ŞENGALÊ – Fermandariya YBŞ-YJŞ bi wesîleya hatina cejna Şevberat û Çarşema Nîsanê daxuyaniyek weşand.
Di daxuyaniyê de hate gotin, “Gelê me di rojên herî zor û zehmet de xwedî li çanda xwe derketiye û rojên xwe yên dîrokî pîroz kiriye.”
Fermandariyê diyar kir ku ji ber sedema nexweşiya vîrûsa koronayê dibe ku wek salên bihorî ew cejnên xwe bi girseyî pîroz nekin, lê belê bi heman dilxweşiyê li malên xwe pêşwazî û pîroz bikin.
Fermandariyê di daxuyaniyê de de tevahî şehîdên fermanê ji bi bîr anî.
‘EV GEL HER TIM BI CIVAKBÛYÎNA XWE HATE NASÎN’
Di daxuyaniyê de hate gotin, “Em civaka Êzîdi, xwedî çandeke gerdûnî ne. Ji bona vê jî gelek cejnê me û rojên me yên pîroz hene. Em dizanin ku girêdaniya gelê me ya bawerî, ol, cejn, pîrozgehên xwe ve di asta herî jor de ye. Di rojên herî zor û zehmet de gelê me dest ji bawerî, dîrok û çanda xwe bernedaye û di wan rojên zor û zehmet de heyanî roja me ya îro de hertim piroz kire. Em girêdaniya gelê xwe ya ku bi civakbûyîna xwe jî dizanin. Ev gel hertim bi civakbûyîna xwe hate nasîn û xwedî li pîroziyên xwe derkete. Ji van rojên pîroz ku gelê me bi dilxweşî û germiyekê mezin pîroz dike Şêva Şevberetê û Çarşema Nîsanê ye.
Bi hatina van rojên pîroz di serî de li tevahî şehîdên ji destpêka fermanê heyanî roja me ya îro ku bûne mîmarê civaka me û canê xwe fedakirine bi rêzdarî û minetarî bibîrtînîn. Van rojên pîroz di serî de li malbatên şehîdan, li hevalên xwe û tevahî gelê xwe pîroz dikin.”
‘TENDURISTIYA GELÊ ME JI BO ME LI PÊŞIYA HER TIŞTÎ YE’
Fermandariyê bal kişand ser nexweşiya vîrûsa koronayê û ev bang kir: “Ji ber sedema ev nexweşiya bi navê vîrûsa korona ku giştî cîhan xiste bin tesîra xwe de, dibe ku van rojên dîrokî û pîroz weke salên bihorî em bi girseyî pîroz nekin. Lê belê em di wan hêvî û baweriyê de ne gelê me wê van çandê xwe yên pîroz û dîrokî wê di malen xwe de bi eynî germî û dilxweşiyê pîroz bikin. Ji bona me tendûrîsti (sehet) ya miletê me li pêşiya her tiştî di tê.
Em bi hatina van rojên pîroz li tevahî gelê xwe yên derveyî welat û yên ku di kempa de jî dimînin li wan pîroz dikin. Însanên me ê ku derveyî welat bi vê nexweşiyê ketine em şîfayê lezgîn jê re dixwazin.”
Fermandariyê destnîşan kir: “Em weke YBŞ-YJŞ di şexsê fermandarê mezin Şehîd Zerdeşt û hevalên pêra ku di vê dawiyêde di encamê êrîşa dewleta Tirk de gihîştine şehadetê tevahî şehîdên fermanê ku bûne sembolek ji çand û dîroka me, em bi rêzdarî û mînetarî bibîrtînin.”
