NAVENDA NÛÇEYAN – Komîteya Navendî ya PKK’ê bi wesîleya Cejna Newrozê daxuyaniyek weşand. Daxuyanî wiha ye:
“Em; Tevgera Azadiyê ya Kurdistanê û gelê Kurd di Newrozeke nû de ne. Newroz cejna me ya yekîtî, berxwedan û azadiyê ye. Yek ji kevintirîn cejnên azadiyê yên dîroka mirovahiyê ye. Bi pêngava Rêbertî û PKK’ê re Newroz hîn bêhtir bedew û bi wate bû. Çawa ku xweza bi biharê re şîn dibe, em jî di her Newrozê de xwe nû dikin; dibin xwedî ruh û hişmendiya yekîtî, berxwedan û azadiyê.
Weke tevger, gel û dostên xwe, em Newroza 2022’an bi van hest û kûrbûna fikrî pêşwazî dikin. Sala nû ya Newrozê li ser vê bingehê pêşwazî dikin. Li çar parçeyên Kurdistanê û çar aliyên cîhanê Newroz bi coş tê pîrozkirin. Li ku derê welatparêzek Kurd hebe Newroz li wê derê teqez tê pîrozkirin. Bi coş û biryardariyeke welê mezin em dest bi sala nû ya Newrozê dikin. Em pê bawer in ku ev rewş wê tevahiya salê dewam bike û her roj wê mîna Newrozê têkoşîna demokrasî û azadiyê bê geşkirin.
EM BANG DIKIN KU HER ROJA SALÊ BIKIN MÎNA NEWROZÊ
Li ser vê bingehê em Newrozê di destpêkê de li Rêber Apo, li hevrêyan hemûyan, gelê me yê welatparêz û dostên xwe yên şoreşger-demokratîk pîroz dikin û di sala nû ya Newrozê de serketinê dixwazin. Em têkoşîna azadiyê ya mezin silav dikin ku bi pêşengiya Berxwedan Îmraliyê ya dîrokî pêk tê, li çiyê, bajar û zindanan li ser xeta lehengiyê dewam dike û armanca xwe misogerkirina azadiya fîzîkî ya Rêber Apo ye. Di şexsê şehîdên me yên mezin ên Newrozê Mazlûm Dogan û Zekiye Alkan de şehîdên me yên leheng hemûyan bi rêz, hezkirin û minet bi bîr tînin. Hefteya Lehengiyê ya Neteweyî ya Gelê me pîroz dikin û di şexsê lehengên me yên neteweyî Mazlûm Dogan û Mahsûm Korkmaz de şehîdên leheng hemûyan careke din bi bîr tînin. Em bang li gelê me û dostên xwe dikin ku her roja sala nû bikin mîna Newrozê!
EM DESTPÊKIRINA SALA 50’Î YA PÊNGAVA RÊBERTÎ YA APOYÎ Û VEJÎNA TEVGERA AZADIYÊ SILAV DIKIN
Weke ku tê zanîn, Newroza 2022’an sala 50’emîn a Pêngava Rêbertî û danîna hîmên PKK’ê ye. Sala nû ya Newrozê sala 50’î ya Meşa Rêbertî ya Apoyî û PKK’ê ye. Pêngava Rêbertî ya Apoyî di Newroza 1973’an de pêk hat. Koma Apoyî ya ku hîmê PKK’ê danî, di Newroza 1973’an de li qada Bendava Çûbûkê ya Enqereyê bi civînekê ava bû. Bi vî rengî li dijî zext û tarîtiya darbeya faşîst-leşkerî ya 12’ê Adara 1971’ê rastiya ronahî û berxwedêr a Tevgera Azadiyê ya Apoyî ava bû. Ev meşa rasteqîn a Apoyî niha dest bi sala xwe ya 50’emîn dike. Eşkere ye ku rastiya Rêber Apo Rêbertiyeke Newrozê ye. PKK jî weke partiyeke Newrozê hate damezrandin û bi pêş ket. Gelê Kurd bi pêşengiya Rêber Apo û PKK’ê, bi têkoşîna azadiyê ya 49 salên derbasbûyî re veguherî gelekî Newrozê. Di dîroka Kurdistanê de yekemcar bi Rêbertiya Azadiyê û tevgera partiyê bênavber 50 salî meşiya û pêşketinên dîrokî afirand.
Li ser vê bingehê em ketin sala 50’î ya Pêngava Rêbertî ya Apoyî û Tevgera Azadiyê. Em gelê Kurd, jin û ciwanan pîroz dikin, ji ber ku di nava van şert û mercên bêeman de 50 salî bênavber têkoşiyan û Rêbertî û rastiyeke bi vî rengî ya Partiyê afirandin. Şehîdên leheng ên vê meşa azadiyê ya pîroz di şexsê hevrê Hakî Karer, Mazlûm Dogan, Hayrî Dûrmûş, Kemal Pîr, Sakîne Cansiz, Mehmet Karasûngûr, Agît, Bêrîtan û Zîlan, bi hurmet, hezkirin û minet bi bîr tînin. Em soza xwe dubare dikin ku armancên wan bi ser bixînin û xwedî li bîranîna wan derkevin.
RÊBER APO LI SER XETA JIYANA AZAD EM JI NÛ VE AFIRAND
Bêguman di vê meşa azadiyê ya pîroz de ku nîv sed sal e bênavber dewam dike, keda herî mezin a Rêber Apo ye. Rêber Apo hem ev têkoşîna mezin da destpêkirin hem jî di her demê de barê herî giran hilda ser milê xwe û wezîfeyên xwe bi ser xist. Weke milîtan, partî û gel em ji nava pergala qirker rizgar kir û li ser xeta jiyana azad ji nû ve afirand. Ev rêya azadiyê ya pîroz hem xurt kir hem jî ronî kir û pêşî li serketinê vekir. Lewma em çiqasî jî bi hurmet, hezkirin û minet nêzî Rêber Apo bibin, çiqasî ji dil wî silav bikin jî kêm e. Ya rast û têrker ew e ku em rastiya Rêbertî ji kûrahî ve fêhm bikin û bi rengekî serketî bi cih bînin. Em bi vê zanin û dibêjin ku di her kêliya sala 50’î ya têkoşînê de em ê li gorî vê yekê tevbigerin.
EM BI RASTIYA ŞEHÎDAN GIHÎŞTIN HETA VÊ SERDEMÊ
Di vê meşa azadiyê ya pîroz a nîv sedsalê de, şehîdên me yên leheng piştgiriya herî mezin dan rastiya Rêbertî. Rastiya şehîdan kir ku veger têkoşîn bênavber e û serketin misoger kirin. Ya ku bi Rêbertî re em perwerde kir, bi rêxistin kir, gihand hev û meşand, şehîdên me yên leheng bû. Rastiya şehîdan hêza me ya berxwedanê û daxwaza me ya serketinê afirand. Ne ji wan bûya me nekarîbû tiştek bikira, nekarîbû gavek jî biavêta. Weke gel û tevgerê em bi rastiya şehîdan gihîştin heta vê serdemê. Lewma ji bo me esas e ku li gel Rêbertî rastiya şehîdan rast fêhm bikin û bi rengekî serketî bi cih bînin. Em şehîdên xwe yên leheng her tim bi rêzdarî û minet bi bîr tînin û em ê timî wan bi bîr bînin. Meşa me ya bi biryar û serketî ya sala 50’î wê li ser vê bingehê be.
EM HER KESÊN KU KEDA XWE HEYE, SILAV DIKIN
Bêguman hêzên gêrîla yên qehreman, bûn hêza me ya berxwedêr pêşeng ku li ser xeta fedaîtiyê şer û jiyan kirin. Li ser bingehê afirandina fedekarî û wêrekiya gerîla jin û ciwanên Kurd, hemû gelê Kurd ê wêlatparêz meşiyan û vê meşa qehremantiyê ya pêncî salan afirand. Di serî de gelên Tirk, Fîlîstînî-Ereb, Ermen û Asûr-Siryan hemû gelên bindest, derdorên bindest û mirovahiya demokratîk ji vê meşa azadiyê ya pîroz re tevkarî û destekeke pir bi nirx, mezin dan. Bi vê wesîleyê herkesên ku ji vê meşa azadiyê ya pîroz re ked dane birêz û hurmet silav dikin.”
