NAVENDA NÛÇEYAN – Partiya Jiyana Azad a Kurdistanê (PJAK) li dijî tecrîda girankirî ya li ser Rêberê Gelan Abdullah Ocalan û ji ber nûçeyên derbarê rewşa jiyan û tendirustiya wî de ku di wan çend rojên bihorî de li ser malper û medyayên dîjîtal hatibûn parvekirin daxuyaniyek da. PJAK’ê bang li gelê Kurd yê Rojhilatê Kurdistanê û yên derveyî welat kir ku li her derê bi ruhê serhildanên sala 1999’an xwedî li Rêberê Gelan Abdullah Ocalan derbikevin.
PJAK’ê di destpêka daxuyaniya xwe de îşare bi agahî û nûçeyên têkildarî jiyan û tendirustiya Rêberê Gelan Abdullah Ocalan ku roja 14’ê vê mehê hatibûn parvekirin kir û diyar dike ku ev yek bûye sedemê fikara gelê Kurd û ji ber wê gel ji bo xwedî li Rêberê xwe derbikeve di nava çalakiyan de ye.
Daxuyaniya PJAK’ê wiha didome: “Nêzî 22 salin ku Rêber Apo li girtîgeha Îmraliyê dîl hatiye girtin û di bin rewşa herî dijwar de berxwedaniya xwe ya dîrokî didomîne. Ji bo parastin û xwedîderketina li mafên gelê Kurd, ji bo gelê Kurd bûye remz û sembola têkoşîn û serkevtinê. Tevî hemû tecrîdên li girtîgeha Îmraliyê Rêberê Gelê Kurd berdewam jiyana azad afirandiye û pêşengtiya gelê me ya ber bi armancê ve kiriye. Wate ti carî girtîgeh û tecrîdê nekariye pêywendiya di navbera Rêber Apo û gelê Kurd qut bike.
Ji sala 2011’an heta niha tecrîda li ser Rêber Apo berdewam kiriye û her ku diçe girantir dibe. Helbet armanca wê qutkirina vê çavkaniya moral û hêzê ye. Serok Apo girtîgeha Îmraliyê wek çala mirinê pênase kir û îşare bi wê yekê kir ku eger her bûyerek biqewime ku bibe sedemê metirsî li ser jiyana min, divê her kes bizane ku ew bi zanebûn hatiyekirin û mijarekî tesadûfî nîne. Li vê derê her tişt bi plan û bername û di çarçoveya şerê taybet de pêk tê.
Diyare belavbûna wan nûçe û agahiyên ji aliyê saziyên girêdayî dewleta Tirk a faşîst ji bo têkdan û xirabkirina asta menewiyat û motîvasyona gelê me ye û çêkirina astengî li ser rêya gihîştina azadiyê ye. Helbet gelê Kurd bi Rêber Apo re gavên destpêkê yên ber bi netewîbûn avêtiye û berdewam dike, îro ji bo bi hevre jiyankirina gelan pêşengtiya sîstemekî pêşketî ya jiyanê dike.
Piştî ragihandina kampanya azadî ji bo Rêber Apo û pêşwazî û tevlîbûna gelê Kurd û gelên din ên herêm û cîhanê ya ji wê pêngavê re û zêdebûna zexta li ser dewleta Tirk a Faşîst, diyarbû ku Rêber Apo hemû sînorên siyasî, çandî û civakî derbaskiriye û her kesê azadîxwaz ku li her goşeyekî yê cîhanê ye Rêbertî bi serok û pêşengê xwe dizane û dest jê bernade. Ev yek jî bû pêkhatina yekîtiyek di navbera gelên bindest. Rêber Ocalan nirxekê mirovatî û hevbeş ya gelan û her kesê ku xwedî lê derdikeve ye.
Em ji bîr nakîn ku gelê Kurd li Rojhilatê Kurdistanê û di sala 1999’an de bi dilsozî û girêdanekî mezin ve li dijî komploya li ser Serok Apo daketin meydanê û heya niha bi vê çavkaniya berxwedan û azadiyê re ye û ti caran dest jê bernade. Jiyan û tendirustiya Rêberê Apo ji bo gelê me xeta sore û her weke berê îsbat kiriye ku bi fedakirina can û jiyana xwe ew parastiye. Gelê me bi heman hest, girêdan û têgihîştinê ve niha jî amade ye û ji bo pêşî li her êrîşekê ya li ser jiyan û hebûna Rêber Apo bê kirin bigire.
Li ser vê esasê bang li gelê me li Rojhilatê Kurdistanê û ji derweyî welat dikin ku ji bo xwedîderketina li Rêber Apo, bi ruhê serhildanên sala 1999’an çavdêriya vê rewşê bikin, xwedî helwest bin û yekîtiya netewiya xwe ji bo têkbirina eniya faşîzm û dîktatorî nîşan bidin.”
