NAVENDA NÛÇEYAN- Tekîn Yoldaş bi wesîleya salvegera 8’emîn a damezrandina Tevgera Şoreşger a Yekbûyî ya Gelan (HBDH) axivî. Yoldaş got, “Weke Tevgera Şoreşger a Yekbûyî ya Gelan di 12’ê Adara 2016’an de me li Herêmên Parastinê yên Medyayê damezrandina xwe ragihandibû. Damezrandina HBDH’ê her wiha ji aliyê milîsên me ve li Taxa Gazî ya Stenbolê hatibû ragihandin. Ev 8 sal in saleke ku di warê têkoşîna Gelan a Şoreşa Yekbûyî de gelek berdêl hatine dayin, hevrêyên me yên pêşeng nemir bûne, em li qadên girîng û çeperên têkoşînê bi cih bûne û ji bo ku em vê têkoşînê bi pêş ve bibin me bedelên mezin dane. Di vê wateyê de HBDH ji bo çîna karker a Tirkiyeyê, kedkar, gelê Kurd, ciwan û jinan tevgereke xwedî girîngiyeke dîrokî ye.”
MÎNA ROJA DESTPÊK BI BAWER Û ISRAR E…
Endamê Komîteya Rêveber ê HBDH’ê Tekîn Yoldaş wiha domand:
“Ev tevger xwe dispêre koka xwe ya dîrokî û li ser esasê kevneşopiya têkoşîna Denîzan, Mahîran, Îbrahîman û yekbûna şoreşa li Tirkiye û Kurdistanê hatiye avakirin. Rêxistinkirina HBDH’ê û xwedî lê derketin di rastiyê de tê wateya xwedî derketina li tevgera Tirkiye û şoreşa Kurdistanê û têkoşîna Şoreşa Yekbûyî ye. Îro ji her demê bêhtir pêwîstiya çîna karker, kedkar, jin û ciwanên Tirkiyeyê bi têkoşîna Şoreşa Yekbûyî û ala Şoreşa Yekbûyî heye. Her cure êrîş û zextên faşîzmê dê nekaribe pêşî li têkoşîna me ya Şoreşa Yekbûyî bigire. HBDH’ê di 8 salên dawî de li hemû qadên têkoşînê, ji çiyayên Kurdistanê heta çiyayên Derya Reş, çiyayên Dersimê, ji metropolên Tirkiyeyê heta zindanan ala Şoreşa Yekbûyî bi rengekî herî xurt bilind kir. Îro jî ev biryardariya me weke roja destpêkê bi israr û dilsozî dewam dike.
ARMANCA ME HILWEŞANDINA FAŞÎZMÊ, BIDESTXISTINA AZADIYÊ YE
Armanca me ya sereke ew e ku em êrîşên faşîzma AKP-MHP’ê vala derbixin, êrîşa dagirker a li ser xaka Kurdistanê û polîtîkaya îstîsmar û zextê ya li ser gelên Tirkiyê têk bibin. Di sala 9’an a têkoşînê de armanca me ‘Hilweşandina Faşîzmê, Bidestxistina Azadiyê’ ye. Em ê bi vîna Şoreşa Yekbûyî keleha zilmê û faşîzmê ya AKP-MHP’ê têk bibin. Em îro silavên xwe yên şoreşgerî ji gerîlayên xwe yên li çiyê şer dikin, ji şervanên me yên ku çalakiya milîsan li bajaran birêxistin dikin, ji hevrêyên me yên li zindanan li ber xwe didin û hemû hevrêyên xwe yên li her qadên têkoşînê berdêlên nû didin re dişînin.
SALA SERKETINÊ
Em armanc dikin ku sala 9’an a têkoşînê ji bo Tevgera Şoreşger a Yekbûyî ya Gelan bibe sala serketinê. Bi vê wateyê de peywira me ya sereke ew e ku li hemû qadên ku em lê ne çalakiyên HBDH’ê zêde bikin, alaya HBDH’ê hildin û bi vê biryardariyê di têkoşîna Şoreşa Yekbûyî de israr bikin. Dengê azadiyê yê karker, desthiladar, ciwan, jin û gelê Kurd wê bi faşîzmê neyê bêdengkirin. Hebûna HBDH’ê wê ji faşîzmê re bibe kabûs. Tevgera me ya Şoreşger a Yekbûyî di dîroka xwe ya têkoşînê ya 8 salan de yekîtiyeke girîng avakiriye. Di heman demê de hevrêtiyeke girîng bi dest xist. Têkoşîna Ûlaş Bayraktaroglu, Ulaş Adali, Baran Serhed, Delal Amed, Nûbar Ozanyan û gelek hevrêyên din di têkoşîna hevpar de bûn yek. Di vê wateyê de kevneşopiyeke hevpar a têkoşînê ya Şoreşa Yekbûyî û vîna Şoreşa Yekbûyî ava kir. Li ser vê esasî soza me ji hevrêyên me yên nemir re ew e ku em ê xwedî li îdealên wan derkevin û ala Şoreşa Yekbûyî bi awayekî herî xurd di sala 9’an a têkoşînê de bilintir bikin, faşîzmê hilweşînin û azadiyê bi ser bixînin.
Li dijî faşîzmê ez bang li gel û ciwanên me dikim ku tevlî têkoşîna Şoreşa Yekbûyî bibin, di nava refên HBDH’ê de xwe birêxistin bikin û hesap bixwazin.”
