ŞENGAL- Tevgera Ciwanên Êzidxanê bi daxuyaniyekî, pergala tecrîd û qirkirinê ya li Îmraliyê şermezarkirin û gotin: “Vê dawiyê ev du carin erdhej li Îmraliyê, em ti agahî ji Rêbertiya xwe nagirin. Divê êdî dawî li vê pergala tecrîd û qirkirinê were. Emê ji bo azadiya Rêbertiya xwe û belavkirina fikrê wî heya dawiyê têbikoşin.”
Di nava heftiyekê de li Gemîkê ku nêzî Girava Îmraliyê ye, du erdhejê bi pileyên navbera 3-4 de pêkhatin. Vê yekê fikar û gumanên gelê Kurd û dostên wan ên li ser rewşa Rêber APO ku ev 35 mehin ti agahî jê nayê girtin, zêdetir kir. Tevgera Ciwanên Êzidxanê jî bi daxuyaniyekî sîstema tecrîd û êşkenceyê ya li Îmraliyê şermezarkirin. Daxuyaniya ciwanan li navenda Şengalê ji aliyê Endama Tevgera Ciwanên Êzidxanê Emîra Zozan ve hate xwendin.
‘Em ji jiyana Rêber Apo bi fikar in’
Emîra Zozan erdhejên li Îmraliyê çêdibe û metirsiya li ser jiyana Rêber APO destnîşan kir û got: “Sîstemeke taybet li Îmraliyê li ser Rêber Apo tê ferzkirin. Em agahiyê ji Rêbertiya xwe nagirin û ji hemû mafên xwe bêpar tê hiştin. Li Girava Îmraliyê çi diqewime em nizanin. Berê niha şewat li grava Îmraliyê derket û vê dawiyê du caran jî li cihê ku Rêbertiya me lê tê girtin, erdhej çêdibe. Dema mijar dibe Rêber Apo hem saziyên wekî CPT û hem jî yên qaşo Mafê Mirovanin, xwe ker û lal dikin. Em ji jiyana Rêber Apo bi fikar in. Tiştên ku 25 sale nikarin li Îmraliyê pêk bînin, niha dixwazin bi rêya bûyerên ‘Xwezayê’ pêk bînin. Em vê yekê bi ti awayî qebûl nakin. Heya em agahiyek ji Rêberê xwe negirin, emê di nava têkoşînê de bin. Em dibêjin, bila dawî li vê pergala tecrîd û qirkirinê were.”
Daxuyaniya Tevgera Ciwanên Êzidxanê, bi dirûşmeyên ‘Bijî Serok Apo’ û ‘Bê Serok Jiyan nabe’ bi dawî bû.
‘Wê nekarin bi tecrîdê fikrê Rêber Apo tine bikin’
Endamê Kordînasyona Tevgera Ciwanên Êzidxanê Zêdan Xelef ku tevlî daxuyaniyê bû, têkildarî sîstema êşkenceyê ya li Îmraliyê ji ajansa me re axivî û got: “Tecrîdeke giran li ser Rêber Apo tê meşandin. Em ti agahî ji Rêbertiya xwe nagirin û dewleta Tirk dixwaze fikrê wî tine bike. Lê emê li beramber van hewldanên dewleta Tirk, ji bo belavkirina fikrê Rêber Apo bixebitin. Tevî dîl girtina Rêber Apo, tecrîd û hewldanên van demên dawiyê jî nekariye fikrê Rêber Apo tine bike. Divê gel zêdetir fikrê Rêber Apo nas bike. Emê weke ciwanên Êzidî heta dawî bi vî fikrî bijîn û bidin jiyîn jî. Fikrê Rêber Apo ji bo me her tişt e, dayîk û bav e. Me tîne wê astê ku em pêşengiyê ji civaka xwe re bikin. Beriya 2014’an em her timî koleyê xelkê bûn, lê niha fikrê Rêber Apo wisa dike ku em li berxwe bidin, dost û dijminê xwe ji hev derbixin.”
‘Emê heya azadiya Rêbertiya xwe têbikoşin’
Endamekî din yê Kordînasyona Tevgera Ciwanên Êzidxanê Tamir Silo Miço jî, îşaret bi metirsiya erdhejan a li ser girtîgeha Îmraliyê kir û wiha axivî: “Ev bû du car erdhej li Îmraliyê çêdibe. Erdhej li kuderê çêbibe, mafê malbat û parêzeran heye biçin serdanê bikin û agahiyê ji yên zîndanî bigirin. 35 heyve ti agahiyek ji Rêber Apo nayê girtin. Dixwazin fikrê Rêber Apo tine bikin. Em weke ciwanên Êzidî û hemû sazî û dezgehên Şengalê li ser vî fikrî hatine avakirin. Emê têkoşîn bikin heya Serokê xwe azad bikin.”
