NAVENDA NÛÇEYAN- Komalên Ciwanên Rojhilatê Kurdistanê bi daxuyaniyekê bal kişande ser êrîşên tund ên dema dawî yên dewleta Îranê ya li dijî serhildana ‘Jin, Jiyan, Azadî’.
‘XWEPÊŞANDAN ROJ BI ROJ DEWLETA ÎRANÊ TÊK DIBE’
KCR’ê diyar kir ku du meh in şoreşa azadî ya jinan ku bi dirûşmeya ‘Jin, Jiyan, Azadî’ bi pêşengiya ciwanan û jinan li Îran û Rojhilatê Kurdistanê destpêkirî, her diçe dewleta Îranê xistiye nava tirsekê û roj bi roj wî ber bi tinebûn û vemirandina mûma ku temenê wê 43 sal in dibe û ev got: “Hemû jin û ciwanên ji pêkhateyên cihê li ber hemû êrîş û tirsa hêzên rejîmê bi şev û roj li ser rê û kolanên gund, navçe, bajarok û bajaran bi çalakiyên cûr bi cûr a şoreşa jinê, pêşengiyê ji serhildan û raperîna gelên Îranê û Rojhilatê Kurdistanê re dike. Rejîm hewl dide li hember daxwazên civakê bi taybet daxwazên jin û ciwanan, bi rêya tundî û êrîşan şoreşa jinê belav bike. Tevî vê jî ciwan li gel êrîş û gefan jî bi pêşengiya xwe komên çalakiyên nerazîbûnê fireh kirine, rejîma Îranê tengav kirine. Bi taybet tevlîbûna xwendevanên zanîngehên Îran, xwendevanên dibistanên navendî û ketina grevên giştî hêviya mezinbûna şoreşê zêde kiriye. Ev yek jî kiriye ku helwesta cemawerî ya li dijî rejîmê zêde bibe. Tevlîbûna xwendevanan jî nîşan dide ku ciwan zêdetir azadiyê dixwazin û di nava lêgerînê de ne û daxwaza jiyana azad û demokratîk dikin. Ji bo wê ye ku ciwan bi rê û rêbazên cihê yên dewlemend agirê şoreşê geş dike, li ber êrîş û gefên rejîma dagirker a Îranê xurtir rabe.
Ciwanên şoreşger, azad û jinan di vê demê de destnîşan kir ku êdî nifşên nû yên ciwan û jin, guh nadin jirêderxistinên rejîmê, belkî bi îradeya xwe ku hebûna xwe ya rast naskirin û ji ber vê jî bê dudilî canê xwe didin. Ji bo wê ciwan bi hemû hêza xwe xwedî li şoreş û gelan derdikeve. Em dibînin di vê şoreşê de mertalê parastina şoreşê bi çeka Parastina Cewherî ve derfeta jiyana azad û demokratîk berfireh dikin.”
‘LI HEMBER ÊRÎŞAN CIWANAN AGIRÊ ŞOREŞÊ XURTIR KIRIYE’
KCR’ê bal kişande ser êrîş û hewldanên dewletê yên serkutkirina xwepêşandanan bi rêya tundiyê û ev anî ziman: “Hêzên dagirker ên rejîmê bi çend qonaxan xwestin dawî li hêrs û hewldanên jin û ciwanan, nerazîbûn û raperîna şoreşa gelan bîne. Ligel vê jî ciwanan her carê ji berê zêdetir daxwazên xwe yên azadî û berxwdanê bihêztir kiriye, agirê şoreşê xurtir kiriye, di kesayetiya xwe de hem nûnertiya xwe ya li şoreşê, hem jî bi helwest, yekgirtin û xwedîderketina li şoreşê, di mudaxeleyên şoreşê de rola xwe ya pêşengiyê ji bo şoreşa azadiya gelan û Rojhilatê Kurdistanê girtine ser milê xwe.”
Komalên Ciwanên Rojhilatê Kurdistanê (KCR) diyar kir ku dewleta Îranê destpêkê ciwan û jinan weke komeke bê berpirs û rêveber, her wiha provakator pênase kir û ev nirxandin kir: “Rejîm ev xwepêşandan bi hêzên derve re girêda. Bi hêzên xwe êrîş bire ser jin û ciwanan. Bi sedan jin û ciwan ji bo gihandina armancên şoreşê canê xwe feda kirin û şehîd bûn. Êrîş û tirsê nekarî vê carê jî agirê şoreşa jinan vemirîne. Bi dayîna cezayê sêdarê ya ji bo ciwanan û xwepêşanderan dixwaze bi vê rêyê dawî li şoreş, reparîn û çalakiyan bînin. Li hember vê yekê ciwan û jinên Îran û Rojhilatê Kurdistanê zêdetir yek girtin, li ser daxwazên xwe bûn yek. Di heman demê de rejîmê bi van hewldanên xwe gora xwe bi destê xwe dikole, dawî li temenê xwe yê bi destê ciwan û jinan tîne.”
‘CIWAN WÊ BERSIVÊ BIDE’
Komalên Ciwanên Rojhilatê Kurdistanê (KCR) destnîşan dike ku çawa li dîrokê diyar e ti desthilat û hêzek nikare bi êrîş û tundiyê pêşiya vîn û daxwazên ciwan û jinan bigire û wisa temenê xwe dirêj bike û got: “Siyaseta êrîş û tundyê ya li ser ciwan û jinan wê ji aliyê ciwanên şoreşger ve bê bersiv nemîne. Daxwaz ji hemû beşên civakê û neteweyan û taybet jin û ciwanan dikin ku bi yekrêzî û yekgirtî bi rêxistineke bihêz têkoşîna xwe bidomînin û bizanin ku di vê rêyê de ne bi tenê ne.”
KCR’ê herî dawî soz xwe ya dilsoziya bi şehîdên şoreş û azadiyê re dubare kir û diyar kir ku ji bo pêkanîna armancên wan wê têkoşînê bikin.
