NAVENDA NÛÇEYAN – Fermandariya Eyaleta Heftanînê bi daxuyaniyeke niviskî dengê xwe li wan cerdevanan kir ku tevlî nav êrîşên dagirker ên Tirk dibin.
Fermandariyê got,”Ên ku pêşengiyê li van operasyonan dikin nexasim serekcerdevanên gundên Bêjuh, Mergeh, Hedrîş, Kirorê ne. Em dibêjin van alçaxan, tiştên ku hûn dikin wê li cem we nemîne. Çawa ku we malên gelê me rûxand, hebû hebûna we ji bo me hedef e.”
‘EM NE TENÊ BI ARTÊŞA DEWLETEKÊ RE ŞER DIKIN’
Daxuyaniya Fermadariya Eyaleta Heftanînê wiha ye:
”Operasyona bi navê Pençe 3 û Pençe Kaplan ku artêşa çete ya bi ser Erdogan ve li dijî eyaleta me daye destpêkirin salek li pey xwe hişt. Li dijî vê êrîşa çete berxwedana bêhempa ya dîrokî di şexê Zagros, Egîd, Amara, Rûbar, Bêrîtan, Tolhildan, Esmer, Goran, Rustem, Zelal, Mazlûm, Ferman, Zana û Mizgînan de li ser van xakên pîroz hate kirn û ev berxwedan bi hemû tundiya xwe didome.
Em li Heftanînê ne tenê li dijî artêşa dewletekê şer dikin. Em li Heftanînê her wiha bi hêza çeteyan re jî şer dikin ku ji bo pereyan xwe firotine, li Kurdistanê û derveyî Kurdistanê komî ser hev kirin û bi dilê artêşê ne.
’HEKE ME BERSIV BIDA WÊ GELÊ ME YÊN LI GUND QETIL BIKIRANA’
Beriya niha li gel ku gelek caran me dengê xwe li wan kir jî van çeteyan guh nedane me. Herî dawî li dijî hundên Pîrbûla û Banîkê êrîşeke bi alçaxî hate kirin. Me hêzên eyaletê ji bo ku zirar negihe gelê me yê li derdorê me bersiv neda. Em vê artêşa çete ji Cizîrê, Nisêbînê û Sûrê nas dikin. Heke me bersiv bidaya wê gelê me yê li gundan qetil bikirana.
Van çeteyên barbar dema ku fêhm kirin ku em ê bersivê nedin, nexasim li gundê Banîkê gelek mal şewitandin. Dema ku ev êrîş dianîn xwedêgiravî ji bo ewlehiya gelê me yê Başûr hêzên Iraqê û pêşmerge yê li herêmê bûn, tenê temaşe kirine. Li şûna ku bibin alîkar ji gelê me re ku ji bo van êrîşan ji bêgavî koç kirin, tinazê xwe bi wan kirine. Em vê pirsê dîsa ji van hêzan dipirsin: Heke armanca we ne parastina gel be, hûn bi çi sedemê van deran zevt dikin?
‘EM Ê ÊDÎ LI BARA WAN NE HESAS BIN’
Ên ku pêşengiyê li vê operasyonê dikin nexasim serekcerdevanên gundên Bejuh, Mergeh, Hedrîş, Kirorê ne. Em ji van alçaxan re dibêjin, tişta ku hûn dikin wê li we nemîne. Çawa ku we malên gelê me şewitand, hemû hebûna we ji bo me hedef e. Çawa ku hûn ti ferqê nakin û êrîşê tînin ser gelê me, em ê jî ti cihêtiyê nekin hemû hebûna xwe.
Heta niha gelek caran li gel ku cerdevanên li herêma operasyonê ketine hedefê jî hêzên me bersiv nedane wan. Em ji van hemû çeteyan re dibêjin ku tevlî vê operasyonê bûne, êdî em ê li bara wan ne hesas bin.
NAVÊ WAN YEK BI YEK WÊ WERIN GOTIN
Li qada me niha bi pêşengiya ketiyê bi navê Cafer Benek xebatên rê têne kirin. Bi mîsogerî hûn ê berdêla vê bidin. Ne gelê me û ne jî hêzên gerîla wê vê kirina we ji bîr neke.
Dema ku roja wê hat hesab wê were pirsîn. Li Heftanînê her dara ku we birî hûn ê hesabê vê bidin. Di destê me de gelek nav hene. Di siberojê de em ê navên van ên ku tevlî êrîşên bi alçaxî bûne ji bo gelê xwe me yê welatparêz aşkere bikin.
Em li cem şehîd û gelê me yê welatparêz sond dixwin; ti êrîş wê bêbersiv nemîne.”
