DÊRIK – Bi sedan xelkê Dêrikê, Girke Legê û Çilaxa şehîd îvan Dêrik, Şervan û Ebdulkerîm oxir kirin.
Xelkê Dêrik, Girke Legê û Çilaxa merasîma şervanên QSD`ê Şervan (Ferîd Bekir), Îvan Dêrik (Elî Ehmed) û Endamê Hêzên Ewlekariya Hundirîn Ebdulkerîm Berazî li Pakrewangeha Şehîd Xebat li dar xistin.
Merasîm bi deqeyekê rêzgirtinê dest pê kir. Piştre endama Meclisa Malbatên Şehîdan a bajarê Dêrikê Xedîce Hebeş axivî û got: “Em bi saya fedakariya şehîdan û sekna qehreman a zarokên Rojava xwedî hêz û îradeyeke xurt in. Şehîdan deskeftiyên Rojava parastin û hemû planên li ser gelê Kurd têk birin.“
Bi navê Kongreya Îslama Demokratîk Şêx Sînan Şêdûş jî axivî û got: “Serkeftina me berhemê fedakarî û qehremaniya şehîdan e. Ew di dilê me de ne û ti carî namirin. Divê em erkên xwe li beramberî wan pêk bînin û em welatparêz bin. Em rêya aştiyê dihilbijêrin, em ê li ber xwe bidin û em ê fitne, şer û kuştinê ji gelê xwe dûr bixîn in.”
Her wiha endama Partiya Yekitiya Demokratîk (PYD) Asya Abdullah axivî û anî ziman ku di encama lihevkirinên navneteweyê di pêvajoyeke xeter re derbas bûn û wiha domand ” Ji destpêka sala 2011`an ve gelek hêzan êrişî deskeftiyên şoreşa Rojava û şoreşa jinê dikin. Li hemberî hemû êrişan YPJ û YPG`ê li ber xwe dan û alên wan di hemû pêvajoyan de bilind man. Em niha bi saya berxwedana şervanan a li eniyên şer, dijîn.’’
Piştî axavtinê Meclisa Malbatên Şehîdan wesîqeyên şehîdan xwendin û radestî malbatên wan kirin. Şehîd bi dirûşmeya ’’Bijî Berxwedana Rojava’’ spartin axê.
