DÊRÎK
Tevgera Ciwanên Şoreşger û Yekitiya Jinên Ciwan ên Dêrikê ji bo şermezarkirina êrişan xwepêşandanek li dar xistin û banga serhildanê li dijî dagirkeran kir.
Ciwanên navçeya Dêrikê li Qada Azadî kom bûn û bi dirûşma “Na ji dagirkeriyê re, dem dema tolhildanê ye, teqez em ê bi ser kevin” dest bi xwepêşandanê kirin. Ciwaan sloganên şermezarkirina êrişên dewleta Tirk li dijî herêma Garê û silavkirina berxwedana Hêzên Parastina Gel (HPG) berz kirin.
Xwepêşandan li çerxerêya Şehîdan a Dêrikê veguherî mîtîngê. Di mitîngê de bi navê Tevgera Ciwanên Şoreşger û Yekitiya Jinên Ciwan Çekdar Amed daxuyanî da.
Di daxuyaniyê de hate gotin ku dewleta Tirk a faşîst bi hevkariya Partiya Demokrat a Kurdistanê (PDK) bi dijwarî êrişî herêma Garê û Hêzên Parastina Gel (HPG) dike.
Her wiha hate destnîşankirin ku Tevgera Ciwanên Şoreşger û Yekitiya Jinên Ciwan amade ne tev li berxwedana Garê û gerîlayên HPG`ê ya li dijî planên dewleta Tirk a faşîst bibin.
Di dawiya daxuyaniyê de bang li hemû hêzên Kurdistanê, gelê Kurd û gelên herêmê hate kirin ku li hemberî hovîtiya delweta Tirk û êrişên wê yên li dijî çiyayên Kurdistanê û Herêmên Parastinê yên Medya serferberiyê ragihînin.
Piştî daxuyanî bi dawî bû, bi navê dayikên şehîdan û şêniyên Dêrikê Xalsa Abdullah wiha axivî: “Em berxwedana HPG`ê pîroz dikin. Em êrişên dewleta Tirk a dagirker ên li dijî herêm û çiyayên Kurdistanê şermezar dikin. Em fedekariyên ciwanên gelê xwe li dijî planên li ser gelê Kurd bi nirx dibînin. Em soz didin şervanên xwe ku em ê ji bo bidawîkirina planên dagirkeriya Tirk, xwedî li wan derkevin.”
Xalsa bêdengiya navneteweyî ya li hemberî sûcên dewelat Tirk a dagirker ên li dijî herêmên Bakur û Rojhilatê Sûriyê û çiyayên Kurdistanê şermezar kir.
Çalakî bi sloganên silavkirina berxwedana HPG`ê û şermezarkirina dagirkeriya Tirk bi dawî bû.
GIRKÊ LEGÊ
Artêşa Tirk a dagirker ji duh bi şev ve êrişî herêma Garê û Herêmên Parastinê yên Medyayê dike. Di vê çarçoveyê de Tevgera Ciwanên Şoreşger a Girkê Legê daxuyaniyek da û serferberî ragihand.
Bi dehan ciwan û şêniyên Girkê Legê li Qada Şehîd Xebat kom bûn. Piştre bi navê Tevgera Ciwanên Şoreşger Rîhan Temo daxuyanî da. Di daxuyaniyê de wiha hate gotin: “Komployên li dijî gel û herêmên me berdewam in. Êrişên ku ji duh ve berdewam in, berdewama wan komployan e û hemwextî salvegera Komploya Navneteweyî ya li dijî rêber Abdullah Ocalan e pêk tên.
Ev êriş di çarçoveya lihevkirinên di navbera AKP`ê û PDK`ê de pêk tên. Ev yek îsbat dike ku komployeke mezin li dijî gelê Kurd tê meşandin.”
Li gel hewldanên pêkanîna yekitiya Kurdî, PDK`ê bi dijminê gelê Kurd re kar dike. Em bang li gelê xwe dikin ku ji bo azadiyê û neteweya demokratîk li ber xwe bidin.”
Di dawiya daxuyaniyê de ji bo bersivdayîna êrişên dewleta Tirk a dagiker li dijî herêma Garê seferberî hate ragihandin.
TIRBESPIYÊ
Yekitiya Ciwanên Şoreşger a Sûriyê û Yekitiya Jinên Ciwan ên navçeya Tirbespiyê ya kantona Qamişlo meşeke meşaleyan li dar xist û êrişên dewleta Tirk a dagirker ên li dijî herêmên Bakur û Rojhilatê Sûriyê û herêmên Parastinê yên Medyayê, şermezar kirin. Bi dehan şêniyên navçeyê tev li meşê bûn.
Meş ji ber avahiya Nivîsgeha Partiya Yekitiya Demokratîk (PYD) ya li rojhilatê navçeya Tirbespiyê destpê kir. Beşdarên meşê sloganên li dijî dewleta Tirk a dagirker berz kirin.
Meş rojavayê navçeyê veguherî mîtîngê. Di mîtîngê de endamê rêveber ê ciwanên PYD`ê Ehmed El-Hewar axivî û destnîşan kir ku êrişên dewleta Tirk a dagirker di çarçoveya siyaseta Komploya Navneteweyî de pêk tên.
El-Hewar piştrast kir ku ciwan dê têkoşîn û berxwedana li hemberî dewleta Tirk a dagirker berdewam bikin.
Meş bi sloganên şermezarkirina êrişên dewleta Tirk a dagirker ên li dijî Herêmên Parastinê yên Medyayê bi dawî bû.
ÇILAXA
Bi heman armancê, bi dehan ciwanên şoreşger û endamên Yekitiya Jinên Ciwan ên navçeya Çilaxa meşek li dar xistin.
Beşdarên meşê li rojavayê navçeyê kom bûn û dest bi meşê kir. Ciwanan meşale rakirin û li dijî dewleta Tirk a dagirker û Komploya Navneteweyî ya li dijî rêber Abdullah Ocalan slogan berz kirin.
Meş li çerxerêya Şehîd Masûm a li navarasta navçeyê veguherî mîtîngê. Li wir endamê ciwanên PYD`ê Sirûr El-Şetî axivî û diyar kir ku bêdengiya navneteweyî û berdewamkirina komploya li dijî gelên herêmê, rê li pêşiya dewleta Tirk vedike ku herêmên din dagir bike.
El-Şetî piştrast kir ku li hemberî wan êrişan îsrara gelên herêmê zêde dibe û wekî ciwan ew amade ne xwe di oxira welatê xwe de feda bikin.
MINBIC
Bi heman armancê, Tevgera Ciwanên Şoreşger û Yekitiya Jinên Ciwan ên Minbicê û gundewarên wê daxuyaniyek dan raya giştî. Ciwanan gefên dewleta Tirk ên li dijî Bakur û Rojhilatê Sûriyê û Başûrê Kurdistanê şermezar kirin.
Hevserokê Tevgera Ciwanên Şoreşger a Minbicê û gundewarên wê Ehmed El-Cemîlî daxuyanî xwend. Endamên tevgerê û Yekitiya Jinên Ciwan li Stada Beledî ya li bajêr kom bûn.
Ciwanan komplo û gefên dewleta Tirk ên li dijî Başûrê Kurdistanê û Bakur û Rojhilatê Sûriyê şermezar kirin. Her wiha destnîşan kirin ku ev êriş hemwextî salvegera Komploya Navneteweyî ya li dijî rêber Abdullah Ocalan e pêk tên û armanca wê ew e ku komployê vejînin, ji ber ku komplo ne tenê li dijî rêbertî bû lê belê li dijî tevahiya gelên azadîxwaz û demokrat e.
Ciwanan dewletên ku destên wan di êrişên faşîst ên li dijî vîna mirovên azad de hene, şermezar kirin.
Ciwanan her wiha destnîşan kir ku dê li hemberî van êrişan û gefan bisekinin û gotin: “Ji bo parastina tevahî mirovahiyê, em ê li eniyên pêş cih bigirin.”
REQA-Ciwanên Reqayê li dijî êrîşên dagirkeriya Tirk ya li ser herêma Garê daxuyaniyek dan.
Daxuyaniyê de ciwanan diyar kir ku ew wek ciwanên Ereb û Kurd li dijî dagirkeriya dewleta Tirk bêdeng namînin û ew amadene kû li bangawaziya seferberiyê berê xwe bidin Garê.
