ŞENGAL- Endamê Rêveberiya Komîteya Malbatên Şehîdan ya Şengalê Sadûn Mîrza Elî ku di encama êrişa hewayî ya dewleta Tirk a dagirker de şehîd bû, li şehîdgeha Şehîd Dilgeş û Şehîd Berxwedan bi merasîmeke girseyî hate definkirin û peyama: “Me ji bo Şengaleke Xweser berdêlên giran da û didin. Lê heta avakirina Şengalek xweser emê nesekinin û gav bi paşve neavêjin. Yên bi dijmin re hevkariyê dikin û dibin sedema şehîdbûna pêşengên Êzidî wê neyên efû kirin û hesab ji wan wê were xwestin.”
Dewleta Tirk a dagirker duh li navbera gundên Werdiyê-Ziravikê ya girêdayî nahiya Tilizêr ya Şengalê de wesayîta Saziya Malbatên Şehîdan ya Şengalê bombebarankiribû û di encamê de Endamê Rêveberiya Komîteya Malbatên Şehîdan ya Şengalê Sadûn Mîrza Elî şehîd bûbû. Şehîd Sadûn ji bo amadekariya merasîma îro, ya şehîd Şêrzad Şemo kar dikir, dema kar de rastî êrişê hat.
Şehîd Sadûn îro, bi karwaneke girseyî ji Şengalê di geliyê Şilo re destpêkê anîn Xanesorê, li wir ji aliyê girseya gel ve hate pêşwazîkirin û bi awayeke girseyî berbi şehîdgeha Şehîd Dilgeş û Şehîd Berxwedan ya çiyayê Şengalê ve hate oxirkirin. Girseya gel hem xemgîn û hem jî bihêrsbûn.
Merasîma şehîd bi amadebûna hemû sazî û dezgehên Şengalê, malbata şehîd, xelkê herêmê û hêzên parastinê pêkhat. Merasîm destpêkê bi deqîqeyek rêzgirtin ji şehîdên Êzidxanê re destpê kir.
Endama Rêveberiya Saziya Malbatên Şehîdan Pakîze Celal destpêka axaftina xwe de sersaxî ji malbata şehîd re xwest û wiha got: “Şehîd Sadûn bavê zarokan bû, dayîk û bavê wî nebû û birayê şehîdan bû. Her egîdek me şehîd dibe, birînên me carek din vedibin. Em şehîdên xwe ji bîr nakin û bi wan nakevin jî. Emê xwedî li bîranîna şehîd Sadûn derkevin. Hol hola tawisê melek e. Şehîd Namirin.”
Paşê Hevserokê Meclîsa Xweseriya Demokratîk a Şengalê (MXDŞ) Nayîf Şemo mafê axaftinê girt. Şemo jî diyar kir, balafirên dewleta Tirk pêşengekî din yê civaka Êzidî kir hedef û got: “Şehîd Sadûn tê naskirin û ji malbatek welatparêz û xwedî şehîd tê. Serê me bi şehîdê me bilind e. Emê ji bo bîranîna wan xebat û têkoşînê bikin, heta encam bigirin. Emê ji saya van qehremanan karibin, Şengaleke xweser ava bikin û bigihijin hedef û armancên xwe.”
Hevserokê MXDŞ’ê Nayîf Şemo di dewama axaftina xwede, îşaret bi têkoşîna xweserî û azadiyê ya li Şengalê kir û van peyaman da: “Gelek armancên mezin li pêşiya me hene. Em doza avakirina welatê xwe dikin. Di dîrokê de ji bo avakirina welat timî berdêlên giran hatine dayîn. Me jî gelek berdêlên giran da û gelek qehremanên xwe yên ezîz ji dest da. Heta em Şengaleke Xweser ava nekin, emê hîn berdêlan bidin.”
Nayîf Şemo îşaret bi kesên xayîntiyê li Êzdayetiyê dikin û ji dijminên civaka Êzidî re dixebitin jî kir û wiha bang kir: “Hun zarokên Êzidiyan bi destê dijminan didin kuştin. Emê ti carî we efû nekin û li we neyên rehmê. Eger hun ji vê rêya şaş venegerin, emê rehmê li we nekin. Par weke îro şehîd Şêrzad berpirsê asayîşa me dîsa bi destê van kafiran, şehîd ket. Em di şexsê şehîd Sadûn û şehî Şêrzad de hemû şehîdên azadiyê bibîrtinin. Em bejna xwe li ber wan de ditewînin û sersaxiyê ji hemû malbatên şehîdan, gelê xwe û serokê xwe re dixwazin.”
Merasîm bi dirûşmeyên, ‘Şehîd Namirin’ bi dawî bû.
