NAVENDA NÛÇEYAN – Endamê Komîteya Malbatên Şehîdan a PKK’ê Yasîn Bulut (Şukrî Serhed) 17’ê Îlonê serê sibehê saet di 08.30’an li taxa Çarçira dema ku diçû nexweşxaneyê ji aliyê endamên MÎT’ê ve hat gulebarankirin û şehîd bû. Tevî ku 40 roj derbas bûn hîn bûyer nehatiye zelal kirin.
Dewleta Tirk a dagirker 16’ê Îlonê li Silêmaniyê welatiyê bi navê Ferhad Bariş Kondu ku ji Bakurê Kurdistanê ye kir hedef. Di êrişê Ferhat birîndar bû. Piştî vê êrîşê di 17’yê îlona 2021’an de Endamê Komîteya Malbatên Şehîdan a PKK’ê Yasîn Bulut ê bi nasnav Şukrî Serhed li bajarê Silêmaniyê bû hedefa guleyên endamên MÎT’a dewleta Tirk a dagirker û di êrişê de şehîd bû.
Li gorî zanyariyan, kesên ku êrîşî Şehîd Şukrî kirine 4 kes in, yek ji vana gulebaran kiriye, yên din li derdorê bûne û piştî gulebaranê bi seyareyek tîpa pikap a Toyota ber bi Hewlêrê ve revîne. Tevî ku di nava Silêmaniyê de ewqas kamareyên çavdêriyê û nuqteyên kontrolê hebûn, ti astengî li pêşiya wan nehatiye çêkirin. Polîsan ji bo girtina bikujan û belgeyan tenê serî li cihê bûyerê dane.
Piştî bûyerê, di demek kurt de, Komîteya Malbatên Şehîdan a PKK’ê şehîdbûna Şukrî Serhed eşkere kir û diyar kir ku ew êriş ne tenê li dijî PKK’ê ye, li ser tevahiya xelkê Başûrê Kurdistanê ye û aramiya Silêmaniyê ye.
Di heman demê de Koma Civakên Kurdistanê (KCK) ragihad ku divê ew kesên ku fermana êrişê dane û yên êriş pêk anîne werin cezakirin.
Cîgirê Serokê Hikumeta Herêma Kurdistanê Qubat Talebanî li ser qetilkirina şoreşgerê Kurd Şukrî Serhed ku li Silêmaniyê ji aliyê MÎT’a Tirkiyeyê ve hat kuştin got; “Kujerên Şukrî Serhed bigrin û radestî dadgehê bikin.”
Di heman demê de Tevgera Goran bûyerek weke kiryarek ‘Terorîstî’ bi nav kir û ragihand: “Ev bûyer terorîstiye û aramiya bajarê Silêmaniyê dehef digire. Bila aliyên peywendî bi sûc re hene bigihîn cezayê xwe.”
Qonaxa piştî bûyerê
Li ser nerazîbûnan Rêveberiya Giştî ya Dije Terora ya girêdayî YNK’ê heman rojê (17 îlonê) daxuyanî da û ragihand ku derbarê bûyerên di nava 2 rojên dawî de li Silêmaniyê qewimîne, agahiyên girîng bi dest ketine. Dije Terorê diyar kir ku heya bûyer baş bê zelalkirin û piştrastkirin, ewê hemû agahiyên pêwîst bi raya giştî re parve bikin. Lê hîn ji raya giştî re nehatiye parvekirin.
Roja 18’yê îlonê sere sibehê jî dezgeha Zanyarî û Asayîşa Silêmaniyê daxuyaniyek hevpar dan û diyar kirin ku êrîşên 16 û 17’yê îlonê ji aliyê yek kesî hatine pêkanîn û ew kes hatiye girtin. Wêneyên kesê hatiye girtin jî hatin parvekirin. Lê piştre çavkaniyên nûçeyan, red kirin ku ew kes tawanbarê sereke be.
Di ser şehîdxistina Şukrî Serhed (Yasîn Bulut) re 40 derbas bû. Lê “agahiyên pêwîst” ku dihat gotin wê werin parvekirin, nehatin eşkerekirin. Kujer jî hîn nehatine girtin û radestî yasayê nehatine kirin.
Li gorî xuya dike, plangeriyek mezin bû ku armanca wê alozkirina rewşa Silêmaniyê û têkdana yekrêziya mala Kurdan bû. Herwiha Silêmaniyê mîna Hewlêrê lê bikine bû. Ji bo ku ji bername û planên dewleta Tirk re zemîn xweş bibe.
PKK’ê jî di daxuyaniya xwe de eşkere kir ku êriş ne tenê li dijî PKK’ê ye, li dijî Silêmaniyê ye û armanca wê têkdana aramiya Silêmaniyê ye.
Li gorî çavdêran, dewleta Tirk dixwaze Silêmaniyê ji xwe re weke Hewlêrê bike navend ya MIT’ê û bi vê rê jî zextê li PKK’ê bike û planên xwe yên li dijî pêk bîne.
Eşkerenekirina tawanbaran û nezalal kirina bûyerê jî peywendî bi piştdereya armanca bûyerê re heye. Lewma hewl didin bû dosyayê bigirin.
Li Silêmaniyê zêdetirî sê heftene her roja Înê li cihê bûyerê bi çalakiyan daxwaz dikin ku bûyer were zelal kirin û biryare heta ku neyê zelal kirin çalakî berdewam bike.
ÇAVKANÎ-ROJNEWS
