STENBOL – Xwendekarên Zanîngeha Bogazîçiyê, ji Ajansa Mezopotamya (MA) re diyar kirin ku ew “rektorê qeyûm” Melîh Bûlû qebûl nakin û xwestin ku herkes piştevaniya wan bike.
Xwendekar, derçûyên Zanîngeha Bogazîçiyê û kesên piştevaniya wan dikin, çalakiyên xwe yên şermezarkirinê yên li dijî Melîh Bûlû yê AKP’î ku weke rektorê qeyûm dibînin, bi biryardarî didomînin. Di çalakiyan de tê xwestin ku ku rektorê qeyûm îstîfa bike û li zanîngehê ji bo rektoriyê hilbijartin bê kirin.
‘WELATÊ KU BI QEYÛMAN TÊ BIRÊVEBIRIN’
Xwendekarê Beşa Civaknasiyê yê Zanîngeha Bogazîçiyê Devrîm Bariş Yilmaz, diyar kir ku rektorê qeyûm Melîh Bûlûyê AKP’î qebûl nakin û wiha got: “Qeyûm ne tenê pirsgirêka Xwendekarên Zanîngeha Bogazîçiyê ye. Pirsgirêka hemû Tirkiyeyê ye. Cihek nema ku qeyûm tayîn nekiri ne. Tirkiye îro bi sîyaseta qeyûm tê birêvebirin. Em ê li dijî vê polîtîkayê piştevaniya xwendekaran mezin bikin û li dijî rektorên qeyûm derkevin.”
BANGA PIŞTEVANIYÊ
Yilmaz, da zanîn ku ji ber xwendekar li dijî tayînkirina rektoran dertên desthilat wan dike hedef û ev bang kir: “Desthilat herî zêde ji ciwanan ditirse. Ji ber vê yekê dixwazin ciwanan ji hev belav bikin û perçe bikin. Desthilat bi medyaya girêdayî xwe ve dengê me qût dike û rastiyan berovajî dike. Em di heman demê de li dijî vê medyayê jî li ber xwe didin. Mesele ne tenê îstîfakirina rektor e. Em bi gelemperî li dijî hişmendiya qeyûm in. Em ê li zanîngehê û li derveyî zanîngehê jî bi berdewamî têkoşîna xwe mezin bikin. Em dixwazin ku li dijî rektorê qeyûm hemû xwendekarên zanîngehê û gelên Tirkiyeyê piştevaniya me bikin.”
TAYÎNKIRINA BI BIRYARNAMEYA OHALÊ
Xwendekarê Beşa Dîrokê yê Zanîngeha Bogazîçiyê Ozan Yaman jî da zanîn ku politikaya tayînkirina rektorên qeyûm ne nû ye û bi bîr xist ku di sala 2016’an de bi biryarnameyên Rewşa Awarte (OHAL) rektor tayînî zanîngehan hatine kirin. Yaman, anî ziman ku tayînkirina rektoran bi tena serê xwe pêkanîneke antî-demokratîk e û ev tişt got: “Rektorê ku tê tayînkirin ji nava zanîngehê be jî ji ber ku yên wî tayîn dikin vîna siyasî ye nayê qebûlkirin. Beriya niha bi biryarnameyên OHAL’ê rektor dihatin tayînkirin niha jî bi Pergala Hikumetê ya Serokkomariyê ev pêkanîn rutin kirine. Daxwaza me ewe ku tayînkirina qeyûman bê sekinandin û li zanîngehan bi hilbijartinên rektor bên diyarkirin Divê li dijî tayînkirina qeyûman ji aliyê zanîngeh, rêxistinên sivîl, komele, şaredariyên HDP’ê ve xeta têkoşîna hevpar bê avakirin.”
QEYÛM LI HER DERÎ NE!
Xwendekarê Zanîngeha Stenbolê Hîvda Selen ku li dijî tayînkirina rektorê qeyûm dertê û piştgirî dide çalakiya xwendekarên Zanîngeha Bogazîçiyê jî ev tişt anîn ziman: “Îro qeyûm tayînî şaredarî, komele û rêxistinên sivîl jî tên kirin. Beriya niha Verşen Kok weke qeyûmê rektorê tayînî ODTU’yê, Nejdet Bûdak tayînî Zanîngeha Egeyê û Mahmût Ak jî tayînî Zanîngeha Stenbolê hatibûn kirin. Qeyûmên ku tên tayînkirin destpêkê civak û qlûbên xwendekaran asteng dikin. Ji bo tepisandina her dengê muxalîf dixebitin. Îro li zanîngehan tu kes ji me ne azad e. Zanîngeh di bin dorpêça polisan de ne. Rektor jî ji bo vê dorpêçê kûr bikin kar dikin. Desthilat bi vê armanc dike ku akademiyê bi rê ve bibe.”
