REQA – Li dirêjahiya dîroka derketina PKK’ê heya roja me ya îro, hertim hewildanên dijmin ewe ku gerîla, gel û Rêberê Gelan Abdullah Ocalan ji hev perçe bike. Li hemberî wê gelê Kurd û Gerîlayên Azadiya Kurdistanê, ji bo ku rê li ber polîtîka û planeke bi vê rengî bigirin, di xeta Şerê Gelê Şoreşgerî de, têkoşîna xwe ya li hember dagirkeriyê bilind kirin. Di xeta Şerê Gelê Şoreşgerî de dema ku têkoşîn bi pêşket, bi xwe re nûbûnên nû anî.
Di bin sîwana Parastina Rewa, stratêjiya Şerê Gelê Şoreşgerî ku parastina cewherî armanc dike bi pêşket. Ji ber vê jî têkoşîn û şerê ku li dijî dagirkeriyê were meşandin, wê şerê gel be. Di vê bingehê li dijî êrîşên dagirkeriyê yên li ser herêmên Bakur-Rojhilatê Sûriyeyê, ji aliyê Rêverberiya Xwaser û Hêzên Sûriya Demoqratîk ve, rewşa awarte û seferberî hate ragihandin.
Ji bo vê jî tevahî gelên Bakur-Rojhilatê Sûriyeyê, di xeta Şerê Gelê Şoreşgerî de amadekariyên xwe yên li şerê dijî dagirkeriyê dikin. Di vê çarçoveyê de ciwanên ji pêkhateya ereb ku amadekariyên xwe li ser vê esasê dikin ji ajansa me re axivîn.
Destpêkê jina ciwan ya bi navê Bûşra El-Ehmed axivî, Bûşra diyar kir ku wê li dijî her êrîşeke dagirkeriyê parastina xaka xwe bikin û got; “Navê min Bûşra El-Ehmed, rêveberiya Tevgera Ciwanên Şoreşger a bajar û gundewarên Reqayê me. Me bi riya vekirina dewreyên perwerdeya tendrustiyê, yên ji bo dermankirina birîndaran a li bajar û derdorên wê, dest bi amadekariyên Şerê Gelê Şoreşgerî kirine. Her wiha ji bilî wê em dewreyên perwerdeyên leşkerî yên vekirî û girtî vedikin, ev jî di çarçoveya parastina herêmê ji êrîşekî muhtemel re ku pêk bê. Em weke Tevgera Ciwanên Şoreşger û Yekîtiya Jinên Ciwan ên bajarê Reqa û gundewarên wê, di nava amadekariyên seferberiyên ku hatine ragihandin de ne. Çi ji me bê xwastin, ji bo pêkanîna wê em amade ne. Emê li hember êrîşên dijmin yên li ser herêmên Bakur-Rojhilatê Sûriyeyê, li dijî komploya navdewletî û li hember tevahî êrîşên mêtîngeriyê, emê bersiva êrîşên dewleta Tirk ya dagirker û parastina xaka xwe bikin.”
Heman demê de ciwanê bi navê Mûwefeq Îsmaîl jî dest nîşan kir ku dewleta Tirk dixwaze bi van êrîşên xwe careke din xeyalên Osmaniyan nû bike û wiha dest bi axaftina xwe kir; “Navê min Mûwefeq Îsmaîl, endamê Tevgera Ciwanên Şoreşger ya bajarê Reqayê me. Îro em weke Tevgera Ciwanên Şoreşger ên bajarê Reqayê tevahî êrîşên dagirkeriyê ya dewleta Tirk ya dagirker ên li ser herêmê şermezar dikin. Mixabin, dewleta Tirk 400 salî li ser erdnîgariya Sûriyeyê dagirkerî kiriye, dixwaze niha jî careke din xewn û xeyalên Osmaniyên nû pêk bîne. Em jî weke ciwan û hemû pêkhateyên Sûriyê û bi taybet ên herêma Bakur-Rojhilatê Sûriyeyê, divê em destê xwe bixin destê hev de, ta ku em ji hemû êrîşên dagirkeriyê yên li ser herêmên Bakur-Rojhilatê Sûriyeyê, biparêzin. Em weke zarokên vê herêmê ji bo parastina gelê xwe ji van êrîşên dagirkeriyê yên dewleta Tirk, emê rêxistinbûyîna xwe xurt bikin.”
Her wiha Mihemed Nûr jî ku cihê xwe di Tevgera Xwendakarên Demoqratîk de digire got; “Navê min Mihemed Nûr, endamê Tevgera Xwendekarên Demoqratîk a bajarê Reqayê û gundewarên wê me. Îro em weke Tevgera Xwendekarên Demoqratîk ên Reqayê, ji bo şerê li dijî dagirkeriyê xwe di xeta Şerê Gelê Şoreşgerî de amade dikin. Da ku em li hember êrîşên dagirkeriyê ya dewleta Tirk li ser herêmê Bakur-Rojhilatê Sûriyeyê bibin bersiv. Divê em weke Tevgera Ciwanên Şoreşger û Tevgera Xwendekarên Demoqratîk, parastina xaka, welat û gelê bikin. ev erk û mafê me ya sereke ye, em weke Tevgera Xwendekarên Demoqratîk, bang li hemû ciwan û jinên ciwan ên Bakur-Rojhilatê Sûriyeyê dikin ku tevlî xeta Şerê Gelê Şoreşgerî bibin û tevlî cenga azadiyê bibin.”
NC// Hozan Can
