Navenda Nûçeyan
Li qirkirinên xwezayê yên dewletê her roj zêde dibin. Talankirina xwezaya heremê di çarçoveya polîtîqayên şerê taybet de tê meşandin. Bi her awayî talan û texrîpkirina xwezaya li heremê didome. Li çiyayên Cûdî, Gabar û Bestayê ji aliye leşkeran ve 4 mehan daristan hatin şewatin. Di encama şewatê de qadên mezin ên daristanan şewitîn û hemû zindiyên li xwezayê bi vê şewatê re hatin tunekirin. Di çarçoveya talankirinê de niha jî ajalên heremê hedef tên girtin.
Li gorî agahiyên ji çavkaniyên xwecihî hatin girtin, bi destên cerdevanên bajarokê Sêgirikê ya navçeya Qilebana Şirnexê, li Çiyayê Cûdî, herema Bestayê pezkovî tên qetilkirin. Çavkaniyên xwecihî îddîa kirin ku di navbera mehên mijdar û kanûnê de heta niha zêdetirî 500 pezkovî ji aliyê cerdewanên Sêgirkê ve li heremê di bin navê ‘çavdêrî û lêgerînê” de hatine qetilkirin. Çavkaniyan destnîşan kir ku cerdevanên destûrê ji qereqola Sêgirkê dixwazin, diçin pezkoviyan qetildikin û ji aliyê rayedaran ve jî tu ceza li wan nayê birîn.
Her wiha hat destnîşankirin ku kewên gozel ên nivşên wan li ber windabûnê ne û gelek masî jî li Çemê Hêzilê bi ceyran û bombeyên destan ji aliyê cerdevanan ve hatine qetilkirin. Welatiyên Sêgirkê bertek nîşanê qetilkirina ajalan dan û xwestin ku cerdevan bên cezakirin.
Welatiya Sêgirkê û Hevseroka HDP’ê ya berê ya Şirnexê Zeynep Unat, anî ziman ku dewlet li Kurdistanê li dijî kurdan û xwezaya wan bi salan êrîş dike û got: “Di bin navê ewlehiyê de daristanên me bi destên leşkeran tên şewitandin. Darên me jî ji aliyê cerdevanan ve tên birin. Ev hemû jî bi destên cerdevanên heremê tên kirin. Bi van êrîşan dixwazin xweza û axa me tune bikin. Bi vê talankirinê dixwazin me kurdan bê ax û xweza bihêlin. Li heremê nêzî 4 mehan şewatê berdewam kir û hemû rayedaran ev şewatê piştgûh kir. Kesî guh neda gundî û şêniyên li heremê. Ev êrîş bi destên dewletê û bi zanebûn tên kirin.”
‘Zêdetirê 500 pezkovî hatin qetilkirin’
Zeynep wiha axaftina xwe domand: “Li heremê di bin navê ‘çavdêrî û lêgerînê’ de zêdetirê 500 pezkovî hatin qetilkirin. Ev pezkovî jî ji Çiyayê Cûdî, herema Besta û li gundê Sinah ê girêdayê Zaxoyê tên. Bi qetilkirina pezkoviyan dixwazin welatên me bê ajal bihêlin û xwezaya me tune bikin. Ji ber ku pezkovî jî parçeyek ji xwezaya me ne. Her wiha bi avabûna pergala cerdevaniyê re li bajarokê me gelek kewên gozel ku neslê wan li ber tunebûnê ye hatin qetilkirin. Niha hejmara kewên gozel li heremê gelek kêm bûne û wek berê ne zêde ne. Ne bi tenê kewên gozel, her wiha masiyên di avê de jî tên qetilkirin. Li Çemê Hêzil ê di navbera gundên Bilika û Avyanê de ye bi jeneretorê û bombeyên destan gelek masî hatin qetilkirin.”
‘Kesên ku pezkoviyan qetil dikin bila bên cezakirin’
Zeynep, di berdewamiya axaftina xwe de got kesên ku xwezaya wan talan kirine niha jî ajalên li heremê qetil dikin û wiha bang li gel kir: “Li dijî talankirina xwezayê û qetilkirina ajalan em bêdeng nemînin. Divê em li hember van pêkanînan dengê xwe bilind bikin. Em naxwazin xwezaya me bê talankirin. Kesên ku vê komkujiyê dikin bi awayek kêyfî dikin. Cerdevanên diçin li heremê ji qereqolê destûrê dixwazin û ajalan qetil dikin. Kesên ku van ajalan qetil dikin nayên cezakirin. Di her aliyî de xweza tê talankirin û tu tişt nayê kirin. Ajal jî parçeyek vê xwezayê ne. Divê em xwedî li xwezaya xwe derbikevin. Ger ku em bêdeng bin dê rewş xiraptir bibe. Kesên ku pezkoviyan qetil dikin bila bên cezakirin. Di her aliyê de li dijî xwezayê êrîş tên kirin. Dixwazin xwezaya Kurdistanê jî tune bikin. Îro ne bi tenê li vir her wiha li gelek bajarên Kurdistanê jî pezkovî tên qetilkirin. Bi polîtîkayê pêş dixin her carê qirkirinekê dikin û niha jî ajalan qetil dikin.”
‘Em bêdeng nemînin’
Kesa ku nexwest navê xwe bide, bertek nîşanê qirkirina xwezayê û ajalan da û got,” Kesên pezkoviyan qetil dikin tên parastin.Bila destên xwe ji xwezaya me bikşînin. Xweza jiyan e. Ger ku xweza bê tunekirin û talankirin jiyan jî dê tune bibe. Ji ber ku çiyayên me ji aliyê leşkeran ve hatin şewitandin bi sedan darên me yên fêkî hatin tunekirin. Kesên ku daristanên me şewitandin û darên me birîn niha jî ajalên me qetil dikin. Di bin navê ‘lêgerîn û çavderiyê’ de di navbera mehên Mijdar û Kanûnê de nêzî 500 pezkovî hatin qetilkirin. Ev qetilkirin îro jî berdewam dike. Li herema me ne tenê pezkoviyan hemû ajalan qetil dikin. Em bang li hemû kesan dikin ku xwedî li daristan û ajalên li herêm derkevin. Kesên ku pezkoviyan qetil dikin cerdevanin û ew jî bi destûra dewletê vê dikin. Em bêdeng namînin. Xwezaya me li ber qirkirinê ye. Xwezaya me hatiye talankirin. Li hember vê qetilkirinê em ê dengê xwe bilind bikin.”
ÇAVKANÎ: WELAT
