NAVENDA NÛÇEYAN –
Aysel AVESTA nivîsand —
Di 9’ê Cotmeha 2021´ê de careke din dewleta Tirk a dagirker êrişeke nemirovane bire ser taxa Hilêliyê ya bajarê Qamişloyê û di encamê de 3 nefsên malbata Gulo şehîd bûn.
Di 9’ê Cotmeha 2021´ê de careke din dewleta Tirk a dagirker êrişeke nemirovane bire ser taxa Hilêliyê ya bajarê Qamişloyê û di encamê de 3 nefsên malbata Gulo şehîd bûn. Di nava şehîdan de sembola welatparêzî û kedê Apê Ûsiv ê 83 salî jî hebû. Li gel Apê Ûsiv 2 neviyên wî, Mihemed û Mazlûm jî hebûn.
Hedefgirtina ferdên malbata Gulo bê guman ne tesadûf e. Malbata Gulo ji destpêka şereşa Kurdistanê ve bi xebat û têkoşîna xwe ya giranbiha û di oxira azadiyê de gelek berdêlên giran dane. Beriya Şoreşa Rojavayê Kurdistanê û piştî ku Şoreşê dest pê kir, Mala Gulo bi piçûk û mezinên xwe ji bo azadiyê cihê xwe lli her warî girt û tevlî xebatan bû. Ew bi xebat û têkoşîna xwe di nava gelê xwe de bûn mînak û ji bo neyarên xwe jî bûn kelem. Ji lewma bû hedefa dijmin û xayinan.
Ev komkujiya bi serpereştiya Erdogan, ne cara yekê ye ku li dijî pêşeng û nirxên gelê Kurd pêk tê. Ev êrişên li dijî sivîlan, têkçûna siyaseta rejîma Tirk nîşan didin. Ji wan êrişên çavsor ên dewleta Tirk jî diyar e ku ev rejîm pirr xirab xitimiye û êdî hew dikare hêzên navneteweyî bi derewên xwe qanih bike. Ji ber ku gelek caran ji bo têkbirina destketiyên Rojava soz da, lê sozên xwe nebirin serî.
Heta dawî piştgirî da çeteyên DAIŞ’ê û ew bi ser gelan de ajot, lê ti encam bi dest nexist. Ji lewma, niha ew bi xwe ketiye dewrê. Ji Herêmên Parastinê yên Medyayê heta bi Şengal, Mexmûrê, ji Amedê heta bi Qamişloyê, wê êrişên bi armanca qirkirin û dagirkerinê dane destpêkirin. Di êrişên leşkerî yên li dijî Bakur û Rojhilatê Sûriyê de li berxwedaneke mezin qelibî û ti encam wernegirt. Niha jî bi têknîka xwe ya pê bawer û balafirên bê mirov dest bi êrişan kiriye. Beriya bi çend hefteyan li Kobanê 2 êriş li ser hev kirin. Dîsa bi heman rêbazê li Şengalê sivîl û pêşengê gel kirin hedef û li pêş çavê cîhanê sûcê şer kir.
Dewleta Tirk a dagirker bi hedefgirtina kesayetên welatparêz dixwaze vîna gelan bişikîne û wan ji doza wan dûr bixe. Lê piştî her êrişê gelê Kurd û pêkhateyên herêmê peyama ‘Em natirsin, ti êriş nikarin me ji doza me ya azadiyê vegerînin’ didin. Her wiha li hemberî xiyanetkar, xwefiroş û sîxuran jî dibêjin; wê xiyanet têk biçe û berxwedan bi ser keve.
Heta ev hêz û biryadariya gelê Kurd û gelên li azadiyê digerin hebe, ti êriş wê nikaribe bi wan. Apê Ûsiv nûner û sembola vê biryardariyê ye. Wî tevahiya jiyana xwe xist xizmeta doza Kurd û Kurdistanê, ew bav û bapîrê şehîdan e. Ew dilsozê azadiyê û şopdarê rêya heqîqetê ye. Wî heta kêliya dawî ya jiyana xwe bawerî bi azadiya Kurdistanê anî û bû kedkarê vê dozê. Bi dilsoziya xwe ya bi welat û axê re di dilê her Kurdekê/î de cîhê xwe girt û bû mînak.
Ew ê ji bo gelê Kurd û doza Kurdistanê bibe pîvana welatparêziyê û ji bo dijmin û xiyanetkaran jî bibe navê bibinketinê.
Bila dilê te şa be Apê Ûsiv, êdî dem dema Kurdên azad e. Oxir be Mazlûmê nûhatî û Mihemedê çeleng. Dibe ku berdêl giran bin, lê weke ku berxwedêr û fermandarê Berxwedana Sûra Amede, Gelhat gotî, ‘Dawî wê bi heybet be’.
YENİ ÖZGÜR POLİTİKA
