NAVENDA NÛÇEYAN – Komîteya Rêveber a Tevgera Şoreşê ya Yekbûyî ya Gelan (HBDH) bi wesîleya salvegera Şoreşa Cotmehê daxuyaniyek da.
Di daxuyaniyê de hate gotin, “Bindestan di her serdemê de serî hildan. Bi ser ketin, li bin ketin, lê timî têkoşiyan. Di ‘berbanga azadiyê’ de li Parîsê piştî tecrûbeyeke demkurt a komunê di 7’ê Mijdara 1917’an de li Rûsyayê azadî fetih kirin.”
Di daxuyaniyê de wiha hate gotin, “Ala şoreşê di nava kavirên şerê parvekirinê yê emperyalîst ê yekemîn de bilind bû. Destpêkê jin li ber birçîbûn û sefaletê rabûn. 8’ê Adarê (Li gorî salnameya berê ya Rûs 24’ê Sibatê) xwepêşandan veguherî raperînê, raperînê jî şoreş mezin kir. Di demeke kurt de paşverûtiya Çarlik a sedan salî hilweşiya.
Piştî 7 mehan di 7’ê Mijdara 1917’an de (Li gorî salnameya berê ya Rûs 25’ê Cotmehê) vê carê jî serweriya bûrjûva hildiweşiya bi destê karker, kedkar û jinan. Ya ku pêk dihat ne tenê şoreşeke karkeran a li welatekî bû. Na! Ya ku pêk dihat Şoreşa Cotmehê ya serdemekê bû. ‘Serdema şoreşên proleter’ a li tevahiya cîhanê bi wê dest pê kir.”
Di dewama daxuyaniyê de hate ragihandin ku sîstema emperyalîst-kapîtalîst îro di asta cîhanê de di nava krîzeke mezin de ye û hate gotin, “Bi birînên ku nayên pêçandin diheje. Ji bo karibe li ser piyan bimîne êrişî her derê dike. Şer dide destpêkirin, darbeyan dike… Makîneya zext û zordariyê bênavber dixebite!
Ya ku diqewime krîzeke sîstemê ye. Krîzeke sîstemê ye ku mizgîniya bidawîbûna şaristaniya kapîtalîst dide. Gelên cîhanê, karker, kedkar û bindest li her parzemînê li dijî vê sîstema hilweşîner a sermayeyê serî hil didin. Li her derê dikevin nava liv û tevgerê, têdikoşin. Ji bo pêkhatina şoreşê her tişt guncav e. Em di demeke welê de ne ku bi wêrekî û dilxwaziya Şoreşa Cotmehê bikevin nava têkoşînê.
Di nava vê krîza global de, dîktatoriya faşîst bûrjûva ya li Tirkiye û Bakurê Kurdistanê ku yek ji xeleka herî lawaz a sîstemê ye dirize, pêl bi pêl hildiweşe. Dîktatoriya faşîst a ku di nava lepê krîza siyasî û aborî de ye li her qadê belav dibe. Ya ku dîktatoriya faşîst aniye ber rizandin û hilweşînê, raperîn û têkoşîna gelên me yên kedkar e.”
Di daxuyaniyê de hate gotin, “Ev xak xaka şoreşê ye. Rêya ‘şoreşa xwe dispêre zorê’ ku bi qutbûna şoreşgerî ya 1971’ê ji aliyê şoreşgerên bi wêrekiya ‘pêkanîna şoreşê’ ya Şoreşa Cotmehê dan destpêkirin, nîv sed sal e bi dayina berdêlên giran dewam dike. Têkoşîna ku em gihandine vê serdemê, nîv sed sal e bênavber dewam dike. Em êdî gihîştine wê astê ku hîn bi pêş ve biçin.
Tevgera me ya Şoreşê ya Yekbûyî li ser bingeha ‘wêrekiya pêkanîna şoreşê’ ya rêberên me yên nemir ava bû û dest bi têkoşînê kir. Rêya me rêya şoreşê ye ku gelên me ber bi serketinê ve dibe. Dem ew dem e ku di vê rêyê de ber bi pêş ve, ber bi armanca xwe ve bimeşin. Em ê vê pergala riziyayî bixin binê erdê! Em ê vê dewletê, vê sîstema zilmê ya faşîst a riziyayî hilweşînin, parçe parçe bikin!
Xeta me diyar e. Rêya me diyar e. Armanca me diyar e. Şoreşa Cotmehê rêya me ronî dike. Em ê li ser vê rêyê têkoşîna xwe dewam bikin.”
