NAVENDA NÛÇEYAN –
Luqman GULDIVÊ nivîsand
Divê destpêkek be. Ne destpêk be, nabe, li xwe nayê, li navê xwe nayê, ji wê û heft bavê wê re kêmasî ye. Di salên 1990’î de destpêka serhildanan bû li Nisêbîn, Cizîr, Hezex, Silopiya û hawîrdorê.
Divê destpêkek be. Ne destpêk be, nabe, li xwe nayê, li navê xwe nayê, ji wê û heft bavê wê re kêmasî ye. Di salên 1990’î de destpêka serhildanan bû li Nisêbîn, Cizîr, Hezex, Silopiya û hawîrdorê. Weke navê xwe bû, new-roz! Roja nû, jixwe behsa destpêkê dike, heger na, ma me çi jê ye.
Pêr li Frankfurtê bi dehhezaran Kurd û dostên wan li meydana Rebstockê bûn, ji bo pîrozbahiyên Newrozê. Gelek sedem hene mirov kêfa xwe bîne. Min kêfa xwe ji axaftina Hatîp Dîcle re anî: Bi Kurdî peyivî.
Piştî bi salan dîtina Nasir Rezazî li ser dikê jî kêfa min anî, eynî weke dîtina Şehrîbana Kurdî. Û herî zêde jî dîmenê hêviyê; bê hêvî nabe û hêvî li wê meydanê hebû. Bi min re jî heye. Van kêliyên ku ez van rêzan dinivîsim, ji ber ku ez ê ji zarokên Kurd re piştî du saetên din behsa Newrozê bikim û performanseke Newrozê bi wan re bikim, kela canê min radibe û erê hêviya min heye. Sibe li dibistaneke din ez ê behsa Newrozê bikim, û erê kela canê min ji bo wê jî radibe.
Mesele ne ew e ku mirov behsa çîroka, efsaneya Newrozê ji zarokan re bike, mesele ew e ku zarok hene yên ku dê û bavên wan dixwazin ew zarok bi efsaneya Newrozê zanibin. Dê û bav hene ku dixwazin zarokên wan bi kela canê dê û bavê xwe ya Newrozê zanibin. Da ku ew jî sibe, dusibe weke dê û bavê xwe, bi hatina Newrozê re kêfxweş bibin, şa bibin, kela canê wan rabe.
Ji bo min Newroz, misêwa, ji bo ku vê yekê diafirîne, pîroz e. Newroz hêviyê, hebûnê, xwebûnê bi xwe re diafirîne. Her sal çawa ku ruh bi xwazayê tîne bi hatina biharê re, ruh bi Kurdan jî tîne.
Ew ruh dikare hinde xurt be ku li Başûr desthilata wir neçar bike ku bi dewleta Tirk re hevkariyeke li dijî Kurd neke. Hêviya min heye, gava dîmenên Newroza Qendîlê belav bûn, hûnê jî bi heman hêviyê li miletê Başûr binihêrin.
Newroz li Bakur jî heta niha nîşan da ku qirkirinê (çi fizîkî, çi siyasî û çi jî çandî) bi Kurdan nekarî. Dîmenên Newroza îro jî wê binê van gotinan, weke ku mîsaqek be, mohr bikin. Newroz bi giştî ji bo Kurdan îfadeya hebûnê û xwebûnê ye. Ji ber wê ne tenê Kurd bi meraq li benda vê rojê ne, dijminên Kurdan jî bi heman meraq û gelek pirsan li benda Newrozê ne. Ew jî dixwazin zanibin ka Kurd çiqasî hene û heger hene çiqasî xwe bi xwe ne.
Hevserokê Konseya Rêveber a KCK´ê Cemîl Bayik got, “Divê ev Newroz bibe destpêka azadiya fizîkî ya Rêber Apo”. Newroz divê destpêkek be, û ji vê destpêkê watedartir ma çi dibe ku hebe. Azadiya fizîkî a Abdullah Ocalan, azadiya miletê Kurd e jî. Qebûla wî, betalkirina tecrîdkirina wî elaqedarî qebûla Kurdan û qabûla maf û doza wan in. Newroz bi xwe nikare bibe destpêk, miletê Kurd wê dike destpêkek. Û diyar e îsal miletê Kurd divê Newrozê bike destpêka azadiya fizîkî ya Ocalan. Newroz li we pîroz be.
YENİ ÖZGÜR POLİTİKA
