QAMIŞLO- Îro Yekîtiya Jinên Ciwan li bajarê Qamişlo komxebatek li ser rola jinên ciwan di avakirina Sûriyekê demokratîk de li darxist. Komxebat li ser asta Herêma Cizirê di bin silogana ‘’Bi têkoşîna Jinên Ciwan emê dagirkerî têk bibin û Sûriyekê demokrat ava bikin’’ de hat li dar xistin. Ji pêkhateyên Kurd, Ereb, Ermen û Suryan jinên ciwan tevlî komxebatê bûn.
Di komxebatê de pêşengehekê li ser Jinên ku di têkoşîna gelan de pêşengtî kirin hat danîn.
Pêşengehê de suretên Zenobiya, Jîna Emînî, şehîdên berxwedana Tişrînê, Sakînê Cansiz û gelek suretên din li ser çand û baweriyên Rojhilata Navîn hatin danîn.
Li kelêkê vê jî standa pirtûka hat danîn. Di vir de pirtûkên Rêber APO, taybet pareznameya pencêmîn ku behsa çareseriya pirsgirekên Rojhilata Navîn dike, pirtûkê Şehîd Sara û pirtûkên li ser dîroka Rojhilata Navîn hatin danîn.
Komxebat bi deqeyek rêzgirtin despê kir. Piştî vê li ser navê Kongra Star Şeraz Hemo axaftina vêkirinê kir. Şeraz bal kişand li ser rewşa dawî ya ku li Sûriyê rû dide. Diyar kir ku piştî hilweşandina rejîma BAAS, huqumeta nû ku ji aliyê çeteyên HTŞ hatiye avakirin pêşarojekê ronî ji bo Sûrî û taybet ji bo jin nikare misoger bike. Bal kişand li ser kiryarên dawî yên HTŞ li dijî jin pêk tîne. Di bin navê îslama siyasî de dixwazin civakekê zayendperest û bê reng û bêdengiya jinê bidin avakirin.
Piştî vê li ser navê Yekîtiya Jinên Ciwan Bêrîtan Roj axivî. Bêrîtan di despêkê axaftina xwe de berxwedana Tişrînê silav kir. Ji malbatên şehîdan re sersaxî xwast. Di berdewamiya axaftina xwe de bal kişand li ser rola jinên ciwan di berxwedana Tişrînê de. Diyar kir ku berxwedana Tişrînê bi rihê Jinên Ciwan bi hêz dibe û bi hemû Jinên Ciwan ku di nava rêfên YPJ de cihê xwe digrin li hemberî êrîşên çeteyên dewleta tirk a dagirker berxwedanekê dîrokî li ser bingeha Şerê Gelê Şoreşgerî didin meşandin.
Di berdewamiya axaftina xwe de behsa êrîşên çeteyên HTŞ li dijî bawerî û netewên cûr bi cûr, kir. Ji wextê ku çete hatin li ser huqumeta Şam, êrîşên jin kirin û jiyanekê paşverû ferzkirin, xwestin jin bêdeng bibe. Li hemberî vê şoreşa gelan di nava Sûriyê de wekê minakekê çareseri derdikeve pêş. Ji ber ku di vê şoreşê de taybet jin rolekê mezin dileyizin.
Piştî axaftinan komxebat bi temaşekirina sinevisyonek li ser bingehên dîrokî ya Yekîtiya Gelan li herêmên Bakûr û Rojhilatê Sûriyê û giştî Rojhilata Navîn dewam kir.
Piştî vê Komxebat bi niqaşan ve berdewam kir.
Di despêka niqaşê de jina ciwan a bi nav Losnak behsa bûyerên dawî ku li Sûriyê diqewimîn kir. Anî ziman ku ev rejîma nû ya Sûriyê xwe wekê rizgarkerên Sûriyê didin nişandan. Colanî wekê şoreşgerekê nişan didin. Lê di bin vê maskê de çeteyekê DAİŞ xwe veşartiye. Li dijî jin û tevlîbûna jin ji siyasetê û jiyanê, astengiya derdixe û her diçe derdorê jinê tengtir dike. Her wiha Losnak bal kişand li ser dewlemendiya şoreşa Bakûr û Rojhilatê Sûriyê. Ani ziman ku netewên cuda cuda li kelêkê hevdû jiyan dikin, bê ku êrîşê hevdû bikin an hevdû înkar bikin.
Di dawiyê de Jinên Ciwan nêrînên xwe ji bo çareseriya Sûriyê anîn ziman. Diyar kirin ku bê jin nabe ku civak azad bibe. Bal kişandin li ser berdelên ku ji bo vê şoreşê hatin dayîn û taybet keda hevalên jin ku di vê şoreşê de heye. Diyar kirina ku ger huqumetekê nû li Sûriyê were avakirin û rola jin tê de nîn be, ev huqumet nikare bi erkên xwe rabe. Qasî ku niha rewşa vê huqumetê xuya dike, maf nade jin ji bo bi îradeya xwe tevlî rêvebirinê vê welatê bibe. Wisa jî ev huqumet nikare bibe temsîlkarê vê civakê.
Komxebat bi encamnameyek bi dawî bû.
