NAVENDA NÛÇEYAN- Dayîkên Şehîdan ên Wargeha Mexmûrê êrişên dewleta Tirk ên bi çekên kîmyewî û qedexekirî yên li ser gerîlayan bi tûndî şermezar kirin û gotin: “Divê malbatên şehîd û şervanan bibin yek û bi hev re li dijî van sucên şer rabin!”
Dayîkên Şehîdan ên Wargeha Penaberan a Şehîd Rustem Cûdî (Mexmûr) ji ajansa me re têkildarî êrişên dewleta Tirk ên bi çekên kîmyewî û qedexekirî yên li ser Gerîlayên Azadiya Kurdistanê axivîn û êriş bi tûndî şermezar kirin û banga xwedîderketina gerîlayan kirin.
‘Bese ji koletiyê re!”
Dayîka Zeyneb Hilalî ku dayîka şehîdane di destpêka axaftinên xwe de êrişên dewleta Tirk wek rûreşiyek a cîhanê bi nav kir û got: “Ev bi salane, dewleta Tirk êrişî Kurdistan û gerîlayên me dike. Her wiha çekên kîmyawî bikartînin. Her roj bi van çekên qedexekirî êrişan dikin û dixwazin me qir bikin. Gerîla rûmeta me ye. Em xwedî rumetin û rumeta me jî gerîlayên me ne. Çiyayên me bi kîmyabaranê wêran kirin, zarokên me bi van çekên qedexekirî şehîd dixin. Lê rûxmê wê jî nikarin yek gavê di pêş de bên. Ez wek dayîkek ya şehîdan van êrişan şermezar dikim û bang li tevahî gelê bi rumet dikim, li dijî van sucên şer bêdeng nemînin. Ma emê heta kengê koleyê, koleyan bin. Bese! Rabin ser xwe û bêjin bese ji xiyanet û dagirkeriyê re. Divê saziyên dibêjin em dijî çekên qedexekirîne êdî dengê me bibihîsin û bikevin tevgerê.
‘Em heta dawî li pişta zarokên xwe ne’
Her wiha dayîka Eyşê Roboskî ku ew jî dayîka şehîdane, silav û rêzên xwe ji Mexmûr heta Herêmên Parastina Medyayê ji gerîlayan re şand û wiha axivî: “Ez silavan ji Îmraliyê re dişînim. Li Îmraliyê berxwedanek mezin heye û ew berxwedan niha li Herêmên Parastina Medyayê jî tê jiyankirin. Ev demek dirêje jî li ser şervanên me çekên qedexekirî tên bikaranîn. Em wek dayîkên şehîd û şervanan van êrişên çekên kîmyawî û qedexekirî bi tûndî şermezar û rûreş dikin. Divê ev yek bi tûndî bê şermezarkirin û bertekên mezin derbikevin. Her wiha em kesên ku van çekan çêdikin, difroşin û kesên ku bikartînin hemûyan şermezar dikin. Ti caran em Kurd xilas nabin, ji ber ku em netewek kevnin. Kesên ku dibêjin em mafê mirovan diparêzin, çima dema mijar dibe Kurd ti maf nayê dayîn. Bêdengiya ji van çekan re hevkarî ye. Emê wek dayîkên şehîdan heta dawî li pişta zarokên xwe bin.
‘Rabin ser xwe’
Herî dawî jî dayîka Mehbûb Hilalî ku ew jî dayîka şehîdane, bikaranîna çekên qedexekirî weke sucê şer bi nav kir û wiha nêrîn û bertekên xwe anîn ser ziman: “Ez wek dayîkek ya şehîdan tevahî êrişên dewleta Tirk ya li ser gelê Kurd û taybet jî li ser gerîlayên me, şermezar û rûreş dikim. Ti mafê wan nînin vê acizî û nexweşiyê dixin di nava me de. Zarokên me ji ber zilm, zorî û dagirekriya Tirkan çûne serê çiya û ji bo azadiyê têdikoşin. Ev 30 salin em ji ber zilma dewleta Tirk koçberin. Dewleta Tirk malên me şewitandin û talana me kirin. Zarokên me qetilkirin û malbata me qirkirin. Em wek gel, tenê heqê xwe dixwazin. Ji ber vê yekê jî, em wek dayîkên şehîdan êrişên dewleta Tirk ên li ser gerîlayan şermezar dikin. Çekên qedexekirî tên bikaranîn û ev yek sucê şere. Divê demildest pêşiya van sucên şer bên girtin. Erm carek din bikaranîna çekên qedexekirî şermezar dikin. Bang li tevahî malbatên şehîdan dikim, li dijî bikaranîna çekên qedexekirî rabin ser xwe.
Çavkanî: Rojnews
