ŞENGAL- Pêkhateyên Şengalê Êzidî û Ereb, bi daxwaza azadiya fizîkî ya Rêber Apo meşeke girseyî lidarxistin. Şengalî di meşê de azadî ji Rêber Apo re xwestin.
Bi pêşengiya Meclisa Xweseriya Demokratîk a Şengalê, civaka Êzidî û Ereb bi meşeke girseyî piştgirî dan Pêvajoya bi navê ‘Banga Aştî û Civaka Demokratîk’ a Rêber Apo. Herwiha, şehîdên Tevgera Azadiya Kurdistanê yên ji bo Şengalê canê xwe fedakirine jî hatin bîranîn.
Di meşê de bi sedan posterên Rêber Apo hatin rakirin û dirûşmeyên, ‘Bê Serok jiyan nabe’ qîr kirin.
‘Rêber Apo civaka me difikire’
Meşa ji gundê Hemo yê deriyê Geliyê Kersê destpê kir, heta Baxçê Serokatî dewam kir. Girseya gel li Baxçe daxuyaniya çapemeniyê da.
Daxuyaniya çapemeniyê ya ji aliyê Endama Kordîsnasyona TAJÊ Dayê Şemê Remo ve hate dayîn, bi deqîqeyek rêzgirtin destpê kir.
Dayê Şemê di destpêka axaftina xwede balkêşa ser rola Rêber Apo ya di rizgarkirina Êzidiyan ji fermana 3’yê Tebaxê de û got: ‘‘Di dema Fermana 3’ê Tebaxê de, dema ku gelê me yê Êzidî bi qirkirineke hovane re rû bi rû ma, Rêber Apo bê dudilî destwerdan kir. Gerîla şand bi hawara gelê me ve û bi vî awayî bi hezaran mirov ji mirinê xilas kirin û parastin. Ev fedakarî ne tenê di wê demê de ma, heya roja îro jî li ser parastina civaka me difikire û peyamên hêja ji me re dişîne.’’
‘Emê fedekariyên wan tu carî ji bîr nekin’
Dayê Şemê Remo diyar kir ku gerîlayên PKK’ê li Şengalê ked û têkoşîn daye, wiha got: ‘‘Em, wek civaka Êzidî, vê fedakariya mezin tu carî ji bîr nakin. Dilê me bi êşe ji ber windahiyên me hene. Lê gerîla bi fedakariya xwe, em parastin û gelek gerîla canê xwe feda kirin. Em sersaxiyê ji Rêber Apo û ji hemû malbatên şehîdên leheng re dixwazin ku bi xwîna wan axa me hate parastin û gelê me ji tunebûnê rizgar kirin. Bîranîna wan her û her di dilê me de zindî ye û dê bibe ronahiyek ji bo rêya me.”
‘Wê têkoşîna tevgera azadiyê mezintir bibe’
Endama Kordînasyona TAJÊ dayê Şemê kongreya 12’emîn ya PKK’ê ya dîrokî jî bibîr xist û got: ‘‘Piştî Kongreya 12. ya PKK’ê, dibe ku gelek alî û kes bifikirin êdî dawî li têkoşîna azadiyê hatiye û her kesê ku li ser fikra Rêber Apo ye, wê dest ji têkoşînê berde. Lê bila her kes bizane, Tevgera Azadiyê wê têkoşîna xwe hê mezintir bike. Ev kongre, li şûna ku bibe xala dawî, wê bibe destpêkeke nû ji bo xurtkirina têkoşînê û berfirehkirina qada wê. Yên ku hêvî dikin ku PKK û tevgera azadiyê lawaz bibe, wê bibînin ku ev tevger bi biryardarî û hêzeke mezintir ber bi armancên xwe ve diçe.”
‘Divê Iraq nêzîkatiya xwe ya li beramber Şengalê rast bike’
Di heman daxuyaniyê de dayê Şemê îşaret bi zextên Iraqê yên li ser Şengalê jî kir û got: ‘‘Di vê demê de, pêwîste ku Iraq jî nêzîkatiyên xwe li hember me rast bike û Xweseriya Şengalê qebûl bike. Şengal, wek herêmeke ku bi sed salan rastî zilm û zordestiyê hatiye, heq dike ku xwedî statûyeke xweser be û çarenûsa xwe bi destê xwe diyar bike.”
Di dawiya daxuyaniyê de bang li her kesekî azadîxwaz hate kirin da ku piştgirî bide pêvajoya ku Rêber Apo daye destpêkirin. û
Çalakî bi dirûşma “Bi Can bi Xwîn em tere ne ey Serok” bi dawî bû.
