BEHDÎNAN – Koordînasyona PAJK’ê li ser şewata li Girava Îmraliyê derket daxuyaniyek weşand.
Daxuyaniya PAJK’ê wiha ye:
“Bi komploya navneteweyî re 21 sal in di şexsê Rêberê me gelê Kurd, gelên herêmê û jin bi rengekî mutleq tecrîdkirî ne. Hate eşkerekirin ku li Girava Îmraliyê şewat derketiye ku Rêberê me û hevrêyên wî lê ne.
Girava Îmrali ji 15’ê Sibata 1999’an û vir ve veguheriye girtîgeheke taybet. Polîtîkayên li Girava Îmraliyê tên meşandin hemû di encama biryarên hevpar ên hêzên komploger ên navneteweyî de bi destê dewleta Tirk tên meşandin.
Dewleta Tirk li herêmê ketiye nava lîstikên gelekî metirsîdar. Ji bo bandorê li herêmê bike bi hêzên hegemonîk ên navendî re hevkarî kir, bi hêzên dijminên gel ên mîna HTŞ, El Nûsra û El Qaîdeyê re jî hewl da vê hevkariyê bi rengekî hevseng bimeşîne. Li Sûriyeyê, li Lîbyayê şer giran kiriye. Bi parastin û piştgiriya NATO’yê bi gelek komên paramîlîter, dewleta Tİrk kujeriya gelan dike û li dijî gelê Kurd jî bi taybetî dijminatiyê dike.
‘RÊBERÊ ME NÎŞANEYA AZADÎ Û ARAMÎ YE’
Sîstema ku Rêberê me di çarçoveya aştiya bi rûmet, jiyana hevpar û perspektîfa azadiya jinê de destnîşan kir, roj bi roj bala gelên cîhanê dikişîne. Gelên Rojhilata Navîn Rêberê me weke sembola aramî, aştî û azadiyê dibînin. Dewleta Tirk jî ji bo fetisandina daxwaza azadiyê ya gelên bi îradeya azad û tecrîdkirina gelan, dixwaze ji Rêberê me tolê hilîne. Ev helwesta dijminane ya dewleta Tirk ji ber dijminatiya xwe ya li demokrasiyê û dijminatiya xwe ya li jiyana bi rûmet e. Ji ber vê yekê tecrîdê li Îmraliyê giran dike û bi her rengî êrişan dike.
‘ŞEWAT TESADÛFÎ NÎNE!’
Di vê pêvajoyê de ku sîstema cîhanê ji aliyê tenduristiyê, şer, mirin û aborî ve işaretê bi krîzan dike, şewata li Girava Îmraliyê tesadûfî nîne. Li Girava Îmraliyê, ku derfetên wê hemû yan jî bêderfetiyên wê hemû di bin kontrola dewleta Tirk de ye û ji aliyê navenda şerê taybet ve tê birêvebirin, şewat ji aliyê kê ve ji bo çi çawa hate derxistin? Di demsala zivistanê de li wir çima şewat derket? Ji sîstema li wir dewleta Tirk û hêzên navneteweyî yên ew sîstem ava kirine berpirsyar in.
‘DIVÊ TAVILÊ HEVDÎTIN BÊ KIRIN’
Rewşa tenduristiyê ya Rêberê me çawa ye, şewatê bandoreke çawa lê kir? Ji bo hîn bêhtir bersiv ji pirsên bi vî rengî bên dayin divê malbat û parêzerên Rêberê me û CPT teqez hevdîtinê bi Rêberê me re bike.
Dewleta Tirk ku li dijî gelê Kurd qirkirinê dike û bîst û du sal in vê sîstemê dimeşîne, daxuyaniyên xwe yên têkildarî mijarê bêqîmet in. Ji ber vê yekê parêzerên Rêber Apo divê tavilê biçin Îmraliyê. Divê rastî ji gelê me û raya giştî re bê eşkerekirin.
Dewleta Tirk ji bo xwe ji vê rewşa tengavbûyî rizgar bike careke din qerta dijminatiya li Kurdan bi kar tîne. Bi provokasyonên nû eşkere ye ku Rêberê me kiriye hedef. Bi metirsiya li ser tenduristî û jiyana Rêberê me li dijî tegera me û gelê me ketiye nava amadekariyên cuda. Ji ber vê yekê jî divê em bi dirûşma ‘Jiyana bê rêbertî ti carî nabe’ bi berpirsyarî tevbigerin. Divê em ji her şêweyên êrişê yên dewleta Tirk re amade bin û bikevin nava çalakiyan.
‘PARTIYA JINAN WÊ HESAB BIPIRSE!’
Pêr di dema şewata Girava Îmraliyê de Wezîrê Karên Hundir ê faşîst ê Tirk bi daxuyaniyên xwe hewl da partiya me terorîze bike û çalakiyên 8’ê Adarê terorîze bike. PKK partiyeke jinan e û azadiya jinan hemûyan kiriye armanca xwe. Rêberê me damezrînerê vê partiya jinan e, 8’ê Adarê bi xwedîderketina têkoşîna jinên Kurd re bêhtir watedar bû û li Kurdistan, Tirkiye, Rojhilata Navîn û cîhanê têkoşîna azadiya jinê gihand qonaxeke nû. Em vê yekê deyndarê Rêberê xwe ne. Deynê me ye ku em hesabê hemû êrişên li dijî Rêberê xwe bipirsin. Milîtanên me hemû û gelê me ji xwe piştî ku agahî bihîstin dest bi çalakiyan kirin.
‘DEM DEMA MEZINKIRINA ÇALAKIYAN E’
Dem dema mezinkirina çalakiyan e. Heta ku parêzer û malbata Rêberê me neçe Îmraliyê û daxuyaniyê nedin, divê gelê me, dostên me, jin û ciwan ji qadan neçin. Gelê me ji heft heta heftê salî divê li her cihî seferber bibe û heta ku parêzer bi rastiyê hîn nebin ji qadan dernekevin.”
