BEHDÎNAN – Gerîlaya YJA STAR’ê Avesta Xabûr di destpêkê axaftina xwe de di şexsê gerîlayên ku di çeperan de gihîştin şahadetê û hemû şehîdên şoreşê bi bîr anî.
Di berdewamiya axaftina xwe de gerîlaya YJA STAR’ê wiha axivî, “Niha artêşa dagirker li ser qadên gerîla êrîşekî dijwar pêk tîne. Şerê ku niha li vir tê meşandin şerê hebûn û tunebûna gelê Kurd e. Artêşa dagirker bi tunekirina gerîla ve dixwaze biçe encamê lê belê wek gerîlayên azadiya Kurdistanê em ê hemû hucreyên xwe derbasê vî axê bikin û tu carî rê nedin dagirkeriyê. Şerê ku niha tê meşandin şerekî ne ji rêzê ye, pêwîst e ji rêzê jî neyê dîtin. Wek gerîla ji bo destkeftiyên gelê Kurdistanê biparêzin vî şerê bi ser bixin, azadiya gelê Kurdistanê bi dest bixin û tecrîta Îmraliyê bişkînin. Em ê sala 2022’yan bikin sala serkeftinê, di vî salê de azadiya fîzîkî ya Rêber Apo mîsoger bikin.”
GerîlayaYJA STAR’ê Avesta Xabûr nirxandina xwe berdewam kir û li ser hevkariya PDK bi dewletê dagirker wiha got: “Erêkirina ku artêşa dagirker derbasî axa Başûr bibe erêkirina qetlîama gelê Kurd e. Wek gerîlayên azadiyê em vê yekê qebûl nakin. Em bang li gelê xwe yê Başûrê Kurdistanê dikin, pêwist e rê nedin wê xiyanetê, zarokên xwe li hember gerîla nedin şer kirin. Dîsa banga me jin û ciwanan heye ku hemberê wê xiyanetê bêdeng neminin. Têkoşîna xwe bilind bikin, li kêleka gerîla cihên xwe bigirin.”
‘ÇAVKANIYA HÊZA ME TÊKOŞÎNA KU LI ÎMRALIYÊ DIMEŞE YE’
Gerîlaya YJA Starê Ronahî Herekol jî diyar şerê ku niha tê meşandin wê bigîhêje serkeftinê û got “Ji ber ku wek gerîla, xwe li ser wê esasê amade dikin. Amadekariyên me li ser du lingên esasî dimeşe. Ya yekemin em hêza xwe ji ideolojî û felsefeya Rêber Apo digirin. Di heman demê de şerê ku li zindana Îmraliyê tê meşandin çavkaniya hêza me ye. Li ser vî esasî xwe perwerde dikin, di warê birdozî û derûnî de xwe amade dikin. Lingê duyemîn ya amadekariyên me jî di çarçove HPG de nûveavabûnê li ser teknîk û taktîka leşkerî de pêşxistin e. Him tunelên şer him ji tîmên bi tevger li her cihê xwe amade dikin. Dijminê dagirker her çiqas bi êrîşên xwe hovane hewl dide astengî ji gerîlayan re çêbike, lê belê gerîla her tim teknîka dagirkeran vala derdixe û hemû xebatên xwe dimeşîne. Niha hezaran hevalên me li hember dagirkeriya Tirk şer dikin, di vî şerî de şehadetên hevalên me jî çê dibe û axa Kurdistanê bi xwîna şehîdên me tê avdan. Bila dijminê dagirker bizanibe ku ew wisa bi hêsanî nikarin pêlê vî axa pîroz bikin û derbas bikin. Dijminê dagirker di encama vî şerê de bin bikeve, em ê bi ser bikevin. Bi vî awayî azadiya Rêber Apo û gelê Kurdistanê bi dest bixin.”
‘TEVLÎ NAV REFÊN AZADIYÊ BIBIN’
Gerîla Ronahî Herekol jî xiyaneta PDK wiha nirxand: “Di vî şerî de PDK yekser pêşengtî li artêşa dagirker dike. Em bang li gelê Kurdistanê dikin li hember vî rabin ser lingan û helwestên xwe nîşan bidin. Herî dawî bangawaziya min ew e ku ciwanên Kurd, gelê Kurdistanê beranberê wan êrîşan helwestên xwe diyar bikin û beşdarê tevgera azadiyê bibin. Banga me ji bo hemû gelan heye. 7 salî heya 70 salî pewîst e li qadan bin û serî netewînin. Bi taybet ciwanên Kurd, jinên Kurd tevlî refên azadiyê bibin. Li hemberê vî dagirkeriyê bibin xwedî helwest.”
