NAVENDA NÛÇEYAN – Koordînasyona Kongreya Star têkildarî mijarê daxuyaniyeke nivîskî weşand. Daxuyanî wiha ye:
“Bi salan e dewleta Tirk a faşîst şer û êrişên xwe li ser gel, sazî, partiyên me li Bakurê Kurdistanê û tevahiya Kurdistanê jî nade sekinandin.
Bi hincetên) cuda û bi qezenckirina raya dewletên Ewropayê êriş û sûcên li dijî mirovahiyê li ser erdê rewa dike.
Ji astengkirina hevdîtinên bi rêber Apo re, derbasbûna xaka Sûriyê, destwerdana Lîbyayê, her wiha bikaranîna çekên kîmyewî di şerê Serêkaniyê û Girê Sipî de, girtina şervana YPJ`ê Çîçek Kobanê ji erda Sûriyê û birîna cezayê muebed, ev hemû sûcên li dijî mirovahiyê ne.
Tu saziyeke mafên mirovan li cîhanê van sûcan rewa nabîne, bi taybet sûcên ku dewleta Tirk li ser gel û jinên Tirkiyê û Bakurê Kurdistanê dide meşandin. Ji 2015`an ve a der heqê parlamenterên jin, siyasetmedarên jin û hevserokên şaredariyan ên jin de îşkence têne meşandin û ji mafê xwe yê jiyanê têne bêparkirin.
Di vê pêvajoya dawiyê de jî, dîsa ji ber tirsa dewleta Tirk ku her nakokî û pirsgirêkên wê yên hundirîn zêde dibin, her wiha ji bo ku rengê demokrasî û pirrengiyê neyê belavkirin û nebe model, heya ji destê wê tê deng û rengê azadiyê di şexsê jinên azadîxwaz de diperçiqînin û vê yekê bi girtina hevşaredar û siyasetmedar û çalakvanên me yên jin dike. Ev jî tê wateya ku hêza dewleta Tirk a çareseriyê bi rêya diyalog û nîqaşan têrê nake, fikir û rê û rêbazên cuda û alternatîfa jiyaneke hevbeş û pirreng tune ye, yan jî ne mimkun e hêza wî ya deshilatdariyê bihêle jiyaneke azad bijî.
Êdî bi rê û rêbazên ji bo rewakirina girtin û biçavkirina jinan li Bakurê Kurdistanê û Tirkiyê xwe ji Peymana Stenbûl vekişand û hêdî hêdî dixwaze qanûna 6284’an jî rake ku ev qanûn û Peymana Stenbûl jî ji bo qedexe û li dijî tundiya li ser jin û malbatê ye û mafê parastina jinan misoger dikir.
Bi bi vî awayî rojane jin têne biçavkirin û di 12`yê Nîsanê de jî 26 jin hatin binçavkirin bê ku sûcên wan were zanîn. Di heman demê de êrişî Komeleya Roza kirin û hin endam û dayikên aştiyê girtin.
Ev kiryarên hovane ku bi rakirina qanûnên parastina mafên jin û malbatan tên şênberkirinû tê wateya ku dewleta Tirk ji bo parastina Osmaniyan her cure hovîtiyê bi kar tîne.
Li ser vî esasî her reng û cureyên îşkence û peydakirina zor û zehmetiya karê xwe yê sereke dibîne û ji bo astengkirina projeya demokrasî û wekheviya zayendan. Ji ber ku dizanin projeya ku jin tê de esas were girtin, wê projeyeke serkeftî be, projeyeke neheqî tê de li tu kesî nayê kirin, li ser esasê wekheviyê jiyan were meşandin û rê nede dîktatoriyan dîroka xwe dubare bikin û jiyaneke ewle ji bo hemû civakan were misogerkirin.
Ji bo vê yekê em wek Kongreya Star banga li hemû saziyên navneteweyî yên mafên mirovan û mafên jinan dikin ku destwerdaneke lezgîn ji bo rewşa Tirkiyê çêbibe û mijarên girtina neheq ya parlamenter û hevşaredar û gelên azadîxwaz were lêkolînkirin. Her wiha banga me ji bo tevahî rêxistinên jinan ku bi yek deng û yek helwest bin ji bo neheqiya ku li ser jinan tê kirin û xurtkirina kar û xebatên jinan ên ji bo pêkanaîna projeya neteweya demokratîk li Bakur û Rojhilatê Sûriyê armanca me ya sereke be.
Dîsa banga me ji bo hemû jinên Kurdistanê ye ku roleke sereke û bingehîn di lidarxistina kongreyeke neteweyî de bilîzin da ku em bibin deng û hêza parastina hemû jinan.”
