NAVENDA NÛÇEYAN – Girtiyên di çalakiya greva birçîbûnê de, di peyama ji Newroza Amedê re şandin de wiha gotin: “Baweriya me heye ku tecrîd dê rabe û Serokê me dê bi awayekî fizîkî azad bibe.”
Girtiyên siyasî yên li girtîgehên bakurê Kurdistanê û Tirkiyeyê ji bo azadiya fizîkî ya Rêber APO, çareserkirina pirsgirêka kurd bi rêyên demokratîk û rakirina tecrîdê, dest bi greva birçîbûnê ya demkî û dorveger kiribûn. Çalakiya girtiyan di roja 116’an de berdewam dike. Peyama girtiyan di Newroza Amedê ya biheybet de hate xwendin.
DESTNÎŞANKIRINA AZADIYÊ
Peyama girtiyan a ji aliyê parlamentera DEM Partiyê ya Êlihê Zeynep Odûncû ve hate xwendin wiha ye:
“Newroz dengek bû
Dengên çakûç û hesin
Pişt re bû tîna agir
Veguherî bû deng û rengên azadiyê di dilê Rojhilata Navîn de ku navê wê Kurdistan bû…
Newroza berxwedanê û azadiyê di serî de li Rêberê Azadiyê Rêber APO, hevalên li Wargehên Azad , li dayikên çalakvan, li gelê xwe û li hemû beşdarvanên Newroza azadiyê pîroz dikin. Bi biryardariya ku tecrîd hilweşe u Rêberê Azadiyê bi fizîkî azad bibe, em ji wek şoreşgerên li zindanên Kurdistan û Tirkiyeyê tev li hemleya azadiya fizîkî ya Rêber APO bûn û berxwedana me bi biryardarî berdewam dike. Em bi hêvî û bawer in ku dê tecrîd hilweşe û Rêberê me bi awayekî fizîkî azad bibe. Ev qada Newrozê îro veguheriye qada azadiyê û azadiya Rêberê xwe diqîre. Bi mizginiya biharê cardin Newroza we hemûyan pîroz be!”
