QAMİŞLO – Ji bo rakirina tecrîda li dijî Rêberê Gelan Abdullah Ocalan û şermezarkirina êrişên dewleta Tirk a dagirker ên li ser herêma Heftenînê, bi sedan şêniyên bajarê Qamişlo, Tevgera Ciwanên Şoreşger û Yekîtiya Jinên Ciwan, endamên Kongreya Star, Partiya Yekitiya Demokratîk (PYD) û saziyên civaka sivîl meşek li dar xist.
Di meşê de pankartên bi nivîsa “Ji têkoşîna Îmraliyê heta berxwedana Heftanînê em ê teqez ser bikevin”, “Ji kuştin û tecawizkirina jinan re em dibêjin na” û wêneyên Rêber Abdullah Ocalan hatin rakirin. Her wiha sloganên “bijî berxwedana Heftanînê”, “Azadî ji bo serokê neteweyî”, “bimre îxanet” û “Heftanîn bi te re heya mirinê” hatin berzkirin.
Meş ji çerxerêya Osman Sebrî heta çerxerêya Şehîd Rûbar Qamişlo ya li bajarê Qamişlo berdewam kir, li ber çerxerêya şehîd Rûbar Qamişlo meş veguherî mêtîngê, di mêtîngê de daxuyanî ji aliyê Endama Yekitiya Jinên Ciwan Behiya Xelef ve hat xwendin.
Naveroka daxuyaniyê wiha ye:
“Di destpêkê de em şehîdên cenga Heftenînê bi bîr tînin û bejna xwe li ber wan ditewînin û soza bilindkirina têkoşîna wan dubare dikin.
Dewleta AKP-MHP’ê hemû Kurdistan kiriye qada şer û dixwaze bi zihniyeta Osmaniyan welatê me dagir bike. Wek tê zanîn ev 3 meh in li Heftenînê li hember faşîzma AKP û MHP’ê şerekî bêhempa ya rûmetê tê meşandin. Ew şer ji bo gelê Kurd û mirovahiyê şerekî dîrokî û exlaqî ye. Ji bo wê em dixwazin bal bikişînin ser rewşa Heftanînê, ku cîhan bizanibe li wir şerê mirovahî tê meşandin. Dewleta AKP û MHP ya faşîzane dixwaze sînorê Osmaniyê ji nû ve zindî bike û hemû gelên li herêmê dijîn qir bike û koçber bike û çeteyên xwe li vir bi cih bike.
Serê ku ji Heftanînê heya Efrînê tê meşandin li ser esasê wê zihniyetê ye. Weke tê zanîn di dîrokê de 12`ê Îlonê jî li hemberî tevgera azadiyê û şoreşgerên çepgir bû destpêkirineke faşîzane ya dewleta qirker.
Gelê me yê bi rûmet û hêja; îro tiştê ku li Kurdistanê diqewime zihniyeta Osmanî ye û 12`ê Îlonê ku bi pêşengtiya faşîzma AKP û MHP tê meşandin.
Weke tê zanîn bi zihniyeta 12`Îlonê dixwaze tevgera azadiyê tune bikin û gelê me bê vîn bihêlin, ji lewra tevahî Kurdistan kirin qada îşkence û şerê qirêj.
Tiştê ku îro li Îmraliyê diqewime û tecrîda heyî ew zihniyeta 12`ê Îlonê ya faşîzane, Rêber Ocalan ev 22 sal in di şert û mercên giran de tecrîd kirine, ji xwe êrişên ku li ser Rêber Ocalan tên meşandin tê wateya ku di şexsê Rêber Ocalan de êrîşî tevahî Kurdistanê tê kirin, pêwîst e gelê me baş bizane êrîşên li ser Rêber Ocalan êrîşên li ser rûmeta mirovahiyê ye.
Em weke Tevgera Ciwanên Şoreşger û Yekitiya Jinên Ciwan di pêngava “em ê teqez bi ser kevin” li hember hemû êrîş û destwerdanên dijmin em ê ber xwe bidin û Kurdistanê ji faşîzma AKP û MHP’ê biparêzin û paqij bikin, em ê li hember dagirkeriyê bi hev re têkoşîn bikin û bi rihê berxwedaniya Heftanînê bi ser bikevin.
Weke ciwanên Kurdistanê bi rihê pêngava “em ê teqez bi serbikevin û tecrîdê bişkînin” em ê li qadan têkoşînê bikin û ji hemû cûreyên dagirkeriyê re jî em ê bêjin na.
Di heman demê de pêngava ku ji bo Rojavayê Kurdistanê, KCK`ê daye destpêkirin “Bes e ji dagirkeriyê re dem dema parastina şoreşê ye”, em weke Tevgera Ciwanên Şoreşger û Yekitiya Jinên Ciwan silav dikin û beşdarbûna xwe ji vê pêngavê re radigihîn.”“.
Di dawiyê de sînevîzyonek têkildarî 12`ê Îlonê hat pêşkêşkirin.
