BEHDÎNAN – Navenda Ragihandin û Çapemeniyê ya HPG’ê têkildarî gerîlayên li Cîlo şehîd bûn daxuyaniyek da.
Daxuyanî wiha ye:
“Di daxuyaniya xwe ya 13’ê Îlonê de me ragihandibûn ku 9’ê Îlonê saet di 12.30’î de artêşa Tirk a dagirker piştî ku bi balafirên şer û helîkopterên êrişê bombe li qada Îsmaîl Aga ya herêma Çiyayê Sumbulê ya Colemêrgê barand, hêzên xwe bi helîkopterên bi tîpa Skorsky li herêmê danî û dest bi operasyonekê kir. Me diyar kiribû ku di vî şerî de hevrêyên me Çekdar, Dilovan û Ronahî yên li dijî artêşa Tirk a dagirker bi lehengî şer kirin, şehîd bûn.
Agahiyên li ser nasnameya hevrêyên me yên şehîd bûne wiha ne:
 |
Nasnav: Çekdar Amed
Nav paşnav. Azad Şik Cihê jidayikbûnê: Amed Dayik-Bav: Hanim-Hasan Dem û cihê şehadetê: 9’ê Îlona 2020 / Colemêrg |
 |
Nasnav: Ronahî Rûken
Nav paşnav: Şehrîban Hêja Ûzûn Cihê jidayikbûnê: Erzîrom Dayik-Bav: Necla-Şakir Dem û cihê şehadetê: 9’ê Îlona 2020 / Colemêrg |
 |
Nasnav: Dilovan Kobanî
Nav paşnav: Omer Oso Dayik-Bav: Makbûle-Alî Dem û cihê şehadetê: 9’ê Îlona 2020 / Colemêrg |
Hevrêyê me Çekdar li navenda berxwedanê ya Kurdistanê li Amedê ji dayik bû û di ciwantiyê de tevlî karên ciwanan bû. Hevrêyê me Çekdar ku bi kevneşopiya berxwedanê mezin bû, lêgerîna xwe ya li azadiyê ti carî ranewestand. Hevrêyê me ku sala 2013’an tevlî nava refên Gerîlayê Azadiyê yên Kurdistanê bû, zû xwe bi pêş xist û li dijî dagirkeran timî li refên herî pêş cih girt. Demeke dirêj li cografya dijwar a Zagrosan gerîlatî kir, bi kedkarî û dilnizmiya xwe dihate naskirin. Hevrêyê me ku di temenê ciwantî de pispor bû û bû fermandar, di şerê me yê azadiyê de bi rola pêşengiyê rabû. Bİ kesayetiya xwe ya têkoşer her tim sekneke milîtanî ya Apoyî ya mînak nîşan da.
Hevrêya me Ronahî ku li Erzîromê ji dayik bû, li gel polîtîkayên înkar, tunekirin û asîmîlasyonê yên dewleta Tirk a dagirker ên li warê wê, bi cewhera xwe ve dilsoz ma û ji bo bersivê bide êrişên dagirkeriyê tevlî nava refên Gerîlayên Azadiyê yên Kurdistanê bû. Hevrêya me bi hêrsa xwe ya mezin a li dijî mêtingeran, veguherand çavkaniya têkoşînê. Hevrêya me Ronahî ku di xeta Têkoşîna Azadiya Jinê de kûr bû, li çiyayên Kurdistanê bi nasnameya jina azad xwe ji nû ve afirand, di temenê ciwantî de bû fermandar û milîtaneke jinên ciwan a pêşeng a têkoşîna me.
Hevrêyê me Dilovan ku li Kobanê ji dayik bû, li nava malbateke dilsozê nirxên gelê me û welatparêz mezin bû. Bi rengekî çalak tevlî şoreşa azadiyê ya li Rojava bû û dît ku heta çar parçeyên Kurdistanê jid agirkeran neyê paqijkirin azadiya gelê me pêk nayê. Bi vê bîr û baweriyê tevlî nava refên gerîla bû û şerê xwe yê li dijî dagirkeran gihand asta herî bilind. Hevrêyê me Dilovan bi kesayetiya xwe ya milîtan, bi hezkirin, hurmet û kedkariya li pêşberî hevrêyên xwe her tim li pêş bû.
Di serî de malbatên hêja yên hevrêyên me yên şehîd bûne malbatên hevrê Çekdar, Ronahî û Dilovan em sersaxiyê ji tevahiy gelê Kurdistanê yê welatparêz re dixwazin û soz didin ku em ê ala azadiyê ya şehîdên xwe yên leheng bi ser bixînin.”
