MEXMÛR – Ji 7’ê Tebaxa 2019’an û vir ve hevdîtina bi parêzeran re bi her awayî tê astengkirin. Beriya niha cezayê disiplînê ku li Rêberê Gelan Abdullah Ocalan hatibû birîn, bi qasî 6 mehan hevdîtina li gel parêzerên xwe û 3 meh jî li gel malbatê hatibû astengkirin. Herî dawî di 29’ê Adara 2022’ an de carek din cezayê disiplînê li Rêberê Gelê Kurd Abdullah Ocalan hat birîn.
Li Wargeha Penaberan a Şehîd Rustem Cûdî (Mexmûr) tecrîda li ser Rêberê Gelan Abdullah Ocalan, cezayê disiplînê ku di 29’ê Adarê de hatibû eşkerekirin, her wiha êrîşên li ser Başûrê Kurdistanê tên domandin bi daxuyanîyekê hate şermezarkirin.
Daxuyanî li avahiya Saziya Malbatên Şehîdan hat dayîn. Beriya ku daxuyanî destpê bike, ji bo giyanê tevahî cangoriyên Tevgera Azadiya Kurdistanê deqeyek rêz hat girtin. Piştî rêzgirtinê daxuyanî ji aliyê Hevseroka Meclîsa Gel a Mexmûrê Fîlîz Bûdak ve hat dayîn.
Fîlîz Bûdak diyarkir ku ev bi qasî salekêye deriyê zîndana Îmraliyê ne hatiye vekirin û bi ti şeweyî agahî ji Rêberê Gelê Kurd Abdullah Ocalan nehatiye girtin û wiha got: “Herî dawî di 25’ê Adara 2021’an de tenê yek deqe bi rêya telefonê hevditinek pêk hat. Pergala êşkencê ya ku li Îmraliyê tê meşandin, li pêş çavê hemû cîhanê, hemû hêz, hemû tevgerên ku dibêjin em xwedî parastina mafê mirovanin, li pêş çavê wan kiryarên ku li Îmraliyê tê pêkanîn, hemû ji vê re bêdeng dimînin. Pergala li Îmraliyê vegeriyaye pergalekî êşkenceya dayîmî ya 24 saetî. 23 sale ev pergela êşkencê bi awayî herî dijwar, herî hovane, li ser vîna bi mîlyonan mirovan tê meşandin. Rêber Apo dengê bi mîlyonan mirovane, pergaleke, îdolojiyeke ku li seranserê cîhanê ji aliyê jin, ciwan, hêzên enternesyonal, gelê ku dixwazin di welatekî azad de jiyan bikin, dengê wane. Xwedî paradîgmaya ku bûye alternatîfa pergala desthiladar ya ku mirovahî, exlaq, xwezayê di nava qirêjiyê de di fetisîne. Ji bo ev pergal li seranserê cîhanê neyê jiyan kirin, pergala êşkence li Îmraliyê di meşînin ku heta roja me ya îro di dome. Ji bo şkandina vê tecrîdê gelê me, gerîlayên Tevgera Azadiya Kurdistanê bi şev û roj di nava têkoşîn û berxwedanekî bê hempa de ne.”
Her wiha Bûdak di berdewamiya axaftina xwe de êrîşên li ser Başûrê Kurdistanê tê domandin jî bi bîrxist û wiha domand: “Îro êrîşên ku li ser Başûrê Kurdistanê tê meşandin baragehên dewleta Tirk yên ku li Başûr Kurdistanê têne avakirin rûreşiyeke. Ji vê saetê şunde şerê ku li Başûrê Kurdistanê rû bide, ji aliyê mala Barzan ve bi hevkariya dewleta Tirk were destpêkirin wê ne şerê birakujî be. Ev şerekî ku heta qirikê di nava îxanetê de ye. Li ti deveran îxanet li beramberî vîna azad bi serneketiye.”
Bûdak herî dawî ev bang kir: “Em bang li gelê Kurd, gelê azadixwaz, li jin û ciwanan dikin ku ji bo şikandina tecrîda li Îmraliyê, ji bo rawestandina dagirkeriya li ser Kurdistanê di bin navê pêngava ku hatî destpêkirin de em dibêjin, dem dema azadiyê ye, dem dema şkandina tecrîda Îmralî ye, dem dema bi Rêbertiya azad re di Kurdistana azad de jiyan kirine.”
Piştî axaftinê daxuyanî bi berzkirina dirûşmeyên, “Bijî Serok Apo”, “Bimre îxanet” û “Şehîd namirin” bi dawî bû.
