NAVENDA NÛÇEYAN – Komîteya Rêveber a Tevgera Şoreşger a Yekbûyî ya Gelan (HBDH) bi wesîleya salvegera komkujiya Gar a Enqereyê ya 10’ê Cotmehê daxuyaniyeke nivîskî weşand.
Di daxuyaniyê de hate gotin, “Beriya niha bi 6 salan yek ji komkujiyên herî giran ên dîroka me ya têkoşînê komkujiya Gar a Trenê ya Enqereyê ya 10’ê Cotmehê qewimî. Di demekê de ku nakokiyên navbera dewleta fşîst a bûrjûva û gelên me de kûr bûn, Raperîna Gel a Gezî û Şoreşa Rojava weke berhemên têkoşîna me ya şoreşê ya li Kurdistan û Tirkiyeyê bi pêş ket, tevgerên girseyî yên polîtîk ên li dijî faşîzmê û çalakiyên leşkerî zêde bûn, ev komkujî pêk hat.”
ÊRIŞ BI HEVKARIYA DAÎŞ Û MÎT’Ê HATE KIRIN
Di dewama daxuyaniyê de wiha hate gotin:
“Di vê demê de ku gelê me yê Kurd li bajarên Kurdistanê xwerêveberî ragihand û li Tirkiyeyê jî têkoşîna azadiyê ya polîtîk bi pêş ve çû, dewleta faşîst li dijî şoreşgeran gaveke nû avêt û biryar da ku li dijî vî bayê berxwedanê rabe ku hebûna wan dixist metirsiyê. Encama vê yekê jî rêzekomkujiyên li ser gel bû. Mîtînga Amedê, çalakiya li Pirsûsê ya ji bo xwedîderketina li Kobanê, Rojava û Herêmên Parastinê yên Medyayê, di serî de Cizîr, Sûr û Nisêbîn herêmên xwerêveberî lê hate ragihandin û mîtînga ‘Ked, aştî û demokrasiyê’ ya li Enqereyê bûn hedefa êrişên dewleta bûrjûva ya Tirk û desthilatdariya AKP-MHP’ê. Di vê demê de ku li dijî gerîla bi balafirên şer, li dijî berxwedêrên xwerêveberiyê yên Bakurê Kurdistanê bi tank, top û fîşekan, li dijî çalakiyên gel û ciwanan jî bi bombeyan êriş hatin kirin, stratejiya tepisandin û têkbirinê hate meşandin. Ev operasyonên şerê taybet ên li Amed, Pirsûs û Enqereyê ku DAÎŞ’ê li xwe girt, dewletê yekser li xwe negirt. Dewleta Tirk a bûrjûva ku li gel hevkarê xwe DAÎŞ’ê ji bo dagirkirinê êriş bir ser Cerablûs, Efrîn, Girê Spî û Serêkaniyê, li Tirkiye û Bakurê Kurdistanê jî bi hevkariya DAÎŞ û MÎT’ê êrişên kontra bi rêxistin kir.
Erdogan, Bahçelî, Davûtoglû, Midûrê Giştî yê Emniyetê, Serokê Fermandariya Giştî û Serokê Îstîxbaratê yên wê demê amadekarên van komkujiyan e. Hemû jî dijminê gel, karker, ked û jinan e ku ji bo berjewendiyên çîna sermayeyê bi her cûreyî êrişan bikin.”
Di daxuyaniyê de hate ragihandin ku pêvajoya dadgehê ya ku 6 sal in dewam dike, bûye pêvajoya reşkirina delîlan û veşartina têkiliyên bi dewletê re û hate gotin, “Yên ku yekser ev êriş kirin, ji aliyê desthilatdariya AKP-MHP’ê ve hatin parastin.”
‘JI BO HESABPIRSÎNÊ BERÊ XWE DIBIN NAVA REFÊN HBDH Û KBDH’Ê
Di daxuyaniyê de hate destnîşankirin ku tişta li hemberî êrişa 10’ê Cotmehê bê kirin diyar e û hate gotin, “Em ê aad û kolanan bi berxwedana rêxistinbûyî ya li dijî faşîzmê ya bi milyonan mirovê ji bo edalet û azadiyê têdikoşin bikin yek, berpirsyarên van êrişan ceza bikin û saziyên dewletê yên faşîst ji holê rakin. Em bi milyonan mirov in, ew tenê çend kes in. Dîktatorên dest bi xwîn Erdogan û Bahçelî, polîs, leşker, bekçî, çeteyên kontra û ajanên wan wê berdêla van êrişan qat bi qat bidin.”
Di daxuyaniyê de şehîdên Komkujiya Gar a Enqereyê ya 10’ê Cotmehê bi rêzdarî hatin bîranîn, xizmên wan ên ku her meh li ber Gar a Trenê ya Enqereyê nobeda ji bo edaletê digirin hatin silavkirin.
Di dawiya daxuyaniyê de hate gotin, “Ev doz wê ji bo me ti carî neyê girtin, em ê hesab ji kujeran bipirsin, faşîzmê hilweşînin û têkoşîna xwe ya şoreşê bi rengekî serketî bi ser bixînin. bi vî rengî em ê berpirsyariya xwe ya li pêşberî şehîdên xwe bi cih bînin. Bi berxwedaneke hîn mezintir, bi wêrekiyeke hîn mezintir a polîtîk em têkoşînê mezin bikin, bi rêxistin bikin. Ji taxên xizanan heta bi febrîqe û çeperên azadiyê em ê hesab ji kujeran bipirsin. Ti sûcên li dijî gel hatine kirin wê bêceza nemînin. Ji bo hesabpirsînê jî berê xwe bidin nava refên HBDH û KBDH’ê, refên gerîla û milîsan û tevlî çalakiyên ji bo azadiyê bibin.”
