NAVENDA NÛÇEYAN – Mueyed El Icêlî ji malbata ku ji sedsala borî ve girîngiyê dide çandê. Ji vê malbatê bi dehan rewşenbîr, bijîşk, mamoste û rojnamevan derketin. Di serî de Ebdulselam Icêlî. Heta niha jî navê vê malbatê di nav zarokên wê û şêniyên Reqayê de zindî ye.
Mueyed El Icêlî mala xwe ya li bajarokê Sehil ê başûrê Reqayê veguhast muzexaneyeke gelêrî ku bi vî awayî kultûra şêniyên Reqayê diparêze. Mueyed tiştên kevnar berhev dike û li mala xwe bi cih dike.
Mueyed (40) ji Reqayê ye, li dibistanên bajêr jî mamostetiyê dike. Her wiha karê berhevkirina tiştên antîk û kultûrî jî dike.
Mueyed got “Ez girîngiyê didim her tiştên girêdayî kultûra madî û nemadî, wek stran, adet, çalakî û tiştên kultûrî û antîk. Ew hezkirin û dilxwaziya min e.”
El Icêlî wiha domand: “Ez li maleke wiha mezin bûm ku girîngiyê didin çandê, min gelek tiştên ku dê li malan nedihatin bikaranîn, berhev dikirin û diparastin.”
El Icêlî diyar kir ji zarokatiya xwe ve ew van tiştên dîrokî û kevnar diparêze û bi kesên kesên girîngiyê didin vî yekê jî di nava têkiliyê de ye û got: “Dema ku ez bibînim tiştên wiha kultûrî tê telif kirin an jî pîşeyeke kultûrî winda dibe ez xemgîn dibim.”
Der barê muzexaneya xwe ya biçûk de El Icêlî got: “Gelek tiştên kevnar hene, ji wan ên girêdayî rês, alav û ta, alavên çêkirina qehweya erebî. Her wiha bi sedan kevnareyên baqir hene û hin ji wan heta niha tên bikaranîn wek hawan, qehwedank û destara destan a qehweyê, tasên baqir, alava hevîrtirşikê ya textî.”
El Icêlî wiha li gotina zêde kir: “Li gel min qumaşên ku bi destan li ser hatiye neqşkirin jî hene. Radyo, saetên kevnar, tizbî, kildank, agirpeşk, mizmar, def û neqşên ji zêdetirî 50 salan de hene.”
El Icêlî diyar kir ku hin tişt hene temenê wan digihîje zêdetirî 100 salan, wek qumaşan. Li gel wî bi sedan parçeyên qumaş ên ku bi destan hatine rêsandin hene.
El Icêlî da zanîn ku ew ji bo parastina dîrok û reseniya herêmê van tiştên kevnar berhev dike.
Di dawiya axaftina xwe de El Icêlî bi devoka Reqayê bang li şêniyên Reqayê kir ku van tiştên kevnar biparêzin, ji ber ku yên kevnarên wan tune be, niha û pêşeroja wan jî tune ye û got: “Ev tiştên kevnar nasnameya me ya Reqayê ne.”
