NAVENDAN NÛÇEYAN – Fermandariya YJŞ’ê Fermandara YJA-Starê bibîr anî û ragihand ewê ji bo bîranîna rêheval Şîlan, artêşa YBŞ-YJŞ’ê mezin bikin. YJŞ’ê di daxuyaniya xwe de ewê bi ruhê Şîlanan peymana 9’ê Cotmehê vale derbixin.
Yekîneyên Parastinê Jin ên Şengalê (YJŞ) bi daxuyaniyeke nivîskî Fermandara YJA-Starê Taybet Bîlen bi nasnav Şîlan Goyî ku 8’ê Cotmeha 2021’ê di êrişa hewayî ya dewleta Tirk a dagirker de şehîd bûbû bibîr anî û ji malbat, gelê Kurdistanê û hemû hevrêyên wê sersaxî xwest.
Daxuyaniya YJŞ’ê bi vî rengî ye:
“Me şahadeta şoreşger û fermandara mezin rêhevala Şîlan Goyî bi xemgînî û dil giraniyek mezin bihîst. Di serî de li beranberî şoreşgera mezin rêhevala Şîlan em bejna xwe ditewînin, bi rêzdarî bibîr tînin û ji bo malbata wê, hevalên wê yên têkoşîna azadiyê û ji bo hemû gelê Kurdistanê sersaxî dixwazin.
Hevala Şîlan ji bo rizgarkirina Şengal’ê heya dawî bi vîna xwe ya bilind û bi fedekartiyek mezin peşengî kir û ji bo rizgarkirina Şengalê misoger bibe û rêxistina wê ava bibe rolek girîng lîstiye. Ezmûnên ji çiya girtibû û beşdarbûna wê ya di şerê li Rojava, taybet şerê li Kobanî de birêve biribû, ew gerîlatiya bajêr û çiya di nava Şengal’ê de, da teyîsandin. Di vê erdnîgariyê de bi awayek serketî rola xwe lîst û piştî xwe vekişandina HPG-YJA Starê ji Şengalê derket. Hevalên mîna hevala Şîlan parastina cewherî ya civakê û artêşbûyîna jin bi me da naskirin û hişt ku em jî artêşa xwe di nava Şengalê de ava û bihêz bikin. Me di saya milîtantiya Şîlanan de hêza jina APO’yî nas kir. Me di şexsê wê de fermandariya jin ya pêşeng nas kir.
Ji ber hevala Şîlan dilsozê azadiyê bû bi vî rengî hevala Şîlan li Şengalê bû navê jina pêşeng û bû nasnameya jina azad. Gav avet ser erdnîgariya pîroz û ew bi meşa xwe ya bi heybet bi hevalên xwe yê Apoyî bi hevre ev ax ji dagirkerî û îxanetê paqij kirin û pîrozahiya vê axê parastin. Bi beşdarbûna giranbuha ev erdnîgarî hîn bêhtir pîroz kirin. Di saya rastiya şehîdan de Şengal kete nava guhertin û veguhertinên mezin. Li ser vê axa pîroz hevala Şîlan bi heval Mam Zekî, Mam Beşîr, Zerdeşt Şengalî, Dilşêr Herekol, Rosyar, Şayan û Melsa re rêhevaltî kir û bi hevre erk û barê azadiyê hilgirtin.
Hevala Şîlan tenê ji bo me Êzîdiya kar nekir. Li her çar parçeyên Kurdîstanê pêşengtiyek bi hêz û bi rûmet kiribû. Ew da nîşandan ku ger jinek bi rastiya Apogerî xwe çêbike çiqasî dijwar e û çiqasî dikare ji bo pirsgirêka dagirkeriyê re bibe bersiv. Di heman demê de di şexsê xwe de dikare polîtîkayên dagirkeriyê vala derxîne û ji bo gel, bawerî û giştî civakan re bibe hêza çareseriyê.
Hevala Şîlan ji emre xwe yê biçûk heya ciwantiya xwe bi rastiya azadiyê pijiyabû. Bi vîna xwe yê mezin, bi hezkirina xwe ya jin, azweriya xwe ya gerîlatiyê, dijwariya xwe ya têkoşînê ewê her dem ji bo me bibe mînak. Rastiya hevala Şîlan ji bo me hemûyan bûye çavkaniya hêz, hêvî û baweriyê.
Şengal dêyndarê van şehîdên mezin e. Bîranîna hevala Şîlan ji bo artêş û rêxistina me ya Şengalê wê bibe ronahî. Emê ji bo bîranîna Rêhevala Şîlan artêşa YBŞ-YJŞ mezin bikin. Têkoşîna ku dabû meşandin heya dawiyê emê bibin şopdarê wê. Li ser vê esasî ew xeyala hevala Şîlan ya Şengala xweser û azad re emê bibin bersiv û ji bo pêkanîna vê bendewariya wê em soza serketinê didin. Emê bi ruhê Şîlanan peymana 9’ê Cotmehê vala derxînîn. Carekî din ew jina şoreşger em di bilindiya têkoşîna xwe de bibîr tînin. Bersiva me ji rastiya şehîdan re, bilindkirina têkoşînê di pêşengiya Rêber APO de ye û wê soz û girêdanbûna me wê avakirina jiyanek birûmet, biwate û azad be.”
