Dengbêj Baqî Xido di sala 1913’an de li navçeya Şêran ya ser bi bajarê Kobanê yê Rojavayê Kurdistanê ji dayîk bûye û dengbêjê deşta Sirûcê ye. Navê bavê dengbêj Baqî Xido, Xidoyê Hindawî û navê dayika wî jî Emşa Mesto ye. Baqî Xido ku du caran zewiciye, ji herdu hevjînên wê 12 kur û 8 keçên wî hene û heta niha jî zarokên wî li bajarê Kobanê dijîn. Dengbêj Baqî Xido jî weke gelek dengbêjên kurdan yên navdar, dengbêjekî mezin û di nava gel de bi nirx bûye. Ew ji wan dengbêjane ku bi dengê xwe destanên klasîk û serpêhatiyên Kurdan bi dengbêjiya xwe parastiye. Dengbêjê Kurd Baqî Xido ku li Rojavayê Kurdistanê ji dayîkbûye, li seranserê Deşta Sirûcê, parêzgeha Riha, Dîlok û Cizîrê yên Bakurê Kurdistanê jî binavûdeng bûye.
Dengbêjê Kurd, di sala 1995’an de ji ber sedema nexweşiyekî dest ji dengbêjiyê berdide. Jiyana dengbêj Baqî Xido bi feqîrî û perîşaniyê derbas bûye. Di dengbêjiya Baqî Xido de roleke mezin ya Mihemed Dûman ku jêre li kemanê daye û Mihemed Gulî ku jêre li tembûrê daye, heye. Dengbêj Baqî Xido xwedî hunereke dewlemend bû ye û gelek plakên wî yên mûzîkê hebûne û piştre jî gelek kasêt tomar kiriye. Baqî Xido di jiyana xwe de fêrî 5 zimanan bûye, ew jî zimanên: Kurdî, Erebî, Tirkî, Ermenî û Fransî bûn û ew li her 4 welatên Sûriyê, Tirkiyê, Iraqê û Lubnanê geriya ye. Carekê ew û kemanjen Mihemed Xelîl Xazî ji aliyê Komeleya El-Erz ve ji bo welatê Lubnanê hatibûn vexwendin. Dengbêj Baqî Xido bi stranên weke Delalê Edûlê, Dewrêşê Evdî, Bêmal, Mem û Zîn, Teyar, Delalî Qîzikan, Lo Dilo û gelek stranên din ku gotiye, bûye xwedî navûdeng û ew dengê wî li çar aliyên Kurdistanê belav bûye.
Her çend di dema Baqî Xido de dezgehên medyaya Kurd û derfetên pêwîst gelek kêm jî bû, lê tevî wê jî berhemên dengbêjê Kurd heta niha zindî mane û hîn jî gel guhdar dikin. Stranên Baqî Xido ji aliyê nevî û zarokên wî ve jî tên gotin. Ji bilî Kurdan, gelên din jî bi riya Baqî Xido guhdane çand û dîroka Kurdan. Weke mînak, jineke Swîsreyî teza xwe ya Doktora bi zimanê Inglîzî li ser destana Dewrêşê Evdî ya ku Baqî Xido gotiye, amade kiriye.
Baqî Xido berî wefat bike, bi amadebûna nêzîkî 600 kesên ji rewşenbîr, nivîskar û xwendekarên zanîngeha Helebê ve tê xelat kirin. Baqî Xido di 7’ê Sibata sala 2009’an de li bajarê Kobanê koça dawî dike û xelkê Kobanê bi merasîm û beşdariyeke girseyî ya mezin, xatir jê dixwazin. Ew bi şêweyekî pir bi rêz û bi nirx, tê oxir kirin û li goristana gundê Termik li Kobanê tê veşartin.
