BEHDÎNAN – Komîteya Karên Şehîdan a PKK’ê daxuyaniyek da û got, “Gelê Kurdistanê ku zane pêvajoya têkoşîna şoreşgerî ya li Kurdistanê bi berdêlên giran gav bi gav hatiye afirandin, ji bo vê berdêla rûmetî bi her awayî fedakarî kiriye. Ev nirxên ku her sal bi ked û berdêlên giran tê afirandin, encameke vê sekna pîroz a bi heybet e.”
‘PAŞEROJA ME BI ŞEHÎDAN AVA DIBE’
Daxuyaniyê wiha dewam kir:
“Şehîdên me ku afirînerên berdêlên mezin e, doh, îro û siberoja me ava dike, ronî dike; wezîfeya me ya dîrokî ye ku di her kêliyê de dilsoziya xwe ya bi şehîdên xwe re bi bîr bînin.
Her roja dîroka me ya têkoşînê bi berxwedanên mezin ên destanî têr û tijî ye. Têkoşîna ku nîv sed sal e em li dijî dagirkerî, mêtingerî û faşîzmê dimeşînin, bi saya fedakariyên mezin îro gel li dora xwe civandiye. Ji her devera welêt, ji ciwanan heta extiyaran bi deh hezaran kes tevlî bûne. Bi taybetî salên 1990’î salên tevlîbûna herî girseyî bûn. Yên ku van salan berê xwe têkoşîna azadiyê ya Kurdistanê ya bi pêşengiya PKK’ê, yên ku jiyaneke azad tercîh kirin, di heman demê de bûn afirînerê asta heyî ya têkoşîna me. Rastiya şehadetê ku hêza avaker a dîroka me ya têkoşînê ye xwedî rastiyeke bi vî rengî ye. Bi kurtasî ji bo îro, ji bo nirxên li ser vê rojê ava bûne bêne fêhmkirin divê mirov di her kêliya jiyanê de li rabirdûyê vegerin û bala xwe bidin ser berdêlên hatine dayin. Bi hezaran jin û mêr ên leheng goreke xwe jî nîne. Li Kurdistanê rastiyeke bi vî rengî ya şehadetê heye. Eger gelê me îro di nava gelên cîhanê de kêm jî be bûye xwedî cihekî bi rûmet, bêguman ev yek bi saya bi deh hezaran hevrêyên me pêk hatiye ku li ser xeta jiyana azad a Rêber Apo bêhesab li ber xwe dan û şehîd bûn. Yek ji hevrêyên me yên ku vê rastiyê temsîl dike jî hevalê Rêber Amed e.
‘BI LEHENGÎ LI BER XWE DA Û ŞEHÎD BÛ’
Heval Rêber Amed (Mehmet Habîp Ozdaş) sala 1965’an li Amedê ji dayik bû. Bi salên 1989-90’î re ku têkoşîna azadiyê ya Kurdistanê mezin û belav bû, mirovên ji her temenî tevlî bûn. Heval Rêber jî sala 1992’an tevlî nava refên gerîla bû. Jiyana xwe ya li gorî pêwîstiyên kevneşopiya civakî li pêşiya tevlîbûna wî ya li nava refên azadiyê nebû asteng. Di demekê de ku Serhildanên gel û têkoşîna gerîla bi hev re dihate meşandin, hevrê Rêber Amed bû endamekî çalak ê têkoşîna azadiyê. Heta sala 1997’an li gelek qadan li dijî dewleta Tirk a faşîst têkoşiya. Sala 1997’an li Xerzanê li dijî leşkerên dijmin di şer de bi lehengî li ber xwe da û şehîd bû.
Di serî de malbata hêja ya Ozdaş bila serê tevahiya gelê me yê Kurdistanê yê welatparêz sax be, em soza xwe dubare dikin ku heta dawiyê xwedî li bîranînên şehîdên me yên mezin derkevin û jiyana azad, welatê azad pêk bînin ku xeyalên wan bû.”
