STENBOL – Çalakiya greva birçîbûnê ya bi daxwaza rakirina tecrîdê, di roja 39’emîn de dewam dike. Malbatên girtiyan, diyar kirin ku daxwazên girtiyan daxwazên wane û banga xwedî derketina çalakiya greva birçîbûnê kirin.
22 salin tecrîda li Girtîgeha Îmraliyê ya li dijî Rêberê PKK’ê Abdullah Ocalan dewam dike. Her roja diçe ev tecrîd girantir dibe. Girtiyan di 27’ê Mijdarê de, bi armanca bi dawîkirina tecrîda li ser Ocalan û şermezarkirina binpêkirinên mafan ên di girtîgehan de zêdebûne, dest bi çalakiya greva birçîbûnê kirin. Çalakiya girtiyan di roja 39’emîn de, dewam dike. Heya niha, herî kêm li 100 girtîgehan çalakî didome û nêzî 2 hezar û 500 girtiyan tevlîbûne.
Birayê Selman Çetîner ê li Girtîgeha Tîpa F a Hejmara 1 a Kandirayê dimîne Îsa Çetîner, da xuya kirin ku herî dawî di heftiya derbasbûyî de, bi birayê xwe re hevdîtina telefonê kir. Îsa Çetîner, anî ziman ku birayê wî hîna neketiye greva birçîbûnê.
HEM AZADÎ, HEM JÎ AŞTÎ
Çetîner, diyar kir ku ger daxwazên girtiyan neyin qebûl kirin, wê birayê wî jî, tevlî çalakiya greva birçîbûnê bibe û wiha axivî: “Em xwedî çalakiya girtiyan derdikevin. Li ber çavê tevahiya cîhanê sûc tê kirin. Tecrîd sûçek girane. Desthilatdariyeke ku li dijî gelê kurd, polîtîkayên komkujiyê bi rêve dibe, heye. Dixwaze gelê kurd tune bibe. Ji bo ku ev nêzîkatiyên desthilatdariyê bi dawî bibin, divê tecrîda li ser Ocalan rabe. Girtiyan jî bi vê zanebûnê dest bi çalakiyê kirin. Ango hem ji bo azadiyê û hem jî ji bo aştiyê dest bi çalakiyê kirin. Em jî weke malbatên girtiyan, pêdiviya bi aştî û azadiyê dibînin. Ev daxwazên wan daxwazên me ne jî.”,
Çetîner, xwest ku hemû partiyên siyasî û rêxistinên civaka sîvîl, piştgiriyê bidin çalakiya girtiyan û xwedî daxwazên wan derkevin.
TENÊ BEDENA WAN HEYE
Xwişka Îdrîs Degîrmencî yê ku li Girtîgeha Tîpa T a Hejmara 1 a Tarsûsê, beşdarî koma yekemîn a çalakiya greva birçîbûnê bû, Kezban Dal jî, dest nîşan kir ku ew piştgiriyê didin çalakiya girtiyan û wiha got: “Em dixwazin hem tecrîda li ser Ocalan û hem jî tecrîda li ser hemû kesan bê rakirin. Îro li ser girtiyan zextên pir cîdî hene. Mafên wan ji wan hatine girtin û her tişt ji bo wan sînordar kirine. Tenê bedena wan di destê wan de ma ye. Ev jî ji çalakiya greva birçîbûnê re razandine.”
‘EM Ê LI DÛ MAFÊ XWE BIN’
Dal, diyar kir ku bi tecrîd û zextan, dixwazin gelê kurd asteng bikin ku tu mafên xwe bi dest nexin. Dal, bi bîr xist ku desthilatdarî dixwaze gelê kurd tune bibe û ev peyam da: “Naxwazin kurd hebûna xwe ava bikin. Lê em dibêjin em hene. Heya roja îro me hebûna xwe înkar nekir. Emê ji vir û şûnde jî bi tu awayî înkar nekin. Em bên girtin jî em hene û em bên kuştin jî em hene. Em kurdin û em ê heya dawiyê li pey mafên xwe bin.”
