NAVENDA NÛÇEYAN – Dewleta Tirk ya dagirker û hevkarê wê PDK’ê ji 17’ê Nîsanê de li dijî Gerîlayên Azadiya Kurdistanê li Herêmên Parastina Medyayê êrîşeke nû ya dagirkerinê daye destpêkirin. Li hember hemû êrîşên hovane Gerîlayên Azadiya Kurdistanê bi rihekî fedayî bê navber derb li dagirkeran dixin û berxwedaneke bê hempa raber dikin. Li ser vê bingehê ji bo hembêzkirina berxwedana gerîla ji aliyê Komalên Ciwan û Komalên Jinên Ciwan ve seferberî di bin dirûşmeya “LI DIJÎ DAGIRKERÎ Û ÎXANETÊ, WERIN CENGA AZADIYÊ” hate ragihandin.
Ji bo wê jî li ser esasê bersivdayîna banga seferberiyê bi sedan ciwan û jinên ciwan yên Kurd û dostên wê ve li dijî êrîşên dagirkeriyê ya bi hevkariya PDK’ê tevlîbûna xwe ya nava refên gerîla radigihînin. Di heman demê de ciwanên Başûrê Kurdistanê jî li hember xeta îxanetê ya PDK’ê bi bertekin, bersivên xwe jî bi tevlîbûna nava refên PKK’ê didin.
Ciwanê bi navê Behroz ya ji Başûrê Kurdistanê bajarê Ranyayê ye ku li ser esasê seferberiyê tevlî nava refên gerîla bûye, ji ajansa me re tevlîbûna xwe ya nava refên gerîla parve kir. Behroz destnîşan kir ku divê sekna rêheval Bêrîtan ya li hember xeta îxanetê bê domandin û her kes li ser wê xetê soza bilindkirina têkoşînê bide.
‘Dema ku min heval dîtin min hestekî pir cuda jiyan kir’
Dîtina min ya ji bo hevalan tesedûfekî mezin bû, yanê dema ku min heval dîtin min hestekî pir cuda jiyan kir. Ji bilî wê jî şerê Rojava hîna di bîra min de bû, min hertim ji xwe dipirsî çima ez jî nikarim tevlî vê şoreşê bibim û li dijî dagirkeran şer bikim. Ev yek weke hesretekê di hundirê min de mabû, ji bo wê jî ez çûm gel hevalan, min li gel wan xwast PKK’ê nasbikim. Piştî ku min heval dîtin û kêmekî bi wan re danûstandin kir, di dawiya 2019’an de ez tevlî kar û xebatê ciwanan bûm, min li gelek bajarên cuda cuda xebat da meşandin.
‘Xeta berxwedanê ya şehîd Bêrîtan min ji bo xwe esas girt’
Her wiha Behroz axaftina xwe dewam kir û got divê li hember xeta berxwedanê ya şehîd Bêrîtan a li hember îxanetê were mezin kirin û got; “Ez ji xeta berxwedanê ya şehîd Bêrîtan a li hember îxanet û şerê birakujiyê bandor bûm, min sekna şehîd Bêrîtan ji bo xwe esas girt, ji ber ku şehîd Bêrîtan bi sekna xwe destanekî dîrokî nivîsand. Li ser vê esasê min li ser xeta şehîd Bêrîtan soza xwe ya tevlîbûna nava refên gerîla da. Di heman demê de divê her kes xwedî li vê xetê derbikeve.”
‘Êrîşên dagirkeriyê di şexsê gerîla de li ser tevahî gelan û mirovahiyê tê kirin’
Behroz da zanîn ku wê têkoşîn û xebatê xwe hemû ji bo azadiya Rêberê Gelan Abdullah Ocalan bixe xizmetê û got; “Ezê ji bo azadiya Rêber Apo têkoşîn bikim û xebat bidim meşandin. Niha li çiyayên Kurdistanê li dijî Gerîlayên Azadiyê şerekî pir dijwar rû dide, li hember gerîla çekên kîmyawî tên bikaranîn, dîsa ruxmî hemû êrîşên hovane gerîla bi rihekî fedayî li berxwe dide. Di heman demê de divê ev berxwedan bi gerîla tenê re sînordar nemîne, hemû mirovên welatparêz bi taybet jî ciwan divê bibin xwedî helwest û li dijî êrîşên dagirkeriyê bisekinin. Ji ber ku ev êrîş ne tenê ser gerîla ye, di şexsê gerîla de li ser tevahî gelê Kurd û Kurdistanê ye.”
‘Divê ciwan li dijî îxaneta heyî bê deng nemînin û tevlî nava refên gerîla bibin’
Behroz di dawiyê de destnîşan kir ku divê her kes tevlî nava refên gerîla bibe, da ku jiyan azad hembêz bikin dewam kir û got; “Ez bang li hemû ciwanan dikim û bi taybet jî ciwanên Başûrê Kurdistanê, divê li dijî van êrîşan bê deng nemînin û tevlî nava refên gerîla bibin. Ji ber ku êrîşên tên kirin, di şexsê gerîla de li tevahî gel û mirovahiyê tê kirin. Careke din ez soza xwe ya ji bo şehîdan û Rêber Apo dubare dikim û dibêjim heya dawiyê bedêla wê çibe ezê ji bo mirovahî û jiyana azad xizmet bikim.”
NC// Destîna Qendîl
