NAVENDA NÛÇEYAN – 3’yê Cotmeha 2021’an HPG’ê ragihand ku di encama kemînekê de ku hêzên PDK’ê li Xelîfanê di şeva 28’ê Tebaxê de danîbû, ji koma 7 gerîlayan 5 gerîla şehîd bûne.
Di daxuyaniya HPG’ê de ev agahî hatibûn parvekirin: “Di encama vê êrişê de zelal bûye ku 5 hevrêyên me şehîd bûne, dibe ku hevrêyekî me jî bi birîndarî dîl hatibe girtin. Hevrêyê me Hakî ku di nava komê de bû, şahidiya vê bûyerê kiriye û piştî demekê karîbû cihê bûyerê biterikîne.”
EZÎZ WEYSÎ Û DILOVAN RÛBARÎ FERMANA XELÎFANÊ DA
Çavkaniyekê ku nexwest navê xwe eşkere bike, têkildarî êrişa li Xelîfanê diyar kir ku fermana êrişê ji aliyê Ezîz Weysî fermandarê hêzên taybet ên Zêrevanî û berpirsekî pêşmerge yê bi navê Dilovan Rubarî ve hatiye dayîn.
Çavkanî diyar kir hêzên girêdayî PDK’ê kemîn daniye û di nava wan hêzan de pêşmergeyên Roj jî hebûne.
Li gorî çavkaniyê navên hin pêşmergeyên Roj ên ku bi hêzên PDK’ê re di wê êrişê de cih girtibû, wiha ne; Şêran Remedan Sîma, Mevan Îsa Îbrahîm, Îsmaîl Mihemed Salih û Raîd Îsa.
ÊRIŞA XELÎFANÎ SÛCÊ DESTPÊKÊ YÊ PÊŞMERGEYÊN ROJ NÎN E
Pêşmergeyên Roj ji dema avabûna xwe bi destê PDK’ê ve, li şûna ku li hember êrişên qirkirin û dagirkirinê li ber xwe bidin, ji bo êrişên li dijî hêzên azadiyê yên Kurdistanê hatin bikaranîn.
Di 3’yê Adara 2017’an de pêşmergeyên Roj bi hêzên PDK’ê re êrişî navçeya Xanesor a Şengalê kir.
Dema ku li Rojava li hember êrişên çeteyên DAIŞ’ê li ber xwe dida, pêşmergeyên Roj êriş bir ser hêzên ku Şengal ji DAIŞ’ê rizgar kir.
Di êrîşa li Xanesorê ya sala 2017’an de 12 kes hatibûn kuştibûn ku di nava wan de nûçegihan Nûjiyan Erhan jî hebû.
Êrişên dewleta Tirk ên li ser Herêmên Parastinê yên Medyayê zêde bûne û tevî vê koma qaşo pêşmerge ku girêdayî hêzên Zêrevanî yên PDK’ê ne jî gelek caran talîmata xwe ji îstîxbarata Tirk (MÎT) girt û di êrişan de cih girt.
Tevgera azadiyê ya Kurd û gelê Kurd li bendê ne ku PDK rastiya komkujiya Xelîfanê derxe holê, hesabê êrişê bide û cenazeyên gerîlayên şehîdbûyî radestî malbatên wan bike. Lê tevî hemû bangewaziyan jî heta niha PDK’ê tu daxuyanî nedane.
ÇAVKANÎ – ANHA
