Fermandariyê di salvegera 20’an de komploya navneteweyî bi tundî şermezar kir û got, “Di şexsê şehîdên me yên ku bedena xwe li hemberî komployê kirine sîper û bi şîara ‘Hûn nikarin Roja me tarî bikin’ li dora Rêbertiya me bûne dîwarekî ji agir, em hemû şehîdên xwe yên qehreman bi bîr tînin.”
NAVENDA NÛÇEYAN- Fermandariya Biryargeha Navenda Parastina Gel (NPG), bi wesîleya salvegera komploya 15’ê Sibatê ya li dijî Rêberê Gelan Abdullah Ocalan hate kirin, daxuyaniyeke nivîskî da.
Fermandariyê di salvegera 20’an de komploya navneteweyî bi tundî şermezar kir û got, “Di şexsê şehîdên me yên ku bedena xwe li hemberî komployê kirine sîper û bi şîara ‘Hûn nikarin Roja me tarî bikin’ li dora Rêbertiya me bûne dîwarekî ji agir, em hemû şehîdên xwe yên qehreman bi bîr tînin.”
KOMPLO BI GIRANÎ HATE QELSKIRIN
Di dewama daxuyaniyê de hate gotin, “Dîroka gelê Kurdistanê ya ku yek ji gelê qedîm ê herêmê ye, dîrokeke komployan e. Gelê me her dem ji aliyê hêzên serwer zext li ser wan hatine kirin. Gelê me her cara ku bi lêgerîna azadî, edalet û wekheviyê daxwazên xwe diyar diyar kiriye, bi komployan êrîşî gelê me kirine
Komploya Navneteweyî ya 15’ê Sibata 1999’an a ku ji ber metod û çarçoveya xwe ji komplo û êrîşên din cihêtir e, bi pêşdîtina kûr a Rêber Apo, bi berxwedana bêhempa û bi berxwedana qehremanî ya gel û tevgera me, hatiye pûçkirin. Di heman demê de di çarçoveya paradîgmaya civaka demokratîk de ya ku Rêbertiya me li Îmraliyê ew ava kiriye, Tevgera Azadiyê ya Kurdistanê xurt bûye û hêza wê sînorên Kurdistanê derbas kiriye. Di heman demê de li ser xeta Şerê Gel ê Şoreşgerî, Gerîlayên Azadiyê yên Kurdistanê di warê stratejîk û taktîkê de xwe nû kiriye, bi performansa xwe encamên girîng derxistiye holê. Gelê Kurdistanê jî dev ji hezkirina Rêbertî û xeta wî ya serfiraziyê bernedane û bi dayîna berdêlên mezin, têkoşîna li hemberî komployê aniye asteke girîng.
Lê belê ev rewş nayê wê wateyê ku komplo bi temamî têk çûye. Komplo gelekî qels bûbe jî, hêzên ku dixwazin gelê Kurdistanê tasfiye bikin hîn dest ji vê armanca xwe bernedane û hewl didin bi rê û rêbazên nû encamê bigirin. Lewma li dijî gelê me yê li çar parçeyên Kurdistanê êrîşên li derveyî mirovahiyê dikin û hewl didin pêşî li destketiyên gelê me bigirin.
EM BI XURTÎ TEVLÎ PÊNGAVÊ BIBIN
Bêguman di vê pêvajoya dîrokî de bi berxwedaneke gelekî watedar bersiv ji vê pêla êrîşan re tê dayin. Sekna bi biryar a di şexsê Leyla Guven û Nasir Yagiz de li gelek navendên dinyayê û li zindanan tê nîşandan, ji bo mirovahiya pêşverû ya li dijî paşverûtiyê têdikoşe dibe çavkanî, baweriya bi azadiya Rêberê me û gelê mez xurt dike û li dijî hêzên komploger ên navneteweyî sekneke xwedî îrade nîşan dide. Van hevrêyên çalakger ên hêja, bi berxwedana xwe ya bi heybet peyama pêwîst dane her kesî. Em hêzên gerîla, vê berxwedana lehengî ku gerîlatiya serketinê li ser me ferz dike rast fêhm dikin û bi coşa xwe ya şoreşgerî silav dikin. Em bang li gelê xwe dikin ku li dora berxwedêran bibe yek û bi xurtî tevlî vê pêngava girîng bibe.
GERÎLAYÊN AZADIYÊ WÊ BI ERK Û BERPIRSYARIYA XWE RABIN
Di vê demê de ku em dikevin sala 21’ê ya komploya navneteweyî, êdî gelê me û gerîlayên azadiya Kurdistanê nema dikarin dîlgirtina Rêber Apo tehemûl bikin. Heta ku Rêber Apo azad nebe em nikarin bêjin ku komplo têk çûye û gelê me jî wê heta hingî rizgar nebe. Ev yek armanca dawîn a li pêşiya gerîlayên azadiyê yên Kurdistanê ye. Serdema nû jî wê bi bûyerên di vê çarçoveyê de derbas bibe. Gerîlayên HPG’ê ku xwe bi rêbaza têkoşîna serdemê amade kirin, ji bo komploya navneteweyî di nava rûpelên tarî yên dîrokê de tine bike, bi daxwaz, bawerî, biryardarî û ruhê fedayî wê ji xeta têkoşînê ya demê tawîzê nedin û bi erk û wezîfeyên serdemê rabin.
Gerîlayên Kurdistanê ku di têkoşîna dijî komploya navneteweyî de ti carî bi dudilî tevnegeriyan, di sala 21’ê ya têkoşînê de wê têkoşîna di oxira vê armanca pîroz de dimeşînin xurtir bikin, bi ruhê têkbirina komployê bi zanebûn, fedakarî û xîretê wê bi rola xwe rabin.”
