Ocalan û hemû girtiyên siyasî yên di girtîgehên faşîzma Tirk de ne serbest bên berdan.
Em soz didin ku têkoşîna xwe heta pêkanîna azadiya fîzîkî ya rêber Ocalan bidomînin.”
