NAVENDA NÛÇEYAN
Eger li Garê bi ser ketibûna, ew ê di demek kurt de çûbûna hilbijartina giştî ya pêşwêxt. Lê weke hat xuyakirin û R.Erdogan bi xwe jî mikur hat ku bi binketin.
Lê ev mirov rihet ranaweste. Weke marê dar li serî ketibe, ew ê ji berê bêhtir bibe êrîşkar.
Berê hinek bi şêwir û bi amadekerî siyaseta xwe ya qirêj dimeşand. Bêguman armanca wî ya sereke, bi giştî têkbirina Tevgrra Azadiyê bû, her wiha di heman çarçovê de bi taybetî jî HDP, HDK û sazî, dezgeh û rêxistinên di heman qadê de bû. Hema niha di ser 10 hezar kesî re, rêveber û endamên çalak ên van tevgrr û rêxistina girtîne.
Lê ev tenê têra serkeftina wan a hilbijartinan nake. Lewma diviya bû, hinek pêngavên dengvedanên mezin bide û bandora giran li ser civakê bike çêkiriban.
Weke mînak Ayasofya guhett kir mizgeft. R.Erdogan gelek kir qîrin û hawar, lê ew bersiva dixwest nestand. Dibe ku ziyana wî ji qezenca wî pirtir çêbû.
Li pev vêna dest bi lêgerîna xazê ya nava deryaya Spî û deryaya Reş kir. Diyar e dizanibû ji deryaya Spî nikare tiştekî bi dest bixe, hema bi lezgînî mizgîniya dîtina xaza li deryaya Reş, bi dengekî bilind qîriya. Medya wî, heyvekî her roj propaganda vê xazê kir. Ji deryaya Spî hate vegerendan û mizgîniya wî deryaya Reş jî hate jibîrkirin; bû nêzî salekê ye kes behsa wê jî nake.
Bala xwe dayê ku van gotin û mizgîniyên wî pere nekir û pûç derketin. Jixwe ew lez û bez û êrîşên wî yên welatan ên Lîbya, Azerbeycan û yên din hemû beravêtî bûn û beravê çûn.
Îja weke mînaka wî birayê derewçînê mezin, li derevek mezintin ji ya birayê xwe geriya û got “wele min dît îro dengê cewrikê kûçika li ezmana dihat”!. Civat hemû pê keniya, dîsa birayî wî yê navdar bi derewan ew ji wê şermê rizgar kir.
Em bala xwe didin R.Erdogan jî hema weke wî birayê derewîn kir û got “ez mizgîniyê didim we em ê di sala 2023’an de biçin ezman”! Ev derewa wî ji ber ku hîn nû ye jî lê diyar dibe ku kes jê bawer nake. Birayê wî yên wî rizgar bike jî nîne, yê wê çawa bibe? Li aliyê din, milet birçiye û ji wî nan dixwaze, neçûna ezman, ezman zikê milet têr nake. Her wiha bexşîşên wî yên çaya kêfê jî milet êdî qîma xwe pê naynin!
Dît ku ev jî bi kêr nehat, dîsa hêviya wî ma ji êrîşên li ser kurdan û hema got “roja çarşemê teqez min guhdar bikin ez ê mizgîniyek hêja bidim we”!
Roja çarşemê hat, lê tu mizgîniya xêrê nehat, ew gotina xwe ya çarşemê jî nekir û deng jê derneket. Lê me dît, roja çarşemê dengê êrîşa ser Garê hat, erê wan encam nedigot, wisa diyar bû ku agahiyê wî jê hebû ku bernameya wî, weke dilê wî nameşe û ew ê nikaribe encama ku ew dixwaze bistîne, lewma mizgîniya xwe ya roja çarşemê betal kir.
Weke hat zanîn, li Garê şikestinek dîrokî xwar. Gerîla careke din wî ruhê xwe yê şoşergerî, wê îradeya xwe Apoyî û wê berxwedana xwe ya lehengî raxist ber çavan. Careke din mirazê R.Erdogan, Bahçelî û hevalbendên wan di qirika wan de hişt. Berovajî wî, şûna wî, gerîlayên azadiya Kurdistanê, mizgînî dan gelê xwe û hezkiriyên xwe yên cîhanî û di asta cejnekê de, bi vê serkeftina bi rûmet ew xelatdar kirin!
Weke di destpêkê de hat gotin, mîna marê birîndar, bê hiş û îrade vir de û wir de baz dide. Ji alîkî ve xwedê giravî şîna şehîdê xwe digerîne, lê dayikên şehîdên xwe jî, ji bo serkeftina hilbijartinên xwe bi kar tîne û li gel vêna dikeve nava nakokiyan; bi ken û helwestên xwe yên ne li rê, xwe kiriye pêkenînê gel.
Helbet mirovên wisa her dem dikarin hovîtî û hartiyê bikin û êrîşî hinek deverên din jî bikin, jixwe behsa êrîşkirina Şingalê, Mexmûrê yan hinek herêmên din ên Rojava û hwd. tên kirin.
Ji ber ku hilbijartina asayî ya 2023’an, ne li berjewendiyên wî ye, li gor zagonê nikare careke din bibe berendamê serokdewletê. Lewma divê şert û mercan ji bo hilbijartinek pêşwext biafirîne. Heta ku ji destê wî were, ew dev ji planên qirêj bernade. Lê wisa diyar dibe ku her diçe, şert û merc li dijî armancên wî yên serokdewletiyê bi pêşve dikeve.
ÇAVKANÎ: Rojnameya Welat – Ahmet Aktaş
