REQA- Li Reqayê bi beşdariya gelek rêxistinên ciwanan panelek diyalogê bi dirûşmeya “Em ê bi hişmendiya siyasî ya ciwanan pêşerojê ava bikin” hate lidarxistin.
Di panelê de mijarên hêzdarkirina ciwanên Sûrî û veguherandina wan bo pêşengan di hemû warên jiyanê de hatin nîqaşkirin.
Di nîqaşên ku hatine kirin de mijarên ku hatine nîqaşkirin ev bûn: beşdariya siyasî û biryardan, xurtkirina aboriyê û peydakirina derfetên alternatîf, çand û nasnameya aîdiyetê, xurtkirina psîkolojîk û dîjîtal, rola perwerdehiyê, edaleta zayendî, edaleta avhewayê û xurtkirina jinên ciwan û hwd.
Di nîqaşan de, tekez hate kirin ku ciwanên Sûrî hêzek bi bandor in di avakirina pêşerojê de û divê hawîrdorek perwerdehiyê ya teşwîqker, afirîner û îlhambexş were afirandin.
Hate gotin ku divê derfeteke mezin ji bo ciwanan were afirandin da ku ew bi awayekî çalak beşdarî biryardan û pêvajoya siyasî bibin, û divê piştgirî ji bo avakirina platformên ciwanan were kirin da ku ciwan bikaribin rolên xwe yên siyasî di saziyên siyasî û giştî de bilîzin.
Îsmaîl Ehmed, Hevserokê Meclîsa Ciwanên Sûriyeya Pêşerojê ya Reqayê, di axaftina xwe ya ji ajansa me re de tekez kir ku ev panel di qonaxa siyasî de girîng e û divê ciwan roleke girîng bilîzin.
Ehmed gotinên xwe wiha domand: “Mijarên me perwerdekirina ciwanan û hesasiyeta wan a siyasî ne. Me kampanyayek da destpêkirin da ku hemû qedexeyên ku hişê ciwanan kontrol dikin bişkînin û bi rêya medyaya dijital û broşuran di nav ciwanan de hişmendiyê biafirînin. Em ê saziyên xwe bi hişmendiyê di têkoşîna li dijî madeyên hişber de çalaktir bikin.”
Panel bi sloganan bi dawî bû.
