NAVENDA NÛÇEYAN –
Ji Bîranîna Gerîla…..
Serê sibehê, beriya ku tava rojê bide pencera odeya lê dinive, heval ji xew rabû. Nivînê xwe rast kir. Ji bo di taksiyê de bîzê wî venebe, bi taştêyek sivik xurîniya xwe şikand. Ji mala komunê derket û berê xwe da cihê ku Zana û Zînê li benda wî ne. Heval gihîşt wê derê û dît ku Zana û Zînê di taksiyê de li benda wî ne. Ji bilî Zana û Zînê, kurê wan ê biçûk Nebaz û Sîsê jî di taksiyê de bûn. Heval bi gotina, “rojbaş!” li taksiyê siwar bû.
-Hûn çawa ne? Hûn bê bela ne?
Berî hemûyan Sîsê, heval bersivand:
-Tu sax bî heval. Em hemû bê bela ne. Tu çawa yî?
Piştî bersivandinê, Zîne û Zana bêrê xwe dan Sîsê û keniyan… Sîsê ji bo ku berî dê, bav û birayê xwe Heval bersivand şerm kir.
Spîtiya rûyê Sîsê winda bû, bi carekê spîsor bû. Lê, ji bo ku Sîsê hîn zêdetir xiçil nebe, dayîka wê ji heval re got:
-Keça min wekîla me ye, dikare bi navê me hemûyan bersivê bide, heval…
Ji bo ku xelkê bajêr sêzdehê nîsanê berê xwe dabûn çolê, di derketina bajêr de wesaît wek moriyan diçûn û dihatin. Mirov ji wesaîtan ax biavêta hewayê li erdê nediket… Ji derketina bajêr heya Geliyê Qasimlo, Zana her Mihemed Arifê Cizrawî dabû ser teybê. Hemûyan bi kêfxweşî li Mihemed Arifguhdarî dikirin. Carekê du caran Zînê gote Zana:
-Êdî Mihemed Arif bes e; em Eyşe Şan guhdarî bikin, ne çêtir e?
-Ji ber ku Mihemed Arif mêr e, tu dixwazi îlehî em dengê jinekê guhdarî bikin, ne wisa?
-Na, bi serê Sîsê. Ez jî ji dengê Mihemed Arif pir hez dikim. Lê, ji derketina bajêr heya vê derê te her Mihemed Arif bi me da guhdarkirin, vê carê jî bila Eyşe Şan be.
-Min fêm kir ka ji bo çi tu Eyşe Şan dixwazî.
-Ji bo çi ez dixwazim tu Eyşê Şan bide ser? Bêje, ku em jî bizanibin.
-Ji ber ku ew jin e, tu cinsiyetparêziyê dikî.
-Tu ji min cinsiyetparêztir î. Eger ku ne wisa bûya, ji bo çi ji kengî de em Mihemed Arif guhdarî dikin?
Nêzîkî nîv saetê Zana kaseta Mihemed Arif neguherand. Piştî nîv saetê kaseta Mihemed Arifê Cizrawî ji teybê derxist, a Eyşe Şan xist çûnê. Wexta ku Zana kaseta Eyşe Şan da ser, Zîne dev li ken gote Zana:
-Ez dizanim, tu ji min zêdetir ji dengê EyŞe Şan hez dikî. Lê, tu ya di dilê xwe de vedişêrî…
-Ji bo çi, ez ji dengê Eyşe Şan hez dikim? Gelo ji bo ku ew jin e, ji ber wê yekê…
