NAVENDA NÛÇEYAN – Di 4’ê Çileya 2016’an de li navçeya Silopî ya Şirnexê, endama Meclîsa Partiyê ya DBP’ê Sêvê Demîr, Aktîvîsta HDP’ê û KJA’yê Fatma Ûyar û Hevseroka Meclîsa Gel a Silopiyê Pakîze Nayir deema dikirina ji taxekê derkevin, di êrîşa hawanê de şehîd bûbûn. Ji bo şandina ambûlansê dema ku cihê her sê jinan hatibû ragihandin, vê carê hêzên dewletê li her sê jinan gule reşandibû. Di encamê de her sê jinên Kurd bi awayekî hovane hatibûn qetilkirin.
Fermandariya YPS û YPS-JIN’ê bi daxuyaniyeke nivîskî her sê jin bi bîr anî.
Di daxuyaniyê de ev tişt hate diyarkirin:
“Di ser berxwedanên bajaran re 7 sal derbas bûn. Gelê Kurd bi saya têkoşîna me ya pêncî salî ya li dijî dagirkeriya çandî, aborî, siyasî û erdnîgarî, fêm kir ku heta ku gelê Kurd xwe bi rê ve nebe wê azad nebe. Di vî şerî de jinên herî bedew ên gelê Kurd di eniya herî pêş a şer de bûn. Jin a ku sembola jiyanê bû, digot ‘Heke wê jiyanek hebe divê azad be’ û wisa li ber xwe dida.
Di 4’ê Çileya 2016’an de di dema berxwedana xwerêveberiyê ya li Silopiyê de Sêvê Demîr, Fatma Uyar û Pakîze Nayir dema hewl didan ji taxa vala derbikevin, dijmin ji hewayî ve li wan da. Piştre dema ku li benda ambûlansên bûn, hatin qetilkirin. Ji bedena her sê jinên şoreşger 19 fîşek hatin derxistin. Ev helwesta hovane nîşaneya bêtehamuliya dijmin û tirsa ji berxwedana jinê bû. Wekî ku Sêvê Demîr jî diyar dikir, nêzikatiya bingehîn a her sê hevalên me yên jin ev bû ku ‘Heke Rêbertiya me azad bibe, wê axa me jî azad bibe’. Di şexsê Sêvê Demîr, Pakîze Nayir û Fatma Uyar de ‘Jin, jiyan, azadî’ û ‘Bi Rêbertiya azad re ber bi Kurdistana azad’ dema bû yek, careke din hêza berxwedanê ya jinê derket holê û jin bûne xwîna di damarên berxwedanê de.
Îro bi taybetî jin li her derê dibin hedefa dijmin. Heval Sara, Rojbîn û Ronahî di 9’ê Çileyê de, Denîz Poyraz di 17’ê Hezîranê de , Garîbe Gezer di 9’ê Çileyê de û Evîn Goyî tevî Abdulrahman Kizil û Mîr Perwer di 23’ê Kanûnê de hatin qetilkirin. Berxwedana jinên Kurd derbeke mezin li faşîzma dewleta Tirk xist. Jinên li çiya bûne xeta fedaî ya di şer de, bûne zimanê şoreşa Rojava, bûne lehengên şoreşa Rojhilat, bûne pêşengên têkoşîna azadiyê ya li tevahiya Kurdistanê. Faşîzma Tirk li xwe mikur hat ku li hemberî rastiya jinên Kurd têk çûye. Ev rastî tekane sedema êrîşên hovane ye.
Li ber ronahiya vê heqîqetê de em di şexsê Sêvê Demîr, Pakîze Nayir û Fatma Uyar de hemû şehîdên xwe yên ku pêşengên xeta serketinê ya biryardar temsîl dikin, bi bîr tînin û soz didin ku em ê bi Rêbertiya Azad re ber bi Kurdistana Azad bi ser bikevin.”
