NAVENDA NÛÇEYAN – Gaziyên şer ên banga Rêber APO ya 27’ê Sibatê li ber ekranan bi komî temaşe kirin diyar kirin ku banga Rêber APO dermanê hemû pirsgirêkan e û gotin, “Baweriya me bi Rêber APO bêdawî ye. Em şoreşgerên Apoyî ne û ji her tiştî re amade ne.”
Rêber APO 27’ê Sibatê bangeke dîrokî ya sedsalê kir. Li her çar parçeyên welat û li her aliyê cîhanê bi milyonan mirovan bi heyecaneke mezin banga Rêber Apo guhdar kirin. Gaziyên şer jî bi heman kelecanê banga Rêber APO li qadan temaşe kirin.
Gaziyên şer ên têkildarî banga Rêber APO nêrînên xwe anîn ziman diyar kirin ku banga Rêber APO ya 27’ê Sibatê gelekî girîng û dîrokî ye û gotin, “Lê divê rayedarên Tirk, li Rêber APO guhdar bikin. Pêwîst e her kes bibe xelekek ji yên çareseriyê. Weke em tevahî jî dizanin Rêber APO di destpêka temenê xwe de dest bi têkoşîna azadiyê kir û heya roja me ya niha jî berdewam dike.”
Gaziyên şer anîn ziman ku berê jî gelek caran Rêber APO bang li rayedarên Tirk kiriye da ku pirsgirêk çareser bibe, lê mixabin timî destê Rêber APO ji bo biratî û aştiyê dirêj kiriye nehatiye girtin.
ROLA CIVAKÊ PIR GIRÎNG E
Têkildarî pêşerojê jî gaziyan gotin, “Em bi hêvî ne vê carê ev banga dîrokî ya Rêber APO bibe bingehê çareseriya mayînde ya ji bo pirsgirêka Kurd û Tirk. Û ya din jî wê ezmûna wan ji tevahî gelan re bibe ronahiya, çareseriya demokratîk. Bi milyonan mirovan banga Rêber APO bi heyecan û kêfxweşî guhdar kirin. Ev banga dîrokî ya sedsalê bûye rojeva tevahî gelê Kurd û dostên wan.”
Her wiha gaziyên şer destnîşan kirin ku çareseriya Rêber APO ji pirsgirêkên gelan re daniye holê dermanê tevahî pirsgirêkên civakî, olî, mezhebî, neteweyî û zayendî ne.
Gaziyan di dawiyê de jî gotin, “Rola civakê jî di çareseriyê de gelekî girîng e. Jin, ciwan û tevahî beşên civakê jî divê bi erk û mîsyona xwe rabin û keda Rêber Apo bi serketinê tacîdar bikin. Em jî weke gaziyên şer dibêjin baweriya me bi Rêber APO bêdawî ye. Em şoreşgerên Apoyî ne û ji her tiştî re amade ne.”
