NAVENDA NÛÇEYAN –
Weysî Tallî Nivîsî
Çiya mesken e
Dayik, bav û hevrê ye
Stargeh û çeperên azad in
Cihê ku dijmin lê serî dane nehilîne ye,
Bi biharê mizgînî hil tîne
Çem û kanî, newal û gelî
Tev ji bo siberojê avis in…
Hatina werza biharê di gelek aliyan de mizgîniya xêrê û bereketê dide civakê. Meha adarê hem meha destpêkê ya werza biharê ye û dîsa dîroka ji nû ve vejîna kurd û weke sersala kurdan tê pênasekirin.
Bi taybet werzên biharê ji bo gerîla û dîsa ji bo civaka kurd mizgîniya xêrê û bereketê ye. Çiya û geliyên bi her rengê dar û deviyên xwe dixemile, ji bo gerîla dibin stargeh û çeperên cenga serketinê, li aliyê din jî ji bo gelê kurd dibe mizgîniya serketin û serfiraziyê.
Di meha adarê ya werza yekem a biharê de her çendî rojên bi êş jî hebin, bi taybet roja 8 û 21’ê Adarê ji bo kurdan rojên taybet û serfiraziyê ne. 8’ê Adarê Roja Jinên Kedkar ên Cîhanê ye û ev roj di şexsê jinên kurd de, îro li cîhanê zêdetir bi wate bûye û keda jinan, rola jinan a di nava civakê û dîsa şoreşê de hîn zêdetir diyarker e. Li aliyê din ji xwe 21’ê Adarê sersala me kurdan, ango roja ji bin nîrê deshilatdar û zaliman serîrakirina yekem e.
Adara îsal dê ji hemû adarên din cihê be, wê bi pêngava ‘Bes e, ji tecrîd, faşîzm û dagirkeriyê re; dem dema azadiyê ye’ asta çalakî û pêşketinên girîng ji bo kurdan bîne. Gerîlayên Tevgera Azadiyê yên li her derê derbên giran li dagirkeriya tirk dide, bi hatina biharê re asta çalakî û ruhê demê hê ji niha ve dengê lingên gerîla tê bihîstin. Jixwe hê dengê berxwedana gerîlayan a li Garê di guhê her kesê de olan dide.
Jixwe bi hatina biharê re ku çiya şîn dibe û dar û devî pel dide, wê ev deng 24 saetan di guhê leşker û fermandarên tirk de li her cihê lê be olan bide. Jixwe ji daxuyanî û gotinên rêveberên PKK’ê tên dayîn, diyar e ku cengek mezin ji her demê bêhtir û xurtir li pêşiya gerîla û dîsa gelê kurd heye.
Ji bo wê ye ku çalakî û xwepêşandanên îro li her qadê tê kirin, wê di gihandina serketinê ya vê meşa azadiyê de xwedî cih û rol be. Bi taybet li Ewropa çalakî û aktivîteyên tên kirin wê di gihandina dengê gerîla û dîsa şoreşa li Kurdistanê li dijî faşîzm, dagirkerî û tecrîdê tê kirin, di asta dîplomasiyê de xwedî rist be. Dîsa li aliyê din ji bo sûcên şer ên dewleta tirk a di serî de li rojavayê Kurdistanê, dîsa Başûr û li dijî gerîla tên kirin, bibe belgeyên neqebûlkirina vê û civaka rojavayî neçar bike ku li ber Tirkiyeyê rabe.
Li hundirê welat jî bi taybet ciwan û jinên ciwan bi ruhê hatina biharê re li her qadê kevirek jî be li faşîzmê bide wê bike ku faşîzm ji hev bikeve. Bi taybet dor li partiya xwe HDP’ê bigire ku ji her êrîş û nokeriyê biparêze. Li aliyê din di serî de xwe ji şantaj, destdirêjî-destavêtin û revandinê toreke ya parastin û jihevagahiyê ava bike ku bikaribe plan û lîstikên dijmin vala derbixe.
Îro her kes dibîne ku piştî tofana Garê faşîzma AKP-MHP’ê gihaye çi astê. Ji bo wê ye ku ji bo ev faşîzma rizî bê avêtina sergoyê û faşîst bên darezandin li her qadê bi keda jinan a 8’ê Adarê, bi vejîna kurdan a 21’ê Adarê û bi ruhê lehengiya 28’ê Adarê li her qadê agirê azadiyê geş bike.
WELAT
